Лінкі ўнівэрсальнага доступу

Лукашэнка пра выбары дэпутатаў: «Ужо вельмі весела»


Аляксандар Лукашэнка на выбарах у мясцовыя саветы дэпутатаў, 2018 год

Парлямэнцкія выбары ў Беларусі пройдуць у адпаведнасьці з сусьветнымі стандартамі. Пра гэта, як перадае БелТА, Аляксандар Лукашэнка заявіў на цырымоніі ўручэньня даверчых грамат амбасадарамі замежных дзяржаў.

«Пачатак вашай місіі супадае з важнай палітычнай падзеяй у краіне — парлямэнцкімі выбарамі. І вы зможаце асабіста пераканацца, што электаральная кампанія пройдзе ў строгай адпаведнасьці з нацыянальным заканадаўствам і патрабаваньнямі агульнапрынятых сусьветных стандартаў», — запэўніў Лукашэнка дыпляматаў.

Ён заўважыў, што Захад заўсёды папракаў Беларусь у «сумных электаральных кампаніях». Аднак, на думку Аляксандра Лукашэнкі, нават у першыя дні збору подпісаў «ужо вельмі весела».

«Перакананы: які б выбар ні зрабіў беларускі народ на карысьць тых ці іншых кандыдатаў, гэта будзе выбар курсу на далейшае будаўніцтва сувэрэннай дзяржавы, эвалюцыйнае разьвіцьцё і прымнажэньне нашых дасягненьняў», — падкрэсьліў Лукашэнка.

Пра перадвыбарную вакханалію

Пазьней, прызначаючы новых беларускіх амбасадараў, кіраўнік дзяржавы зьвярнуў увагу, што калі падчас парлямэнцкай кампаніі будуць «крытыкаваць і наносіць ўдары па нейкіх людзям», то гэта будуць ўдары з далёкім прыцэлам — па прэзыдэнце.

«Так і адбываецца цяпер. Часам б’юць незаслужана, непрыстойна, несумленна, цэлячы ў прэзыдэнта. Я да гэтага гатовы. Хачу, каб вы ведалі, што мы ня можам дазволіць расхістаць краіну. Каму гэта хочацца зрабіць, вы ведаеце», — адзначыў ён, дадаўшы, што беларусы пачалі здаваць іспыт у палітыцы.

«Сёньняшняя перадвыбарная вакханалія, інакш яе не назавеш, перад парлямэнцкімі выбарамі кажа пра тое, што гэта проста рэпэтыцыя прэзыдэнцкіх выбараў. Нам паспрабуюць не дазволіць спакойна прайсьці гэтыя пэрыяды. А мы павінны правесьці так, як мае быць. У краіне кіраванай для сябе мы павінны правесьці гэтыя выбары. І калі мы вызначыліся, што будзем дзейнічаць так, так і так, тактыка такая, мы павінны яе прытрымлівацца».

Парлямэнцкія выбары-2019 у Беларусі. Што варта ведаць

Выбары ў Палату прадстаўнікоў сёмага скліканьня — ніжнюю палату Нацыянальнага сходу — пройдуць 17 лістапада. Датэрміновае галасаваньне будзе ісьці ад 12 да 16 лістапада.

  • Агулам у Палату прадстаўнікоў абіраецца 110 дэпутатаў. Дэпутаты ніжняй палаты выбіраюцца паводле выбарчых акругаў, а не партыйных сьпісаў. Праўладная «Белая Русь» прапаноўвала выбіраць прынамсі палову дэпутатаў паводле партыйных сьпісаў (як, напрыклад, ва Ўкраіне), але ўлады гэтую ідэю адхілілі.
  • Галасаваць на выбарах у Палату маюць права усе паўналетнія грамадзяне Беларусі. Галасаваньне добраахвотнае і ня можа быць прымусовым. Скардзіцца на прымус да галасаваньня можна ў пракуратуру ці ў райвыканкамы.
  • Цяперашнія выбары адбываюцца датэрмінова, хоць фармальна датэрміновымі ня лічацца. Тэрмін паўнамоцтваў дэпутатаў Палаты прадстаўнікоў — 4 гады. Але калі паміж выбарамі 2012 і 2016 гадоў прайшло 1449 дзён (3 гады, 11 месяцаў і 19 дзён), то паміж выбарамі 2016 і 2019-га пройдзе ўсяго 1162 дні (3 гады, 2 месяцы і 6 дзён).
  • Выбары ў Савет Рэспублікі — верхнюю палату Нацыянальнага сходу — адбудуцца 7 лістапада без удзелу звычайных беларусаў. Па 8 дэпутатаў ад вобласьці і яшчэ 8 ад Менску выберуць на абласных сходах дэпутаты гарадзкіх і раённых саветаў, яшчэ 8 дэпутатаў мае права прызначаць (але звычайна прызначае ня ўсіх) асабіста Аляксандар Лукашэнка.
  • Лукашэнка першапачаткова прапаноўваў правесьці выбары ў Палату на 7 лістапада — Дзень Кастрычніцкай рэвалюцыі. Старшыня ЦВК Лідзія Ярмошына тлумачыла, што гэтак ня варта рабіць. Урэшце на гэты дзень прызначылі выбары ў Савет Рэспублікі.
  • Фракцый у Палаце прадстаўнікоў няма. Апазыцыя амаль не трапляе ў Нацыянальны сход. Так, у Палаце прадстаўнікоў шостага скліканьня толькі 2 са 110 дэпутатаў — не прыхільнікі Лукашэнкі: Ганна Канапацкая з Аб’яднанай грамадзянскай партыі і беспартыйная Алена Анісім, старшыня Таварыства беларускай мовы. У Савеце Рэспублікі апазыцыі няма.
  • Нацыянальны сход дзейнічае з 1996 году — пасьля таго як Лукашэнка распусьціў Вярхоўны Савет XIII скліканьня. Выбары дэпутатаў Нацыянальнага сходу першага скліканьня не праводзіліся, Лукашэнка проста прызначыў туды ляяльных яму дэпутатаў Вярхоўнага Савету.
  • Нацыянальны сход амаль не распрацоўвае законапраектаў (часьцей гэта робяць міністэрствы і ведамствы) і амаль ніколі не галасуе супраць. Рэкорд шостага скліканьня Палаты прадстаўнікоў — 10 галасоў (9%) супраць звужэньня паўнамоцтваў сваёй палаты.
  • Краіны Заходняй Эўропы і ЗША не прызнавалі свабоднымі і дэмакратычнымі ніякія выбары і рэфэрэндумы ў Беларусі пасьля 1994 году. На ўсіх выбарах назіральнікі адзначалі шматлікія парушэньні, пасьля давалі рэкамэндацыі, але Лукашэнка прасіў яго «не павучаць».
  • На выбары 17 лістапада зьбіраюцца выстаўляць кандыдатаў прынамсі 7 апазыцыйных партыяў і шэраг рухаў. На ранейшых выбарах далёка ня ўсіх апазыцыянэраў рэгістравалі кандыдатамі або чальцамі выбарчых камісій.
  • Выбары каштуюць бюджэту каля 23 млн беларускіх рублёў. Лукашэнка кажа, што выбары «павінны прайсьці як сьвята», а Нацыянальны сход мае стаць «дыскусійнай пляцоўкай для дыялёгу дэпутатаў з рознымі поглядамі». Старшыню ЦВК Лідзію Ярмошыну «палохала цішыня» вакол выбараў, а 99% беларусаў лічаць, што ня могуць паўплываць на органы ўлады.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Вам можа яшчэ спадабацца

XS
SM
MD
LG