Падчас сустрэчы з кіраўніком ураду Расеі Дзьмітрыем Мядзьведзевым Аляксандар Лукашэнка агучыў графік сустрэч з Уладзімірам Пуціным.
Аляксандар Лукашэнка перад цырымоніяй адкрыцьця II Эўрапейскіх гульняў сустрэўся з кіраўніком ураду Расеі Дзьмітрыем Мядзьведзевым, які прыехаў у Менск, паведамляе БелТА.
Сярод іншага, Аляксандар Лукашэнка распавёў, калі будзе сустракацца з Уладзімірам Пуціным. Сьпярша Пуцін мае прыехаць на закрыцьцё Эўрагульняў, а пасьля яны разам плянуюць памаліцца на Валааме.
«І ўжо калі ў нас будзе форум рэгіёнаў на радзіме ў вас (у сярэдзіне ліпеня ў Санкт-Пецярбургу), мы зь ім паедзем на Валаам маліцца. І там дадаткова абмяркуем. Вось такі прыкладна быў плян. Гэта намёткі толькі. Там усё будзе залежаць ад таго, як будуць складацца графікі прэзыдэнтаў, перш за ўсё прэзыдэнта Расеі», — сказаў Аляксандар Лукашэнка.
Дзьмітры Мядзьведзеў падчас свайго візыту павінен таксама ацаніць працу сумеснай расейска-беларускай групы, якая працуе над вырашэньнем праблемных пытаньняў расейска-беларускіх адносінаў.
Беларуска-расейскі «нафтавы канфлікт». Асноўнае
- 11 красавіка 2019 году Аляксандар Лукашэнка прыгразіў закрыць на рамонт нафтаправод, па якім расейская нафта ідзе ў Эўропу. Гэтак ён адрэагаваў на абмежаваньні, якія Расея ўвяла на імпарт прадуктаў харчаваньня зь Беларусі.
- Гаворка ідзе пра паўднёвую галіну нафтаправоду «Дружба», апэратар якой — ААТ «Гомельтранснафта Дружба». Па ёй ідзе транзыт расейскай нафты ў Польшчу, Украіну, Вугоршчыну, Нямеччыну.
- 21 красавіка Беларусь прыняла рашэньне часова абмежаваць экспарт нафтапрадуктаў, бо беларускія НПЗ атрымалі партыю няякаснай расейскай нафты: узровень хлярыдаў вырас у 20 і больш разоў, сьцьвярджае афіцыйны Менск. На Мазырскім НПЗ заявлі, што няякасная нафта пашкодзіла дарагое абсталяваньне.
- Расейскі бок прызнаў факт пастаўкі няякаснай нафты.
- Беларускі бок заяўляе, што страты ад спыненьня паставак могуць скласьці некалькі сотняў мільёнаў даляраў.
- 23 красавіка намесьнік гендырэктара Беларускай нафтавай кампаніі (БНК) Сяргей Грыб паведаміў, што празь няякасную расейскую нафту Беларусь вымушана прыпыніла экспарт сьветлых нафтапрадуктаў (бэнзін і дызпаліва) ва Ўкраіну, Польшчу і краіны Балтыі.
- Таксама Грыб заявіў, што Беларусь гатовая да канца году пачаць альтэрнатыўныя расейскай пастаўкі нафты: адзін з варыянтаў — праз марскія парты краінаў Балтыі, другі — праз Адэсу і нафтправод Адэса—Броды на Мазырскі НПЗ.
- Пытаньні да якасьці расейскай нафты паўсталі на фоне спрэчак Беларусі і Расеі, калі Масква адхіліла прапанову Менску павялічыць тарыф на транзыт нафты адразу на 23,1% у сувязі з захадамі экалягічнай бясьпекі.
-
26 красавіка расейцы завялі крымінальную справу аб забруджваньні нафты. Меркавана, хлёрарганіку ўкінулі праз прыватны трубаправод у Самарскай вобласьці.
27 красавіка прэмʼер-міністар Расеі Дзьмітры Мядзьведзеў загадаў цягам 7 дзён пакараць адказных за забруджаньне нафты ў трубапровадзе «Дружба».
- 20 стузеня 2020 году Беларусь дамовілася з расейскім бокам пра падыходы і мэтодыку кампэнсацыі за забруджаную нафту
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў