Няякасная расейская нафта прывяла да выхаду са строю дарагога абсталяваньня на Мазырскім НПЗ, паведамілі БелТА на прадпрыемстве.
«На працягу апошніх некалькіх дзён Мазырскі НПЗ перапрацоўвае нафту гатунку Urals з высокай колькасьцю хлёрарганікі, якая мае падвышаную каразійную актыўнасьць. Дрэнная якасьць сыравіны, якая перапрацоўваецца, адбілася на рабоце абсталяваньня», — адзначылі на прадпрыемстве.
20 красавіка на Мазырскім НПЗ выявілі пропускі цеплаабменных трубак паветранага халадзільніка ХК-105. Трубкі дэмантавалі і пачалі рамантаваць. Папярэдняе абсьледаваньне адмысловай камісіі выявіла іх каразійнае разбурэньне.
На заводзе падкрэсьлілі, што, нягледзячы на праблемы, Мазырскі НПЗ «па-ранейшаму выпускае таварную прадукцыю, якая адпавядае міжнародным стандартам якасьці».
21 красавіка беларускі канцэрн «Белнафтахім» заявіў пра часовае абмежаваньне экспартных паставак нафтапрадуктаў у сувязі з пагаршэнньем якасьці расейскай сыравіны.
Пытаньні да якасьці расейскай нафты паўсталі на фоне спрэчак Беларусі і Расеі, калі Менск захацеў павысіць тарыф на прапампоўваньне нафты па сваёй тэрыторыі на 23,1%. Усьлед за абмежаваньнямі, якія Расея ўвяла на імпарт прадуктаў харчаваньня зь Беларусі, Аляксандар Лукашэнка прыгразіў закрыць на рамонт нафтаправод, па якім расейская нафта ідзе ў Эўропу.
19 красавіка канцэрн «Белнафтахім» заявіў пра «рэзкае пагаршэньне» якасьці расейскага гатунку нафты Urals, якая паступае транзытам па нафтаправодзе «Дружба», што, на думку «Белнафтахіму», пагражае шкодай для беларускіх нафтаперапрацоўчых заводаў.
20 красавіка ў «Белнафтахіме» паведамлялі, што будуць дамагацца ад расейскай «Транснефти» кампэнсацый. Аднак называць дакладную суму шкоды старшыня канцэрну «Белнафтахім» Андрэй Рыбакоў ня стаў, паколькі яе «складана падлічыць»: наступствы могуць адбыцца не адразу, а праявіцца з часам. «Гэта як мінімум дзясяткі мільёнаў даляраў, шкода можа вылічацца многімі сотнямі мільёнаў даляраў», — казаў Рыбакоў.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў