Лінкі ўнівэрсальнага доступу

Старшыня Берасьцейскага гарвыканкаму сустрэўся з праціўнікамі акумулятарнага заводу. ВІДЭА


Мітынг «Берасьцейцы супраць сьвінцу» — супраць пабудовы акумулятарнага заводу «АйПаўэр», красавік 2018
Мітынг «Берасьцейцы супраць сьвінцу» — супраць пабудовы акумулятарнага заводу «АйПаўэр», красавік 2018

На плошчы Леніна ў Берасьці 9 чэрвеня чарговы раз сабраліся праціўнікі будаўніцтва акумулятарнага завода. Пратэстоўцаў запрасілі на сустрэчу са старшынём берасьцейскага гарвыканкаму Аляксандрам Рагачуком. Пасьля сустрэчы пратэстоўцы прайшлі па Берасьцю шэсьцем.

Пратэстоўцаў у залі абласнога савета Фэдэрацыі прафсаюзаў Беларусі здымалі людзі ў цывільным. Скасаваць апэратыўныя здымкі Рагачук адмовіўся.

Пратэстоўцы патрабавалі закрыць завод і спыніць працэс пусканаладкі.

Што сказаў кіраўнік Берасьця?

  • Рагачук прызначыў сустрэчу пратэстоўцаў са старшынём Берасьцейскага аблвыканкаму Анатолем Лісам на 12 чэрвеня. Спачатку Рагачук казаў, каб пратэстоўцы абралі 10 прадстаўнікоў. Пазьней сказаў, што колькасьць прадстаўнікоў вызначыць Ліс.
  • Кіраўнік Берасьця заявіў, што працэс пусканаладкі заводу зацягнуўся. Неабходна вызначыць максымальны тэрмін пусканаладкі. Нельга, каб зацягваньне працэсу пусканаладкі «забрудзіла ўсё навокал».
  • «Калі раней мы меркавалі, што можа быць кепска, цяпер мы рэальна бачым, дакумэнты гэта пацьвярджаюць. Меры будуць прынятыя».

Пратэсты супраць акумулятарнага заводу ў Берасьці. Што важна ведаць

Месцазнаходжаньне новага акумулятарнага заводу пад Берасьцем
Месцазнаходжаньне новага акумулятарнага заводу пад Берасьцем
  • Завод пабудавалі каля вёсак Хабы, Шчэбрын і Тэльмы-2, што пад Берасьцем. За два кілямэтры — рака Мухавец. Афіцыйная экалягічная экспэртыза прагназавала, што ўзьдзеяньне заводу на асяродзьдзе і чалавека будзе нязначнае. Аднак людзі ўсё роўна баяцца, што выкіды з заводу падарвуць ім здароўе.
  • Пратэсты супраць акумулятарнага заводу ў Берасьці трывалі ад пачатку 2018 году, калі людзі даведаліся пра будоўлю. Праціўнікі заводу лічаць вытворчасьць «бруднай» і небясьпечнай, заяўляюць пра парушэньні працэдураў будаўніцтва.
  • Актывісты сабралі больш за 37 тысяч подпісаў супраць заводу ды накіравалі іх у адміністрацыю Лукашэнкі ў лютым 2018 году. Аднак урадавая камісія ня выявіла парушэньняў у рэалізацыі праекту па будаўніцтве заводу.
  • У траўні 2018 году актывісты накіравалі ў адміністрацыю прэзыдэнта больш за 2,5 тысячы подпісаў за адстаўку чыноўнікаў Берасьця, бо тыя «ігнаруюць інтарэсы жыхароў Берасьцейскага рэгіёну і сьвядома заплюшчваюць вочы на шкоду ад заводу».
  • У верасьні 2018 году на будоўлі заводу выявілі парушэньні пажарнай бясьпекі.
  • У чэрвені 2019 году падчас пусканаладачных работ на заводзе зафіксавалі перавышэньне забруджвальных выкідаў у атмасфэрнае паветра.
  • 14 чэрвеня старшыня Берасьцейскага аблвыканкаму Анатоль Ліс прыпыніў будаўніцтва заводу да ліквідацыі выяўленых парушэньняў.
  • У ліпені 2019 праект акумулятарнага завода атрымаў адмоўнае заключэньне дзяржаўнай экалягічнай экспэртызы, У Мінпрыроды паведамілі, што прычынай стала прадстаўленьне недакладных дадзеных. У жніўні праектную дакумэнтацыю паўторна падалі на экспэртызу, але пазьней кампанія адклікала дакумэнты «па прычыне неабходнасьці ўсебаковага і больш поўнага адлюстраваньня інфармацыі аб унесеных зьменах».
  • 24 лютага 2020 году праектную дакумэнтацыю акумулятарнага завода пасьля карэкціроўкі зноў падалі на дзяржаўную экалягічную экспэртызу. Грамадзкая экспэртыза, якую даручаў правесьці Лукашэнка, правалілася.
  • 22 чэрвеня 2020 году Лукашэнка пааабяцаў правесьці рэфэрэндум наконт лёсу заводу пасьля прэзыдэнцкіх выбараў.
  • 15 сакавіка 2021 году завод увялі ў эксплюатацыю. У правядзеньні рэфэрэндуму актывістам адмовілі.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG