Лінкі ўнівэрсальнага доступу

Берасьцейскі аблвыканкам: Акумулятарны завод будзе адкрыты ў траўні


Акцыя праціўнікаў будаўніцтва акумулятарнага заводу ў Берасьці, 7 красавіка
Акцыя праціўнікаў будаўніцтва акумулятарнага заводу ў Берасьці, 7 красавіка

Старшыня Берасьцейскага аблвыканкаму Анатоль Ліс заявіў падчас сустрэчы са студэнтамі Палескага дзяржаўнага ўнівэрсытэту, што акумулятарны завод пад Берасьцем «будзе адкрыты ўжо ў траўні».

«Гэта сур’ёзны інвэстыцыйна-інавацыйны праект, у рэалізацыю якога ўкладзеныя велізарныя грошы», — цытуе Анатоля Ліса media-polesye.by.

Паводле Анатоля Ліса, праект прайшоў усе экспэртызы, уключна з экалягічнай.

«Ніхто не дазволіў бы будаўніцтва заводу, які б уплываў на экалёгію гораду, тым больш абласнога цэнтру. Сёньня ў Польшчы, Нямеччыне такія заводы працуюць. А мы купляем там акумулятары за валюту. Што мы, дурнейшыя за іх, свае ня можам зрабіць?» — сказаў старшыня Берасьцейскага аблвыканкаму.

Пра лідэраў пратэстаў супраць будаўніцтва акумулятарнага заводу Анатоль Ліс сказаў, што яны зарабляюць сабе палітычны капітал, рыхтуюцца да маючых адбыцца выбараў у прадстаўнічыя органы ўлады.

7 красавіка жыхары Берасьця, якія выступаюць супраць будаўніцтва акумулятарнага заводу пад горадам, выйшлі на штотыднёвую акцыю пратэсту на плошчы Леніна — несанкцыянаванае «кармленьне галубоў». Яны скандавалі лёзунг «Не — заводу!».

Пратэсты супраць акумулятарнага заводу ў Берасьці. Што важна ведаць

Месцазнаходжаньне новага акумулятарнага заводу пад Берасьцем
Месцазнаходжаньне новага акумулятарнага заводу пад Берасьцем
  • Завод пабудавалі каля вёсак Хабы, Шчэбрын і Тэльмы-2, што пад Берасьцем. За два кілямэтры — рака Мухавец. Афіцыйная экалягічная экспэртыза прагназавала, што ўзьдзеяньне заводу на асяродзьдзе і чалавека будзе нязначнае. Аднак людзі ўсё роўна баяцца, што выкіды з заводу падарвуць ім здароўе.
  • Пратэсты супраць акумулятарнага заводу ў Берасьці трывалі ад пачатку 2018 году, калі людзі даведаліся пра будоўлю. Праціўнікі заводу лічаць вытворчасьць «бруднай» і небясьпечнай, заяўляюць пра парушэньні працэдураў будаўніцтва.
  • Актывісты сабралі больш за 37 тысяч подпісаў супраць заводу ды накіравалі іх у адміністрацыю Лукашэнкі ў лютым 2018 году. Аднак урадавая камісія ня выявіла парушэньняў у рэалізацыі праекту па будаўніцтве заводу.
  • У траўні 2018 году актывісты накіравалі ў адміністрацыю прэзыдэнта больш за 2,5 тысячы подпісаў за адстаўку чыноўнікаў Берасьця, бо тыя «ігнаруюць інтарэсы жыхароў Берасьцейскага рэгіёну і сьвядома заплюшчваюць вочы на шкоду ад заводу».
  • У верасьні 2018 году на будоўлі заводу выявілі парушэньні пажарнай бясьпекі.
  • У чэрвені 2019 году падчас пусканаладачных работ на заводзе зафіксавалі перавышэньне забруджвальных выкідаў у атмасфэрнае паветра.
  • 14 чэрвеня старшыня Берасьцейскага аблвыканкаму Анатоль Ліс прыпыніў будаўніцтва заводу да ліквідацыі выяўленых парушэньняў.
  • У ліпені 2019 праект акумулятарнага завода атрымаў адмоўнае заключэньне дзяржаўнай экалягічнай экспэртызы, У Мінпрыроды паведамілі, што прычынай стала прадстаўленьне недакладных дадзеных. У жніўні праектную дакумэнтацыю паўторна падалі на экспэртызу, але пазьней кампанія адклікала дакумэнты «па прычыне неабходнасьці ўсебаковага і больш поўнага адлюстраваньня інфармацыі аб унесеных зьменах».
  • 24 лютага 2020 году праектную дакумэнтацыю акумулятарнага завода пасьля карэкціроўкі зноў падалі на дзяржаўную экалягічную экспэртызу. Грамадзкая экспэртыза, якую даручаў правесьці Лукашэнка, правалілася.
  • 22 чэрвеня 2020 году Лукашэнка пааабяцаў правесьці рэфэрэндум наконт лёсу заводу пасьля прэзыдэнцкіх выбараў.
  • 15 сакавіка 2021 году завод увялі ў эксплюатацыю. У правядзеньні рэфэрэндуму актывістам адмовілі.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG