Нацыянальны і ўнутрысеткавы роўмінг будзе скасаваны ў Расеі ад 1 ліпеня 2019 году. Указ Уладзіміра Пуціна вызначае, што на ўсёй тэрыторыі Расеі апэратары сувязі маюць прапаноўваць аднолькавыя ўмовы абанэнтам, незалежна ад таго, дзе на тэрыторыі краіны яны знаходзяцца.
Гэта тычыцца ў тым ліку выпадкаў, калі абанэнт на тэрыторыі Расеі пераключаецца з аднаго апэратара на роўмінг празь іншага апэратара, бо «свой» апэратар не працуе ў пэўным рэгіёне. Як гэта будзе рэалізавана ў акупаваным Расеяй украінскім Крыме, дзе не працуюць асноўныя расейскія апэратары, невядома.
Пакуль жа ў Расеі апэратары могуць рабіць (і робяць) асобныя тарыфы для «хатняга» рэгіёну і асобныя — для астатніх. Гэта значыць, патэлефанаваць са Смаленску ў Сыбір адчувальна даражэй, чым са Смаленску ў Бранск.
Указ не рэгулюе нейкім новым чынам тарыфы на інтэрнэт — толькі на «радыётэлефонную сувязь». Таксама не мяняюцца тарыфы на міжнародныя тэлефанаваньні, у тым ліку ў межах так званай «Саюзнай дзяржавы».
Беларусь і Расея ўжо шмат гадоў плянуюць скасаваць плату за роўмінг між сабой. Год таму казалі, што плату зьменшаць, але не скасуюць зусім, пасьля перадумалі. Апошні раз скасаваць роўмінг абяцалі ў кастрычніку 2018 году: праз год-паўтара. Але ў сьнежні на нарадзе з прадстаўнікамі Расеі старшыня беларускай Палаты прадстаўнікоў Уладзімер Андрэйчанка абураўся:
«Мы хочам пачуць не тлумачэньне, што там трафік дарагі, а што вы зробіце, каб выканаць даручэньне прэзыдэнтаў».
Пляны пакуль такія: у лютым 2019 году між Беларусьсю і Расеяй будуць вызначаныя «сымэтрычныя стаўкі» на тарыфы пропуску трафіку, затым тарыфы будуць зьніжаныя, урэшце зьведзеныя да нуля для абанэнтаў. Калі менавіта адбудзецца зьніжэньне тарыфаў, не ўдакладняецца.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў