Лінкі ўнівэрсальнага доступу

У Пуціна няма смартфона, бо гэта «эксгібіцыянізм», — прэс-сакратар


Уладзімір Пуцін, архіўнае фота
Уладзімір Пуцін, архіўнае фота

Сам Пуцін прызнаваўся, што ня мае смартфона, у мінулым лютым. А Лукашэнка тыдзень таму нібыта казаў, што і кампутарам не карыстаецца.

Напярэдадні прэсавай канфэрэнцыі Ўладзіміра Пуціна ягоны прэс-сакратар Дзьмітрый Пяскоў расказаў у эфіры тэлеканалу «Россия-24», што Пуцін ня мае смартфона.

«Вы не забывайце, што мець смартфон — гэта такі эксгібіцыянізм, добраахвотны прычым, — заявіў Пяскоў. — Гэта поўная празрыстасьць, і вы загадзя, беручы ў рукі смартфон, лічыце, што вы ставіце птушачку, што „я гатовы выстаўляць усё на ўсеагульны паказ“».

На думку Пяскова, смартфона «не павінна быць у прэзыдэнта, тым больш такой краіны, як Расея, і ў такога прэзыдэнта, як Пуцін». Ён перакананы, што «старыя добрыя тэлефоны закрытай урадавай сувязі ўсе смартфоны перажывуць».

Кіраўнікі іншых дзяржаваў, у тым ліку «Вялікай сямёркі», карыстаюцца смартфонамі (напрыклад, прэзыдэнт ЗША Дональд Трамп мае iPhone). Праўда, у мэтах бясьпекі апаратам абмяжоўваюць магчымасьці, каб зламысьнікі не маглі скарыстацца «дзіркамі» ў абароне прылад.

Аляксандар Лукашэнка за апошнія два дзясяткі гадоў ні разу ня быў заўважаны з мабільным тэлефонам. Расейскія СМІ перадавалі з сустрэчы з Лукашэнкам 14 сьнежня, што ён казаў, што «ня мае айфона ў кішэні», бо «калі б вы ведалі, што такое айфон і якія ў яго ёсьць магчымасьці сачыць за вамі, вы б таксама ім не карысталіся». Таксама расейскія СМІ перадавалі словы Лукашэнкі, што ён «нават у кампутар рэдка залазіць».

Два гады таму Лукашэнка разважаў пра «ўсялякія гаджэты, айфоны, пляфоны» і скардзіўся на сына Мікалая: «дзьве хвіліны па вучобе інфармацыю шукае і гадзіну гуляе ў танкі».

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG