Ад сёньняшняга дня пастаянную выставу ў Музэі польскіх габрэяў у Варшаве POLIN можна наведаць з аўдыёгідам на беларускай мове. Пра гэта гаворыцца на профілі Катэдры беларусістыкі Варшаўскага ўнівэрсытэту.
Першымі карыстальнікамі беларускамоўнага аўдыёгіду стануць пасол Беларусі ў Варшаве Аляксандар Авяр’янаў і дырэктар Культурнага цэнтру Беларусі ў польскай сталіцы Міхаіл Рыбакоў.
Беларуская вэрсія аўдыёгіду Музэю POLIN стала адзінаццатай мовай музэю. Да гэтага часу аўдыгіды былі даступныя на польскай, ангельскай, габрэйскай, ідыш, францускай, нямецкай, расейскай, гішпанскай, італьянскай і вугорскай мовах.
Спонсарам аўдыгіду на беларускай мове стала Пасольства Беларусі ў Польшчы. За грошы МЗС Беларусі быў зроблены пераклад і запіс.
Музэй гісторыі польскіх габряэў POLIN працуе ў Варшаве ўжо два гады. Яго восем інтэрактыўных галерэяў распавядаюць пра жыцьцё габрэяў на польскіх землях ад Сярэднявечча да нашых дзён. Летась ён атрымаў званьне Эўрапейскі музэй году.