Лінкі ўнівэрсальнага доступу

Жамчужнага будуць судзіць 23 кастрычніка


Міхаіл Жамчужны
Міхаіл Жамчужны

23 кастрычніка Вярхоўны суд будзе разглядаць касацыйную скаргу заснавальніка грамадзкай арганізацыі «Плятформа інавэйшн» 60-гадовага жыхара Віцебску Міхаіла Жамчужнага ў закрытым рэжыме.

Пра гэта сябру праваабарончага цэнтру «Вясна» Тацяне Равяцы паведаміла прэс-сакратар Вярхоўнага суду Юлія Ляскова.

«Справа ў судзе першай інстанцыі слухалася ў закрытым судовым пасяджэньні (матыў — утрыманьне сакрэтных зьвестак). У касацыі справа слухацца будзе ў закрытым судовым пасяджэньні з той жа прычыны. Рэзалютыўная частка будзе агалошвацца публічна», — сказала Юлія Ляскова.

На ўдакладненьне, ці зможа праваабаронца прысутнічаць на абвяшчэньні рэзалютыўнай часткі, прадстаўніца Вярхоўнага суду патлумачыла, што ў межах сваёй кампэтэнцыі дакладна сьцьвярджаць нічога ня можа, аднак параіла «прыходзіць і чакаць».

Раней разгляд касацыйнай скаргі быў прызначаны на 6 кастрычніка, аднак быў перанесены. Пракурор унёс пратэст і запатрабаваў для Міхаіла Жамчужнага большага пакараньня, чым тое, што прысудзіў суд першай інстанцыі.

У такой сытуацыі ў судовым паседжаньні павінен прысутнічаць сам асуджаны, які на той момант ня быў этапаваны зь Віцебску ў менскае СІЗА № 1.

10 ліпеня сёлета Міхаіл Жамчужны быў асуджаны Віцебскім абласным судом на 6 гадоў калёніі строгага рэжыму. Ён быў абвінавачаны па некалькіх артыкулах Крымінальнага кодэксу — арт. 376 (ч.1, ч.2), арт. 375 (ч.1), арт. 431 (ч.1, ч.2). Гэта наўмыснае раскрыцьцё зьвестак, якія складаюць службовую тайну, незаконнае набыцьцё (выраб) сродкаў для сакрэтнага атрыманьня інфармацыі, якая складае службовую таямніцу, а таксама даваньне хабару. Праз закрытасьць судовага працэсу Праваабарончы цэнтар «Вясна» ня мае дастатковай інфармацыі, каб даць ацэнку справе Міхаіла Жамчужнага.

Паводле Тацяны Равякі, пытаньне аб прызнаньні Жамчужнага палітвязьнем застаецца адкрытым.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG