У новым тысячагодзьдзі надзвычай абвастрылася супрацьстаяньне бакоў, якія маюць палярныя пункты гледжаньня на забудову і адбудову беларускай сталіцы. На тле працэсу зьнішчэньня неацэнных архітэктурных комплексаў у гістарычнай частцы Менска, які адбываецца з маўклівай згоды вышэйшага кіраўніцтва краіны і з санкцыі гарадзкіх уладаў, нацыянальна сьвядомая частка грамадзтва ня толькі спрабуе абараніць яшчэ ацалелыя помнікі старасьветчыны, але і прапануе свае варыянты разьвязаньня праблемы.