Лінкі ўнівэрсальнага доступу

Лукашэнка прапанаваў не забіраць у войска адзінае дзіця ў сям’і і прызначыў новага начальніка ў Печах


Ілюстрацыйнае фота

Аляксандар Лукашэнка прызначыў Уладзіслава Будзіка начальнікам 72-га гвардзейскага аб’яднанага навучальнага цэнтру падрыхтоўкі Ўзброеных сілаў, перадае БЕЛТА.

Уладзіслаў Будзік — палкоўнік, былы начальнік упраўленьня службы войскаў Узброеных сілаў Беларусі. Лукашэнка паабяцаў яму, што раней ці пазьней прыедзе ў Печы.

Палкоўнік Уладзіслаў Будзік, архіўнае фота
Палкоўнік Уладзіслаў Будзік, архіўнае фота

Таксама Лукашэнка пракамэнтаваў справу Аляксандра Коржыча, які загінуў у гэтым цэнтры:

Усялякае ў войску бывае, але ў беларускім войску гэта катастрофа, таму што мы заўсёды ганарыліся, што ў нас адсутнічае дзедаўшчына.

«Тое, што адбылося ў вашай частцы, гэта катастрофа, — сказаў Аляксандар Лукашэнка Будзіку. — Я не перабольшваю. Усялякае ў войску бывае, але ў беларускім войску гэта катастрофа, таму што мы заўсёды ганарыліся, што ў нас адсутнічае дзедаўшчына. Яно сапраўды так.

Я далёкі ад таго, каб гэтая пляма легла на ўсё войска, як там некаторыя нашы апанэнты папісвалі ў інтэрнэце. Гэта войска. Зразумела, што гэта адмысловая, суворая служба, і яна заўсёды будзе такой. Але дзедаўшчына непрымальная».

Зьвярнуўшыся да міністра абароны Андрэя Раўкова, Лукашэнка сказаў:

«Я спадзяваўся, што вы з гэтымі пытаньнямі справіцеся, а вы іх ня бачылі пад бокам, у Барысаве. Гэта катэгарычна непрымальна. Ніколі не было такой плямы на войску, як у сувязі з гэтым».

Ён прыгразіў вайсковым начальнікам, што калі падобныя выпадкі будуць паўтарацца, «потым і разьбірацца ня будзе».

Паводле Лукашэнкі, прыклад таго, «як трэба з моладзьдзю размаўляць», варта браць з МУС, бо ў структуры МУС «дзедаўшчыны не адзначаецца», бо там па-людзку ставяцца да людзей і «амапаўцы, дзякуй богу, падрыхтаваныя».

Не забіраць у войска адзінага сына ў сям’і

Лукашэнка прапанаваў часьцей адпускаць хлапцоў з «вучэбкі» дамоў («раз-два на месяц») і не прызываць у войска мужчыну, калі ён — адзінае дзіця ў сям’і, бо «адзіны сын — адзіная апора, надзея». Але Лукашэнка мяркуе, што многія бацькі з задавальненьнем аддаюць дзяцей служыць, бо войска — «добрая школа жыцьця».

«У мяне дзеці служылі ў спэцпадразьдзяленьнях і поўзалі на мяжы так, як мае быць, — дадаў Лукашэнка. — Але яны прайшлі праз гэта».

* * *

Як разьвіваюцца падзеі ў Печах

Цела салдата тэрміновай службы Аляксандра Коржыча знайшлі 3 кастрычніка ў падвале вайсковай часткі ў Печах пад Барысавам. Паводле праверкі, якую правялі ў вайсковай частцы, прычынай сьмерці салдата нібыта стала самагубства. Але сваякі і сябры Аляксандра Коржыча з гэтай вэрсіяй не пагадзіліся і перадалі ў рэдакцыю Свабоды фатаздымкі ягонага цела са сьлядамі прыжыцьцёвых траўмаў. Справа атрымала вялікі рэзананс у грамадзтве.

13 кастрычніка Сьледчы камітэт выступіў з афіцыйнай заявай для прэсы.

Паводле прадстаўніка Сьледчага камітэту Сяргея Кабаковіча, цела Коржыча каля 17 гадзіны 3 кастрычніка знайшлі «ў пятлі з мацерчатай папругі для штаноў, прымацаванай свабодным канцом да мэталічнай арматуры пад стольлю падвала, зь перавязанымі шнурком абутку нагамі і надзетай на галаву майкай».

Яшчэ ў верасьні Коржыч быў у мэдчастцы з вострай рэсьпіраторнай інфэкцыяй, і тады яго аглядаў псыхіятар. Дыягназ быў «здаровы». Пасьля таго як Коржыча выпісалі 26 верасьня, зьвестак пра ягонае далейшае месцазнаходжаньне ў сьледчых няма.

Аляксандар Коржыч (зьлева) у войску, архіўнае фота
Аляксандар Коржыч (зьлева) у войску, архіўнае фота

Супраць старшыны роты, які скраў з карткі Коржыча ня менш за 150 рублёў і рабіў плацяжы «бязь ведама ўладальніка ў асабістых мэтах у крамах і кавярнях Барысава», распачалі крымінальную справу аб махлярстве. Сяржанты з вайсковай часткі праходзяць падазраванымі ў справе аб нестатутных адносінах, «прымаюцца рашэньні аб іх затрыманьні».

У сувязі са «справай Коржыча» завялі «каля 15» крымінальных спраў

Папярэдне разглядаюцца вэрсіі давядзеньня да самагубства празь «дзедаўшчыну», зьдзекі, гвалт, вымаганьне ці адбіраньне асабістых рэчаў і грошай; забойства з асабістых або карысьлівых матываў або праз «валоданьне зьвесткамі, якія кампрамэтуюць іншых вайскоўцаў»; самагубства праз псыхалягічную траўму або нежаданьне служыць.

Коржычавы таварышы па службе цяпер атрымліваюць пагрозы ў сацсетках. Сябры Коржыча вядуць альтэрнатыўнае расьсьледаваньне.

Адразу па здарэньні прэсавы сакратар Мінабароны Ўладзімер Макараў назваў «чуткамі і домысламі» сумневы родных і сяброў загінулага ў Печах салдата Аляксандра Коржыча ў тым, што хлопец учыніў суіцыд. Цяпер сытуацыя вакол гібелі салдата на «жорсткім кантролі» ў Аляксандра Лукашэнкі.

14 кастрычніка стала вядома, што ў сувязі са справай Аляксандра Коржыча з Узброеных сіл звольненыя чатыры службовыя асобы. Пра гэта паведаміў прэсавы сакратар Міністэрства абароны Беларусі палкоўнік Уладзімер Макараў.

«Загадам міністра абароны адхіленыя ад займаных пасадаў пяць службовых асобаў 72-га Аб’яднанага навучальнага цэнтру, чатыры службовыя асобы звольненыя з Узброеных сіл».

Раней паведамлялася, што міністар абароны адхіліў ад пасадаў камандзіра і шэраг службовых асобаў камандаваньня вайсковай часткі, дзе сёлета 3 кастрычніка знайшлі павешаным радавога Коржыча.

Усё пра гвалт у войску

Ваша меркаваньне

Паказаць камэнтары

XS
SM
MD
LG