Лінкі ўнівэрсальнага доступу

Былы кіраўнік БРСМ Бузоўскі прыйдзе на «Сьвята незалежнасьці», каб «забясьпечыць парадак»


Ігар Бузоўскі, архіўнае фота
Ігар Бузоўскі, архіўнае фота

Кіраўнік адміністрацыі Цэнтральнага раёну Менску, былы кіраўнік БРСМ Ігар Бузоўскі расказаў Tut.by, што зьбіраецца прыйсьці на менскае «Сьвята незалежнасьці» 25-га сакавіка — мітынг-канцэрт у гонар 100-й гадавіны абвяшчэньня незалежнасьці Беларускай Народнай Рэспублікі.

Канцэрт і мітынг дазволеныя менскімі ўладамі (таксама дазволены мітынг КХП БНФ у Кіеўскім сквэры 24 сакавіка, разглядаецца заяўка на шэсьце 25 сакавіка).

Ігар Бузоўскі заявіў, што пэўны час — або менавіта падчас канцэрту («калі будзе неабходны ўдзел у той час»), або да яго ці пасьля — адназначна будзе прысутнічаць.

«Я ўспрымаю гэта ня з пункту гледжаньня сваіх глядацкіх сымпатыяў ці антыпатыяў, — сказаў Бузоўскі. — Я гляджу на гэта з пункту гледжаньня таго, што гэта мерапрыемства, якое арганізоўваецца на тэрыторыі раёну. І я павінен забясьпечыць парадак у межах сваіх абавязкаў».

Раней арганізатары акцыі #БНР100 запрашалі БРСМ паўдзельнічаць у мерапрыемствах, але ў моладзевай праўладнай арганізацыі адказалі, што пакуль «маюць іншыя задачы».

***

2 сакавіка гарадзкія ўлады Менску далі дазвол на канцэрт і мітынг каля Опэрнага тэатру 25 сакавіка. На канцэрт і мітынг вядзецца народны збор грошай: на Talaka.by ужо сабралі больш за 94% неабходнай сумы, зьбіраюць сродкі і іншымі шляхамі. Бел-чырвона-белыя сьцягі дазволеныя. Надвор’е можа быць халодным, але арганізатары да гэтага гатовыя.

У рэгіёнах сьвяткаваньне стагодзьдзя БНР дазволілі пакуль у Берасьці, Горадні і Лідзе. Гарвыканкамы ў Берасьці, Менску, Горадні ўзялі на сябе арганізацыю аховы, мэдычнага абслугоўваньня і працы камунальных службаў. Сябры руху «За свабоду» чакаюць адказу на заяўкі ад уладаў Віцебску і Магілёва. Шэраг мерапрыемстваў заплянаваны за мяжой.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG