Дакумэнт накіравалі на разгляд Палаты прадстаўнікоў, паведамляе «Голас Амэрыкі». Праект рэзалюцыі падаў кангрэсмэн-дэмакрат Біл Кітынг у суаўтарстве з 25 кангрэсмэнамі ад дзьвюх вядучых партый ЗША.
Прадстаўляючы рэзалюцыю перад камітэтам, Біл Кітынг адзначыў, што яна зьяўляецца адным з дакумэнтаў, якія маюць вырашальнае значэньне як для ўнутраных, так і для міжнародных намаганьняў у прыцягненьні расейскага ўраду да адказнасьці за парушэньні правоў чалавека.
Старшыня Камітэта замежных спраў Палаты прадстаўнікоў, кангрэсмэн-рэспубліканец Майкл Маккол, заявіў, што перад прыняцьцем рэзалюцыі кангрэсмэны мелі магчымасьць заслухаць генэральнага пракурора Ўкраіны Андрэя Косьціна, а таксама на свае вочы ўбачыць ваенныя злачынствы.
«Я падтрымліваю гэтую пастанову. Мы пачулі ад генэральнага пракурора Ўкраіны аб жудасных зьверствах. У мяне была магчымасьць пабываць зь ім у Бучы, убачыць месцы масавых пахаваньняў, дзяцей, расстраляных у патыліцу, пяцігадовых, згвалтаваных да сьмерці групай Вагнэра, акупацыю тэрыторый, вываз дзяцей з дамоў, разбомбленыя радзільныя дамы і іншыя цывільныя аб’екты, парушэньні ўсіх Жэнеўскіх канвэнцый, таму я лічу спэцыяльны трыбунал дарэчным», — сказаў Маккол.
Згодна з праектам рэзалюцыі:
- Палата прадстаўнікоў Кангрэсу ЗША рашуча асуджае поўнамаштабнае ўварваньне Расейскай Фэдэрацыі ва Ўкраіну;
- падтрымлівае народ Украіны ў яго барацьбе за свабоду, незалежнасьць і дэмакратыю;
- падкрэсьлівае сувэрэнітэт і тэрытарыяльную цэласнасьць Украіны ў яе міжнародна прызнаных межах;
- лічыць, што існуюць важкія доказы таго, што асобныя лідэры Расеі вінаватыя ў зьдзяйсьненьні злачынства агрэсіі супраць Украіны, што патрабуе належнага судовага рашэньня міжнароднай супольнасьці;
- прызнае неабходнасьць стварэньня Спэцыяльнага трыбуналу ў справе аб злачынствах агрэсіі супраць Украіны;
- вызначае пагадненьне паміж Украінай і ААН пасьля станоўчага галасаваньня Генэральнай Асамблеі ААН як адзін з варыянтаў стварэньня міжнароднага трыбуналу;
- заклікае прэзыдэнта ЗША прыняць усе даступныя захады для падтрымкі стварэньня Спэцыяльнага трыбуналу для злачынстваў агрэсіі супраць Украіны.
