BBC паведамляе, што таямніца вакол лёсу Мэлісы Гайсьміт пачалася ў жніўні 1971 году, калі яе маці наняла няню, даўшы абвестку ў газэце ў горадзе Форт Ўорт у амэрыканскім штаце Тэхас. Няня зьнікла зь дзіцём, запачаткаваўшы дзесяцігодзьдзі пошукаў Мэлісы з боку сямʼі, паліцыі і фэдэральных уладаў. Прарыў у гэтай справе адбыўся 6 лістапада, калі тэст ДНК на вэб-сайце 23AndMe зьвязаў дзяцей Мэлісы Гайсьміт зь яе біялягічнымі бацькамі. Мэліса Гайсьміт і яе бацькі ўпершыню сустрэліся 26 лістапада.
Нягледзячы на тое, што тэрмін даўнасьці выкраданьня даўно мінуў, паліцыя ў Форт Ўорт заявіла, што працягне расьсьледаваньне зьнікненьня Мэлісы 51 год таму, каб разабрацца ў тым, што адбылося.
