Мэр Віталій Клічко заклікаў ашчаджаць электрычнасьць і не карыстацца прыборамі, для якіх яе трэба шмат, каб не выклікаць перагрузкі сыстэмы, пашкоджанай расейскімі абстрэламі. Таксама ён папрасіў часова пераехаць за горад кіяўлянаў, якія маюць там свае дамы з альтэрнатыўнымі крыніцамі цяпла. У Кіеве днём было не вышэй за —10°C, уначы прагназуюць да —16́°.
Расейскае войска другі дзень запар цэліла таксама па энэргетычнай інфраструктуры Крывога Рога ў Дняпрапятроўскай вобласьці. Раніцай 10 студзеня без электрычнасьці было больш за 45 тысяч абанэнтаў у горадзе і больш за 130 тысяч у вобласьці. Кіраўнік гораду прагназуе, што сьвятло і цяпло вернецца ў жытло ўсіх крыварожцаў ўжо сёньня.
У Краматорскім раёне Данецкай вобласьці ахвярай расейскіх абстрэлаў стала 68-гадовая жанчына.
У суботу расейскае войска скінула кіраваныя авіябомбы на Славянск і вёску Новаўкраінка ў Запароскай вобласьці. Паранена некалькі чалавек.
Украіна ж атакавала нафтабазу «Жутаўская» ў Валгаградзкай вобласьці Расеі, паведаміў генштаб Узброеных сілаў. Раней пра пажар ад падзеньня частак зьбітага дрона паведаміў і губэрнатар Валгаградзкай вобласьці.
Форум