Лінкі ўнівэрсальнага доступу

Эўразьвяз ня лічыць Лукашэнку прэзыдэнтам. Судовы канвэер. Што адбываецца у 38-ы дзень беларускіх пратэстаў

абноўлена

Што адбываецца у 38-ы дзень беларускіх пратэстаў супраць фальсыфікацыі прэзыдэнцкіх выбараў.


Студэнты юрыдычнага факультэту БДУ ў Менску «паказалі сучасную мадэль беларускай Фэміды», прадэманстраваўшы парушаныя артыкулы Канстытуцыі Беларусі
22:55 15.9.2020

Бел-чырвона-белы Менск. Фота

22:52 15.9.2020

Заснавальнік PandaDoc замарозіў праект па дапамозе сілавікам, які звольніліся з органаў

Заснавальнік кампаніі PandaDoc Мікіта Мікада замарозіў ініцыятыву кампаніі Protect Belarus па дапамозе супрацоўнікам сілавых ведамстваў, якія страцілі працу, бо «адмовіліся выконваць злачынныя загады». Пра гэта ён распавёў у інтэрвію BBC. Ён настойвае, што гэта было яго асабістым рашэньнем, прадыктаваным клопатам пра бясьпеку калегаў.

«Калі мэтай было спыніць дапамогу звольненым сілавікам, якую аказваў асабіста я, то так, – адказвае Мікіта на пытаньне, ці ня значыць гэта, што ўлада дасягнула сваіх мэтаў. – Я не хачу, каб яшчэ кагосьці не датычнага да маёй ініцыятывы пасадзілі ў турму». Падрабязнасьці тут.

22:50 15.9.2020

Караеў папрасіў абараніць сілавікоў, якія выступаюць сьведкамі ў судах

Міністар унутраных спраў Беларусі Юры Караеў накіраваў у пастаянную камісію Палаты прадстаўнікоў Нацыянальнага сходу зварот, у якім гаворыць пра неабароненасьць сваіх супрацоўнікаў, якія выступаюць сьведкамі падчас адміністрацыйных працэсаў. Ён адзначае, што судовыя паседжаньні зьяўляюцца адкрытымі, і «прадстаўнікі дэструктыўных сіл», СМІ і іншыя вядуць аўдыё-, фота- і відэафіксацыю працэсу. Пасьля пэрсанальныя дадзеныя сілавікоў зь іх фатаздымкамі разьмяшчаюць у інтэрнэце «з заклікамі аказаньня псыхалягічнага і фізычнага ціску на службовых асоб органаў унутраных спраў і іхных семʼяў».

З улікам сказанага Караеў прапануе шэраг захадаў дзеля забесьпячэньня бясьпекі тых, хто выступае сьведкамі на судах:

  • неразгалошваньне іх асабістай інфармацыі,
  • вызваленьне ад яўкі ў суд,
  • закрыты разгляд справы аб адміністрацыйным правапарушэньні,
  • забарона на выдачу зьвестак.

Адпаведныя зьмены ён прапануе ўнесьці ў праект Працэсуальна-выканаўчага кодэксу аб адміністрацыйных правапарушэньнях. Цалкам чытайце тут.

22:20 15.9.2020

У Магілёве асудзілі жанчыну з 30-мэтровым бел-чырвона-белым сьцягам

У Магілёве асудзілі ўдзельніцу Маршу герояў Ірыну Пятрову, якая з акцыі пратэсту несла 30-мэтровы бел-чырвона-белы сьцяг. Яе пакаралі штрафам у 405 рублёў.

Да суду жанчыну двое сутак трымалі ў ізалятары. Суд адбыўся праз скайп зь Ленінскага аддзелу міліцыі. Паведамленьня аб працэсе на дошцы аб’яваў суду, які разглядаў справу Пятровай, не было.

На жанчыну склалі тры пратаколы за ўдзел у несанкцыянаваных мерапрыемствах, аб’ядналі іх у адну справу. Доказам віны было відэа, на якім жанчына трымаецца разам з групай грамадзян за сьцяг. Падрабязнасьці па спасылцы.

22:18 15.9.2020

Амэрыканская кампанія, чыя тэхніка ўжывалася для блякаваньня інтэрнэту, скасавала кантракт зь Беларусьсю

Амэрыканская кампанія Sandvine Inc., чыя тэхналёгія ўжывалася для блякаваньня інтэрнэту, скасавала ўгоду зь Беларусьсю, заявіўшы, што ўрад выкарыстоўвае яе тэхналёгіі для парушэньня правоў чалавека, паведамляе Bloomberg.

Тэхналёгія кампаніі, якая выкарыстоўваецца для фільтрацыі і кіраваньня інтэрнэт-сеткамі, была выкарыстаная дзяржаўным інтэрнэт-агенцтвам у Беларусі для блякаваньня тысяч вэбсайтаў у краіне падчас агульнанацыянальных пратэстаў з нагоды спрэчных выбараў.

У заяве Sandvine у аўторак сказана, што папярэдняе расьсьледаваньне выявіла, што ў прадукцыю кампаніі быў усталяваны «карыстальніцкі код» «з мэтай сарваць свабодны паток інфармацыі падчас выбараў у Беларусі». «Гэта — парушэньне правоў чалавека, і гэта выклікала аўтаматычнае спыненьне нашага ліцэнзійнага пагадненьня з кліентам», — сказана ў заяве. Цалкам чытайце тут.

21:43 15.9.2020

«Стаяў катавальны аўтазак». Расказ менскага студэнта, якога жорстка зьбілі сілавікі і адрэзалі яму валасы

Аляксею Курачову 20 гадоў. Яго затрымалі ў Менску ў ноч на 13 жніўня і доўга білі — спачатку пры затрыманьні, потым у аўтазаку. Аляксей расказвае, што ў нейкі момант зрабіў выгляд, што страціў прытомнасьць, каб сілавікі перасталі яго біць. Толькі пасьля гэтага яму выклікалі хуткую. У шпіталі паставілі дыягназ: закрытая лёгкая чэрапна-мазгавая траўма, страсеньне галаўнога мозгу, сінякі, траўматычны шок 2-й ступені, пералом. Цяпер Аляксей праходзіць лячэньне ў Варшаве, пасьля аднаўленьня мае намер вярнуцца ў Менск.

Пра тое, што адбывалася зь ім і зь іншымі пратэстоўцамі ўначы 13 жніўня, Аляксей расказаў «Настоящему времени». Чытайце па спасылцы.

20:00 15.9.2020

«Пазбавілі базавых чалавечых свабодаў» — жонка Шклярава пра яго ўтрыманьне ў менскім СІЗА

Хідэр Шкляраў, супрацоўніца Дзярждэпартамэнту ЗША і жонка затрыманага ў Беларусі паліттэхноляга Віталя Шклярава, расказала BuzzFeed пра яго дрэннае самаадчуваньне. «Да Віталя ўжываюць неверагодны псыхалягічны ціск, яго пазбавілі базавых чалавечых свабодаў, каб ён абгаварыў сябе», — паведаміла яна. Яна дадала, што ёй забаранілі абменьвацца лістамі з мужам.

«У ягонай камэры кругласутачна гарыць сьвятло і гучна грае музыка, таму ён ня можа нармальна спаць. Яму дазваляюць мыцца толькі па серадах, ставячы перад ім вядро цёплай вады. Яго разьдзявалі падчас ператрусаў, прымушалі гадзінамі стаяць голым у камэры і не дазвалялі нават садзіцца на ложак на працягу дня. У яго зламаны палец на назе, але ён нават адвакату баіцца расказаць, пры якіх абставінах гэта адбылося. Лекары яго ня лечаць», — адзначыла Хідэр.

19:57 15.9.2020

Макей прызнаў, што выбары ў Беларусі прайшлі не ідэальна

«У нас прайшлі выбары, хай па некаторых высокіх канонах і не ідэальна, аднак народ сваёй большасьцю, гэта сёньня складана паставіць пад сумнеў, вызначыў іх пераможцу. Хацелася б зразумець, на якой падставе прадстаўнікі Эўразьвязу ставяць сябе ўпоравень зь беларускім народам і лічаць, што маюць права аднаасобна выносіць вэрдыкты аб прымальнасьці для беларусаў вынікаў выбараў», — заявіў кіраўнік беларускага МЗС Уладзімер Макей, камэнтуючы сёньняшні выступ кіраўніка зьнешнепалітычнай службы Эўразьвязу Жузэпа Бурэля на сэсіі Эўрапарлямэнту.

У ім Бурэль заявіў, што Эўразьвяз лічыць выбары ў Беларусі сфальсыфікаванымі — і таму лічыць Лукашэнку нелегітымным прэзыдэнтам Беларусі. Цалкам чытайце тут.

19:20 15.9.2020

Цапкала: юрысты рыхтуюць дакумэнты для прыцягненьня Лукашэнкі да адказнасьці ў судзе ў Гаазе

Група замежных юрыстаў рыхтуе дакумэнты для прыцягненьня кіраўніка Беларусі Аляксандра Лукашэнкі да адказнасьці ў міжнародным судзе Гаагі, заявіў экс-прэтэндэнт на пасаду прэзыдэнта Беларусі Валер Цапкала ў відэа, якое ён апублікаваў на сваім YouTube-канале.

«У нас ужо ёсьць група замежных юрыстаў, якія рыхтуюць усе неабходныя дакумэнты, якія будуць прадстаўленыя ў міжнародным судзе ў Гаазе», — паведаміў Валер Цапкала. Гаворка ідзе пра адказнасьць Лукашэнкі за гвалт супраць дэманстрантаў у першыя дні пратэстаў пасьля прэзыдэнцкіх выбараў 9 жніўня. Паводле Цапкалы, цяпер ідзе збор сьведчаньняў і паказаньняў пацярпелых грамадзян.

Адказваючы на пытаньне, якой павінна быць рэакцыя Захаду на тое, што адбываецца ў Беларусі, Валер Цапкала сказаў, што будзе «больш чым дастаткова», калі краіны Эўразьвязу ўвядуць супраць Лукашэнкі і яго сям’і пэрсанальныя санкцыі.

19:03 15.9.2020

Ціханоўская: «Улада перайшла чарговую мяжу прававой сваволі. За прафэсійную дзейнасьць пачалі арыштоўваць адвакатаў»

У відэазвароце ў падтрымку арыштаванага адваката Максіма Знака Сьвятлана Ціханоўская заявіла, што «беларусы могуць страціць апошнія магчымасьці абароны» — менавіта таму арышт Знака патрабуе асаблівай увагі. Яна сьцьвярджае, што арыштаваны працаваў над тым, каб працэс стварэньня і дзейнасьці Каардынацыйнай рады адбываўся ў прававым полі. Ціханоўская запатрабавала вызваліць Знака і іншых палітычных зьняволеных

18:53 15.9.2020

«У Лукашэнкі не засталося ні кроплі легітымнасьці». Амэрыканскія сэнатары падрыхтавалі рэзалюцыю аб санкцыях супраць беларускіх чыноўнікаў

Двухпартыйная група з 13 сэнатараў прадставіла рэзалюцыю, якая заклікае ўвесьці адрасныя санкцыі ў дачыненьні да беларускіх чыноўнікаў, адказных за падаўленьне мірных дэманстрацый у краіне. Санкцыі плянуецца каардынаваць з Эўрапейскім Зьвязам і іншымі міжнароднымі партнэрамі.

У тэксьце рэзалюцыі гаворыцца, што прэзыдэнцкія выбары, якія прайшлі ў Беларусі, не былі «ні свабоднымі, ні сумленнымі», а іх афіцыйныя вынікі, абвешчаныя Цэнтральнай выбарчай камісіяй, названыя несапраўднымі. Падрабязнасьці тут.

18:42 15.9.2020

Студэнт БДУІР заявіў у судзе пра катаваньні

Міхася Клачкова сёньня судзілі ў судзе Цэнтральнага раёну Менску за ўдзел у «Маршы герояў» 13 верасьня, прысудзілі арышт на 10 дзён. Задзіночаньне беларускіх студэнтаў паведамляе, што на судзе ён заявіў: супрацоўнікі Цэнтральнага РАУС зьбівалі яго, пакуль ён ня страціў прытомнасьць, каб атрымаць доступ да тэлефона. У выніку доступ атрымалі.

Суд праходзіў па відэасувязі, але выяву бачыла толькі судзьдзя — прысутныя ня ведаюць, у якім стане Міхась цяпер. Адваката запрасіць не пасьпелі — пра суд стала вядома за 40 хвілін да пачатку. Засакрэчаны сьведка-міліцыянт на судзе заявіў, што ня памятае, дзе бачыў Міхася і як той быў апрануты.

18:41 15.9.2020

Чаму не сьціхаюць пратэсты

Разважае журналіст і блогер Севярын Квяткоўскі. Сьцісла:

  • Людзі бачаць, што ўлада, спрабуючы задушыць грамадзкі пратэст, выдыхаецца і фізычна, і маральна. «Сілавікоў» не хапае на ўсіх; зь дзяржаўнай сыстэмы пачалі сыходзіць службоўцы.
  • Людзі так доўга жылі пры дыктатуры, што некалькі гадзін свабоды падчас маршу пратэсту прыносяць эўфарыю, якую хочацца адчуваць зноў.
  • Людзі разумеюць, што назад дарогі няма. Спыніцца — даць магчымасьць уладам падняць хвалю масавых рэпрэсій.

Цалкам чытайце па спасылцы.

17:58 15.9.2020

У Бабруйску сястра прыйшла на суд да брата — асудзілі і яе

Івана Хамрэнку затрымалі яшчэ 25 жніўня, склалі пратакол за ўдзел у шэсьці і адпусьцілі дамоў. Суд над ім пачаўся 9 верасьня і цягнуўся некалькі дзён. Раніцай 15 верасьня на абвяшчэньне выраку прыйшла сястра Івана, журналістка Reform.by Ірына Купцэвіч. Яе проста з будынку суду міліцыянты адвезьлі ў ГУУС на складаньне пратаколу, таксама за ўдзел у шэсьці 13 верасьня.

Тым часам Івану прысудзілі штраф 675 рублёў і проста ў залі суду затрымалі другі раз, цяпер ужо за ўдзел у шэсьці 13 верасьня.

Па абедзе над братам і сястрой адбыліся суды. Ірына Купцэвіч атрымала пакараньне ў выглядзе 270 рублёў штрафу, а Іван Хамрэнка, на дадатак да папярэдняга штрафу, — 7 сутак арышту.

17:56 15.9.2020

Беларускі суд: «Меў дамову з адвакатам — значыць, зьбіраўся парушыць закон»

11 верасьня айцішніку Паўлу Манько прысудзілі штраф у 540 рублёў за ўдзел у несанкцыянаваным масавым мерапрыемстве. Судзьдзя Жанна Хвайніцкая ў пастанове ўказала: тое, што Павал Манько заключыў дамову з адвакатам, кажа пра тое, што ён загадзя меў намер удзельнічаць у несанкцыянаваных акцыях, піша Tut.by.

У Беларускай рэспубліканскай калегіі адвакатаў адзначаюць, што «наяўнасьць папярэдне падпісанай дамовы з адвакатам сьведчыць не пра намер асобы зьдзяйсьняць правапарушэньне, а пра адваротнае: пра тое, што асоба жадае вырашаць усе магчымыя канфлікты выключна ў рамках прававога поля і законнымі мэтадамі». Да таго ж у калегіі нагадваюць, што абаронца ня можа быць дапытаны ў якасьці сьведкі па адміністрацыйнай справе адносна абставінаў, якія сталі яму вядомыя ў сувязі з выкананьнем абавязкаў абаронцы (арт. 4.6 Працэсуальна-выканаўчага кодэксу Рэспублікі Беларусь аб адміністрацыйных правапарушэньнях). Цалкам чытайце тут.

17:43 15.9.2020

Дачнікаў засьцерагаюць, каб не вывешвалі бел-чырвона-белыя сьцягі на сваіх участках

Чытачы даслалі нам лісты, якія сталі прыходзіць старшыням розных таварыстваў уласьнікаў у Заслаўі.

17:43 15.9.2020

«Самая вялікая мара — быць свабоднымі». Нобэлеўскі ляўрэат Марыё Варгас Льлёса выказаўся пра Беларусь

«Літаратура павінна быць зброяй, з дапамогай якой мы можам весьці барацьбу супраць таго, што лічым няправільным у грамадзтве», — сказаў пэруанскі празаік і драматург Марыё Варгас Льлёса ў дыскусіі, падчас якой абмяркоўвалі ролю культуры і літаратуры ў станаўленьні і абароне дэмакратыі.

Льлёса падкрэсьліў, што тое, што адбываецца ў Беларусі, а таксама ў Вэнэсуэле, Нікарагуа, на Кубе і ня толькі там, паказвае, як важна для мастацтва і літаратуры адкрываць магчымасьці, абуджаць прагу пераменаў. «Мы пачынаем марыць, — сказаў ён, — а потым пачынаем рэалізоўваць нашыя мары. І самая вялікая мара — быць свабоднымі».

17:30 15.9.2020

Старшыня Незалежнага прафсаюзу на «Белшыне» трымае галадоўку ў ізалятары

Старшыня суполкі Незалежнага прафсаюзу на «Белшыне» 56-гадовы Сяргей Гурло трымае галадоўку ў ізалятары часовага ўтрыманьня, піша інтэрнэт-выданьне «Бабруйскі кур’ер» са спасылкай на вызваленых удзельнікаў мясцовых акцыяў пратэсту супраць вынікаў выбараў. Паводле пратэстоўцаў прафсаюзны актывіст пачуваецца кепска, бо «належная мэдычная дапамога не аказваецца».

Сяргея Гурло забралі 12 верасьня з дому. Асудзілі на 5 сутак за ўдзел у несанкцыянаванай акцыі пратэсту. Жонка Алена Іванаўна ў гутарцы з карэспандэнтам Свабоды апавяла, што спрабавала сустрэцца з мужам, каб пераканаць яго спыніць галадоўку, але ёй не дазволілі пабачыцца з ім у ізалятары. У жанчыны ўзялі лекі, якія стабілізуюць ціск, ды цёплую вопратку. Ежу адмовіліся прымаць. Ахоўнікі запэўнілі яе, што «з мужам усё ў парадку і ён выйдзе раніцай 17 верасьня».

16:37 15.9.2020

Справы фотакарэспандэнтаў Васюковіча і Грыдзіна адправілі на дапрацоўку

Справы фотакарэспандэнтаў Уладзімера Грыдзіна і Рамана Васюковіча накіравалі на выпраўленьне недахопаў у РУУС. Пакуль не зразумела, ці застануцца журналісты пад вартай. Іх судзяць за несанкцыянаваную акцыю.

Уладзя Грыдзіна і Аляксандра Васюковіча затрымалі 14 верасьня а 21-й гадзіне ў менскім бары «1067» разам зь сябрам Ягорам Калягіным.

16:16 15.9.2020

Абаронцы Калесьнікавай і Знака патрабуюць спыніць іх крымінальны перасьлед

15 верасьня адвакатка Людміла Казак падала хадайніцтва аб спыненьні крымінальнага перасьледу Марыі Калесьнікавай. Абаронца лічыць, што ў публічных выступах Марыі не было заклікаў да захопу дзяржаўнай улады або ажыцьцяўленьня іншых дзеяньняў, накіраваных на прычыненьне шкоды нацыянальнай бясьпецы. Яна заявіла, што перасьлед Марыі Калесьнікавай матываваны палітычна.

Адвакат Максіма Знака Дзьмітры Лаеўскі таксама падаў хадайніцтва аб спыненьні крымінальнага перасьледу. Як лічыць Дзьмітры Лаеўскі, з боку Максіма Знака «адсутнічалі заклікі як такія, а выказваньні і камэнтары Знака ў публічнай прасторы ніяк не былі накіраваныя супраць нацыянальнай бясьпекі, ён не заклікаў да гвалтоўных дзеяньняў, а наадварот, растлумачваў права». Цалкам чытайце тут.

Загрузіць яшчэ

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG