Лінкі ўнівэрсальнага доступу

Абаронцы Калесьнікавай і Знака патрабуюць спыніць іх крымінальны перасьлед як палітычна матываваны


Марыя Калесьнікава і Максім Знак, архіўнае фота

15 верасьня адвакатка Людміла Казак падала хадайніцтва аб спыненьні крымінальнага перасьледу Марыі Калесьнікавай. Абаронца лічыць, што ў публічных выступах Марыі не было заклікаў да захопу дзяржаўнай улады або ажыцьцяўленьня іншых дзеяньняў, накіраваных на прычыненьне шкоды нацыянальнай бясьпецы.

Яна заявіла, што перасьлед Марыі Калесьнікавай матываваны палітычна. У абгрунтаваньне адвакатка падала наступныя тэзы:

  1. Усе яе выступы, выказваньні знаходзяцца ў вольным доступе ў сетцы Інтэрнэт. Іх аналіз дазваляе сьцьвярджаць аб адсутнасьці заклікаў да зьдзяйсьненьня якіх-небудзь супрацьпраўных дзеяньняў. Наадварот, у кожным з сваіх выступаў яна падкрэсьлівае аб недапушчальнасьці гвалту, зьдзяйсьненьня іншых супрацьпраўных дзеяньняў.
  2. Усе яе выказваньні знаходзяцца ў рамках гарантаванага кожнаму права на свабоду думак і ніякім чынам не парушаюць правы і свабоды іншых асоб, ня робяць замах на нацыянальную бясьпеку краіны, у сувязі з чым крымінальны перасьлед за рэалізацыю фундамэнтальнага права на свабоднае выказваньне сваёй думкі, прымяненьне да яе меры стрыманьня ў выглядзе заключэньня пад варту зьяўляецца нічым іншым, як прымусам да адмовы ад сваіх перакананьняў, што забаронена Канстытуцыяй.

Адвакат Максіма Знака Дзьмітры Лаеўскі таксама падаў хадайніцтва аб спыненьні крымінальнага перасьледу.

Як лічыць Дзьмітры Лаеўскі, з боку Максіма Знака «адсутнічалі заклікі як такія, а выказваньні і камэнтары Знака ў публічнай прасторы ніяк не былі накіраваныя супраць нацыянальнай бясьпекі, ён не заклікаў да гвалтоўных дзеяньняў, а наадварот, растлумачваў права».

Пры гэтым заявы Знака — гэта рэалізацыя фундамэнтальнага права на выказваньне думкі, якое, тым больш, адбывалася ў рамках аказаньня прававой дапамогі давернікам — Віктару Бабарыку і Сьвятлане Ціханоўскай, удзельнікам выбарчай кампаніі. «Таму крымінальны перасьлед Знака — гэта перасьлед адваката за ажыцьцяўленьне прафэсійнай дзейнасьці», — заявіў Лаеўскі, якога цытуе прэсавая служба Віктара Бабарыкі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG