Марыя Калесьнікава расказала пра плян аб'яднанага штабу на дзень
Як толькі Марыя Калесьнікава, прадстаўніца Віктара Бабарыкі і сябра аб'яднанага штабу кандыдаткі ў прэзыдэнты Сьвятланы Ціханоўскай падыйшла да ўчастка нумар №35 у менскай гімназіі №42, уключылі вельмі гучную народную музыку, перадае карэспандэнт Свабоды.
Калесьнікава сказала будзе суправаджаць Ціханоўскую падчас галасаваньня пазьней у Менску, пасьля будзе сачыць за галасаваньнем. А 22-й гадзіне ў штабе адбудзецца прэсавая канферэнцыя. На пытаньне, ці яна баіцца нечага, Калесьнікава адказала «Канечне, не».
Яна яшчэ раз апісала інцыдэнт са сваім учорашнім затрыманьнем. На просьбу пракамэнтаваць вынікі датэрміновага галасаваньня, адказала: «Гэта, напэўна, ня мае сэнсу камэнтаваць. Вельмі хутка ўсё памяняецца».
На выбарчым участку затрымалі Зьмітра Хведарука
Сябра «Маладога фронту», колішні палітвязень Зьміцер Хведарук паведаміў на Facebook аб сваім затрыманьні на выбарчым участку. Ён сьцьвярджае, што «ўбачыў дзіру ў скрыні для галасаваньня, пачалі фоткаць і раптам на мяне міліцыю выклікалі».
Затрыманых незалежных назіральнікаў перавезьлі з Акрэсьціна ў Жодзіна
Незалежных назіральнікаў, якіх затрымалі ўчора і ўтрымлівалі ў менскім ізалятары на 1-м завулку Акрэсьціна, перавезьлі ў Жодзіна. Пра гэта Свабодзе сябры і сваякі затрыманых назіральнікаў.
Лукашэнка на ўчастку: Я гатовы да дыялёгу з апанэнтамі, але на правакацыі адказ будзе адпаведны
Аляксандар Лукашэнка сказаў, што «гатовы да дыялёгу з апанэнтамі ўлады». Але не прамінуў тэму «правакацый».
«Калі вы проста выказваеце сваю пазыцыю ці пазыцыю кагосьці і там відаць, што гэта Пятроў, Сідараў, Іваноў, я гэта вітаю. Я гатовы з вамі асабіста весьці дыялёг. Калі вы тэндэнцыйна пачынаеце сябе паводзіць, я таксама гэта бачу, і стаўленьне адпаведнае.
А калі вы правакуеце, атрымаеце ў адказ тое ж самае. Вы што, хочаце спрабаваць скінуць уладу, зламаць нешта, укалоць, абразіць (як гэта вы рабілі спачатку больш, а цяпер менш) і чакаеце, што я ці хтосьці перад вамі стане на калені і будзе цалаваць пясок, па якім вы блукалі?
Ня будзе гэтага. Вядзіце сябе па законе, і ў нас прэтэнзій да вас ня будзе», — падкрэсьліў Аляксандр Лукашэнка.
Таксама Лукашэнка заявіў, што «абстаноўка на выбарах ня выйдзе з-пад кантролю».
З горадзенскага ізалятару часовага ўтрыманьня вывезьлі усіх вязьняў у слонімскі ізалятар. Пра гэта паведаміў на волю адзін са зьняволеных, які цяпер адбывае арышт.
«Я адзіная, хто здольны давесьці дзейнага кіраўніка краіны ў другі тур». Канапацкая прагаласавала на выбарах
Пасьля галасаваньня Ганна Канапацкая, адказваючы на пытаньні журналістаў, назвала сябе адзіным апазыцыйным праэўрапейскім палітыкам у сёлетняй кампаніі і лічыць, што яна «адзіная, хто здольны давесьці дзейнага кіраўніка ўлады ў другі тур». Кандыдатка заявіла, што ўлада сваімі дзеяньнямі і затрыманьнямі мірных грамадзян на вуліцах паказвае, што няма роўных умоваў агітацыйнай і выбарчай кампаніі.
«Відаць, што ўлада настроена, каб увесь свой рэпрэсіўны, адміністрацыйны апарат накіраваць на задушэньне пратэстаў. Я сама супраць таго, каб рэвалюцыйна мянялася сытуацыя ў краіне. Я за мірны дэмакратычны эвалюцыйны шлях зьмены ўлады. Але гэта не азначае, што ва ўлады ёсьць права прымяняць сілу супраць мірных грамадзян», — сказала Канапацкая.
У Беларусі праблемы з доступам да мэсэнджараў, VPN, TOR, Telegram і Google
З раніцы 9 жніўня беларусы паведамляюць пра праблемы з доступам да некаторых інтэрнэт-сэрвісаў. Што вядома.
Чытачы Tut.by паведамляюць пра марудны доступ да Telegram бяз проксі-сэрвэра. Павольна грузіцца Youtube, і Google-сэрвісы. Паведамляюць таксама пра праблемы з шыфрованым трафікам на сайты, якія знаходзяцца за межамі Беларусі.
Па паведамленьнях карыстальнікаў ні праз А1, ні праз МТС, ні праз ByFly не працуе сайт незалежнага назіраньня zubr.in (сайт пераехаў на люстэрка zubr.app, але і там дасяжны ня ўсім).
У Telegram-чаце менчукоў паведамляюць пра праблемы з VPN-сэрвісамі, у прыватнасьці з TunnelBear (нагадаем, што напярэдадні гэты сэрвіс падарыў беларусам 10 Гб бясплатных дадзеных). А таксама з сэрвісам 1.1.1.1.
З Tor і VPN, у браўзэры Opera пакуль праблем няма, працуюць некаторыя ананімайзэры.
Праблемы з доступам да інтэрнэт-сэрвісаў назіраюцца ў Менску, Менскай вобласьці, Віцебску, Бабруйску і іншых гарадах.
У «Белтэлекаме» распавялі, што «назіраюцца праблемы і спэцыялісты працуюць над гэтым».
Канапацкая прыйшла на ўчастак з сынам. У сьпісах знайшла і дачку, якая за мяжой і галасуе там
Кандыдатка ў прэзыдэнты Ганна Канапацкая прыйшла на выбарчы ўчастак № 43 у менскай гімназіі № 36 галасаваць разам з сынам. У сьпісах убачыла сваю дачку, але яна ня мусіла ў іх быць, бо ў я адмацаванне. Яна цяпер за мяжой.
З раніцы 9 жніўня праблемы з доступам да сайту Эўрарадыё
Праблемы з доступам да сайту Эўрарадыё 9 жніўня пачаліся з 8 раніцы. Пра гэта Свабодзе паведаміў галоўны рэдактар Павал Сьвярдлоў.
Яўка на 10-ю гадзіну раніцы – 45,33%
На 10-ю гадзіну раніцы 9 жніўня яўка на галасаваньні на прэзыдэнцкіх выбарах па ўсёй Беларусі склала 45,33 працэнта, заявіла старшыня ЦВК Лідзія Ярмошына.
«Яшчэ ніколі ня бачыла такой хлусьні». Маці актывіста «Страны для жизни» пракамэнтавала сюжэт АНТ
У сюжэце на канале АНТ паказалі рэпартаж, у якім актывістаў «Страны для жизни» абвінавацілі ў падрыхтоўцы забурэньняў. Аднаго зь іх назвалі Русланам Парфёнавым. Але сябры і маці кажуць, што гэта ня ён.
Праваабаронцы: затрымалі дзясяткі назіральнікаў
Праваабаронцы паведамляюць пра затрыманьне дзясяткаў праваабаронцаў у апошні дзень датэрміновага галасаваньня, 8 жніўня.
Паводле праваабарончага цэнтру «Вясна» 8 жніўня ў Беларусі затрымалі як мінімум 34 назіральнікі. Больш за 20 чалавек — у Менску.
Станам на раніцу 9 жніўня затрымалі ня менш за 28 назіральнікаў кампаніі «Права выбару-2020», якая аб'ядноўвае апазыцыйныя партыі і рухі. Месцазнаходжанне 8 чалавек высьвятляецца, яны зь вечара не выходзяць на сувязь.
Агулам за час назірання затрымалі прынамсі 37 назіральнікаў «Права выбару-2020».
«Незалежных назіральнікаў ня толькі не пускаюць на выбарчыя ўчасткі, але і масава затрымліваюць без якіхсьці законных падставаў. Такіх беспрэцэдэнтных рэпрэсіяў супраць незалежных назіральнікаў не было за ўвесь час правядзеньня выбараў у нашай краіне. У 2020 годзе ў Беларусі ўлады ліквідавалі незалежнае назіраньне», — пракамэнтаваў нацыянальны каардынатар кампаніі Віталь Рымашэўскі.
Незалежных назіральнікаў не пускаюць на ўчасткі, вокны закрылі ватманамі. Яны назіраюць з вуліцы
На ўчастку 43 у менскай гімназіі № 36, дзе сёньня будзе галасаваць кандыдатка ў прэзыдэнты Ганна Канапацкая, назіральнікі ад ініцыятывы «Честные люди» кажуць, што яўку на датэрміновым галасаваньні завышалі ў два разы.
У будынак гімназіі іх не пусьцілі і 9 жніўня, яны назіраюць з вуліцы; камісія закрыла вокны ватманамі, таму, што адбываецца ў будынку, назіральнікам не відаць. Яны напісалі чарговую скаргу, якую сёньня накіруюць у ЦВК.
Падчас датэрміновага пусьцілі на ўчастак толькі сфатаграфаваць пратакол. Сёньня людзі ідуць вельмі актыўна, адзначаюць назіральнікі.
Андрэй Дзьмітрыеў прыехаў на выбарчы ўчастак на ровары, на руцэ ў яго белая стужка
Кандыдат у прэзыдэнты Беларусі Андрэй Дзьмітрыеў прагаласаваў 9 жніўня ў вёсцы Воўчкавічы Дзяржынскага раёну — на сваім выбарчым участку. Сюды ён прыехаў на ровары разам са сваім сынам. Дзьмітрыеў сказаў, што аддаў голас за новага прэзыдэнта. На руцэ ў яго белая стужка.
«Тое, што цяпер адбываецца — гэта ня выбары, а супрацьстаяньне», — сказаў Дзьмітрыеў.
Цягам дня Андрэй Дзьмітрыеў будзе наведваць выбарчыя ўчасткі і падтрымліваць незалежных назіральнікаў. Увечары ён прыйдзе на адзін з участкаў і будзе назіраць за падлікам галасоў. Дзьмітрыеў перакананы, што ніводзін з кандыдатаў ня мае абсалютнай падтрымкі, а таму ў Беларусі мусіць быць праведзены другі тур выбараў.
Ярмошына зноў папярэдзіла, што на ўчастках могуць увесьці прапускны рэжым
«Бо ў вечаровыя гадзіны прынамсі апанэнты ўлады абяцаюць навалу людзей. Гэта значыць, што ва ўчастковых выбарчых камісіях будзе ўсталяваны прапускны рэжым, будзе запускацца толькі тая колькасьць выбарнікаў, колькі чальцоў камісіі выдаюць выбарчыя бюлетэні. А іх увечары будзе менш, у сілу таго, што частка паедзе зь пераноснымі скрынямі забясьпечваць галасаваньне дома», — сказала Ярмошына.
Праваслаўныя сьвятары запусьцілі флэшмоб супраць фальсыфікацый на выбарах
Шэраг праваслаўных сьвятароў і дыяканаў далучыліся да флэшмобу супраць фальсыфікацыяў на прэзыдэнцкіх выбарах у Беларусі.
Пост на ўезьдзе ў Менск у бок праспэкту Дзяржынскага. Стаяць два вайсковыя аўтамабілі, вайскоўцы, ДАІ.
Па ўсім цэнтры Менску паркоўка і стаянка забароненыя
Па ўсім цэнтры Менску ДАІ выстаўляе знакі «паркоўка і стаянка забаронены», вызваляюць паркоўкі і вуліцы ад аўтамабіляў.
Да Палаца спорту зьвезьлі турнікеты. На Кастрычніцкай плошчы перад Палацам Рэспублікі і Домам прафсаюзаў стаяць турнікеты.
Рэкордныя 41,7%. ЦВК назваў яўку на датэрміновым галасаваньні.
У Гомельскай вобласьці выбары ўвогуле адбыліся датэрмінова.
Цэнтральная выбарчая камісія 9 жніўня апублікавала яўку на датэрміновым галасаваньні па стане на 19:00 8 жніўня. 41,7% ад усіх выбарнікаў прагаласавалі да асноўнага дня галасаваньня цягам 4–8 жніўня.
Гэта нашмат больш, чым падчас ранейшых выбараў. Так, падчас кампаніі 2015 году за датэрмінова прагаласавалі 36,05% выбарнікаў, у 2010-м – 23,1%.
У абсалютных лідэрах Гомельская вобласьць — 54.44% тых, хто пасьпяшаўся на ўчасткі да асноўнага дня галасаваньня 9 жніўня.
Паводле камісіі, яўка ў абласьцях за чатыры дні наступная:
- Берасьцейская — 38,40%;
- Віцебская — 39,34%;
- Гомельская — 54,44%;
- Горадзенская — 38,60%;
- Магілёўская — 49,92%;
- Менская — 39,66%;
- горад Менск — 33,40%.