Лінкі ўнівэрсальнага доступу

1362 затрыманьні, 8 гадоў і 7 месяцаў арыштаў, 287 тысяч рублёў штрафаў. Статыстыка з пачатку выбарчай кампаніі


Затрыманьні нярэдка праводзяць «людзі ў цывільным», якія забіраюць людзей у мікрааўтобусы без нумароў — «сінія бусы»

Праваабарончы цэнтар «Вясна» апублікаваў абноўленую статыстыку прысудаў з пачатку выбарчай кампаніі, якія называе палітычна матываванымі. Па стане на 6 жніўня 223 чалавекі атрымалі адміністрацыйныя арышты, 379 — штрафы.

Ад пачатку выбарчай кампаніі ў траўні і да 6 жніўня, піша «Вясна», паводле адміністрацыйных артыкулаў, якія выкарыстоўваюць «у мэтах палітычнага перасьледу»:

  • сумарна 3138 дзён арышту прысудзілі 223 людзям;
  • сумарна 287 тысяч рублёў штрафаў прысудзілі 379 людзям;
  • зафіксавалі сама меней 1362 выпадкі адвольных затрыманьняў.

Найчасьцейшыя прысуды — паводле артыкулу 23.34 КаАП Рэспублікі Беларусь за «несанкцыянаванае мерапрыемства» і 23.4 КаАП за «непадпарадкаваньне законнаму патрабаваньню».

Акрамя таго, праваабаронцы прызналі палітычнымі зьняволенымі ўжо 25 чалавек.

Праваабаронцы «Вясны» і Беларускага Хэльсынскага камітэту неаднаразова заяўлялі, што выбарчая кампанія ідзе «на фоне няспынных рэпрэсіяў».

Прэзыдэнцкія выбары — 2020 у Беларусі. Што важна ведаць

  • Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
  • 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
  • Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
  • ЦВК зарэгістраваў 15 ініцыятыўных груп з 55 заявак.
  • Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
  • 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
  • 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
  • 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
  • 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
  • Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG