Лінкі ўнівэрсальнага доступу

«Хварэюць калі людзі, то мы іх вучым у лякарні дыхаць», «аблянелі ўжо», — Лукашэнка пра барацьбу з каранавірусам


Падчас наведваньня Сьветлагорску 21 чэрвеня Аляксандар Лукашэнка ў размове зь мясцовымі жыхарамі заклікаў іх «ні ў якім разе не сядзець на канапе» і «дыхаць», каб не было атрафіі лёгкіх і не атакаваў каранавірус.

«Бяда, мне нават сорамна пра гэта казаць: хварэюць калі людзі, то мы іх вучым у лякарні дыхаць. Чаму вучым? Таму што руху мала: абленаваліся ўжо — гэта ня тое, што раней. У Сьветлагорску яшчэ, можа, варушацца, а ў Менску — праблема», — сказаў Лукашэнка ў эфіры АНТ.

Паводле яго, усе праблемы ў беларусаў цяпер — ад недахопу фізычных нагрузак.

«Жывот адгадаваў, цукровы дыябэт, і пайшло-паехала. Гэта ж запаленьне лёгкіх і вірус гэты, калі цябе прыхапіў гэты. Мы ж бачым, што трэба, каб лёгкія былі разьвітыя, дыхаць. Хто спартыўны — той пераносіць хутка», — сказаў Лукашэнка пра хворых на каранавірус.

«Ня будзеце займацца, ня будзеце дыхаць — атрафія лёгкіх, і гэта ўжо ён (каранавірус. — РС) атакуе», — падсумаваў Лукашэнка.

Раней Аляксандар Лукашэнка ня раз даваў сумнеўныя рэкамэндацыі наконт барацьбы з каранавірусам COVID-19: прапаноўваў «лячэньне» трактарам, алькаголем, хакеем, маслам, лазьняй, козачкамі і іншым. Ён таксама неаднаразова разважаў, што нібыта ад каранавірусу ніхто не памірае, а проста каранавірус дае «атмасфэру, у якой разьвіваюцца хранічныя хваробы».

Што трэба ведаць пра новы каранавірус, які выклікае COVID-19

  • УЖЫВУЮ Каранавірус у Беларусі і ў сьвеце. Як разьвіваюцца падзеі
  • Невядомы раней вірус выявілі ў кітайскім горадзе Ўхань у сьнежні 2019 году.
  • Афіцыйнай назвай хваробы ад новага каранавірусу з Кітаю стала COVID-19 (coronavirus disease).
  • Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
  • Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.

  • Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
  • Проста чханьне — не сымптом каранавірусу.
  • Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг. ​


Найважнейшыя пытаньні і адказы пра каранавірус

Як зьмяняецца колькасьць хворых у Беларусі і суседніх краінах. Толькі графікі

Беларускія мэдыкі, якія загінулі падчас пандэміі COVID-19. СЬПІС ПАМЯЦІ

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG