Лінкі ўнівэрсальнага доступу

«Зробім усё, каб электраэнэргія зь БелАЭС ня трапіла на наш рынак», — прэм’ер Літвы 


Вучэньні на Беларускай АЭС, 2019 год
Вучэньні на Беларускай АЭС, 2019 год

Прэм’ер-міністар Літвы Саўлюс Сквярняліс заявіў, што зробіць усё, каб энэргія «зь небяспечнай Беларускай АЭС» ня трапіла ў ягоную краіну. Але пры гэтым «ня будзе заломваць рукі» суседзям у гэтым пытаньні.

«Трэба зрабіць усё, каб тэхнічна электраэнэргія з гэтай станцыі не магла трапіць на літоўскі рынак. Унесены зьмены ня толькі ў мэтодыку, якую, спадзяюся, атрымаецца прыняць разам з палітычнай дэклярацыяй. Гэта ёсьць агульным рашэньнем Літвы, Латвіі, Польшчы і Эўракамісіі», — цытуе кіраўніка ўраду агенцтва Delfi.

У апошнія дні дыскусіі ў Літве выклікаў праект пагадненьня Балтыйскіх краін адносна электраэнэргіі, якая будзе вырабляецца БелАЭС. У прыватнасьці, ён не забаряняе Латвіі і Эстоніі закупляць электраэнергію на Астравецкай АЭС.

«Спадзяюся, што паразуменьне будзе знойдзенае, — выказаў надзею Саўлюс Сквярняліс. — Але мы ня будзем „заломваць рукі“ партнэрам, суседзям. Гэта дакладна ня той шлях, хоць многія лічаць, што мусім гэта зрабіць».

Кіраўнік МЗС Літвы Лінас Лінкявічус таксама раскрытыкаваў праект пагадненьня балтыйскіх краінаў, падрыхтаваны Міністэрствам энэргетыкі Літвы, сьцвярджаючы, што ён не адпавядае інтарэсам дзяржавы.

Энэргетычнае ведамства і адміністрацыя прэзыдэнта Літвы праект абараняюць. Так, міністар энэргетыкі Жыгімантас Вайчунас выказаў сумнеў, што будуць прынятыя захады, якія перашкодзяць яго рэалізацыі. У сваю чаргу, літоўскі ўрад абмеркаваў сумеснае пагадненьне краінаў Балтыі аб гандлі электраэнэргіяй зь Беларусьсю і трэцімі краінамі, але ніякага канкрэтнага рашэньня прынята не было.

Беларускія ўлады ўжо заявілі, што першы энэргаблёк АЭС у Астраўцы будзе ўведзены ў эксплюатацыю найбліжэйшым часам.

Што варта ведаць пра БелАЭС

  • Беларуская АЭС ад 2011 году ўзводзілі пад Астраўцом, што ў Горадзенскай вобласьці, за 22 км ад мяжы зь Літвой, за 50 км ад Вільні і за 125 км ад Менску.
  • Тэрміны запуску некалькі разоў пераносілі. Першапачаткова запуск плянаваўся на 2018 год, Лукашэнка пазьней заяўляў, што тэрміны сарвала Расея. Урэшце цырымонія запуску АЭС прайшла 7 лістапада 2020 году.
  • Для будаўніцтва абраны праект АЭС-2006 — тыповы расейскі праект атамнай станцыі новага пакаленьня з выкарыстаньнем вода-вадзянога энэргетычнага рэактара ВВЭР-1200. Паводле такога ж праекту збудаваныя блёкі Новаваронескай АЭС і Ленінградзкай АЭС-2, што працуюць у Расеі.
  • БелАЭС будуе расейская дзяржаўная кампанія «Росатом» за кошт крэдыту Расеі. Беларусь пазычыла да 10 млрд даляраў для фінансаваньня 90% кошту будаўніцтва двух энэргаблёкаў АЭС. Пагашэньне крэдыту пачынаецца праз 6 месяцаў з даты ўводу АЭС у эксплюатацыю, але не пазьней за 1 красавіка 2021 году. Беларусь папрасіла Расею падоўжыць крэдыт на 10 гадоў.
  • На станцыі будуць два энэргаблёкі з рэактарамі ВВЭР-1200 (В-491) магутнасьцю да 1200 МВт кожны. Праектная магутнасьць АЭС — 2,4 тысячы МВт. Калі АЭС запрацуе на поўную магутнасьць, станцыя дасьць 18 мільярдаў кіляват-гадзін на год — палову таго, колькі цяпер спажывае Беларусь.
  • Літва ня раз ставіла пад сумнеў абраньне для будаўніцтва АЭС астравецкай пляцоўкі. Краіна называла 10 прычын, каб не будаваць БелАЭС, абвінавачвала беларускія ўлады ва ўтойваньні інфармацыі пра станцыю. Літва пратэстуе супраць БелАЭС на найвышэйшым дзяржаўным узроўні, выказвае пратэсты ў міжнародных структурах. Літву падтрымлівае прэзыдэнтка Эстоніі.
  • Пляцоўка Астравецкай АЭС была прызнаная небясьпечнай яшчэ ў 1993 годзе. Тады было знойдзена 7 прыдатных пляцовак, 15 умерана прыдатных і 6 непрыдатных. Астравецкая пляцоўка трапіла ў лік апошніх.
  • Улады і чыноўнікі Беларусі нясьпешна рэагуюць на паведамленьні пра інцыдэнты на будаўніцтве ўласнай атамнай станцыі. Звычайна пра здарэньні на БелАЭС афіцыйна расказваюць толькі пасьля таго, як зьвесткі пра іх зьяўляюцца ў СМІ — так, пра падзеньне корпуса рэактара расказалі толькі пасьля міжнароднага ціску. Урэшце корпус, які ўпаў, замянілі (расейцы зьбіраюцца выкарыстаць яго на іншай АЭС). Новы выпадкова стукнулі аб слуп, але пашкоджаньняў ня выявілі, вырашылі не мяняць корпус другі раз.
  • Адпрацаванае ядзернае паліва зь БелАЭС застанецца ў Беларусі. Эколягі сьцьвярджаюць, што Беларусь выбірае самы дарагі і небясьпечны спосаб захоўваць адпрацаванае паліва з АЭС.
  • У сакавіку 2023 літоўская выведка заявіла, што Беларусь і «Росатом» у мінулым годзе схавалі інцыдэнты і дэфэкты ў рэактарных сыстэмах на першым і другім энэргаблёках. У Міністэрстве энэргетыкі Беларусі адпрэчылі абвінавачаньні і заявілі, што такі даклад ёсьць «мэтанакіраванай акцыяй па дыскрэдытацыі БелАЭС».
  • Паводле словаў фізыка-атамніка Андрэя Ажароўскага, спыніць станцыю зараз будзе вельмі дорага. Пры гэтым ён схільны давяраць паведамленьням літоўскай выведкі. Шэраг ускосных прыкметаў сьведчыць аб тым, што на Астравецкай АЭС дзясяткі тысяч недаробак.
  • Ад пачатку працы АЭС у Беларусі і на пачатак лістападу 2023 электрычнасьць падаражэла на 21–22% у залежнасьці ад тарыфу.
  • Першы энэргаблёк АЭС сілкуе энэргасыстэму Беларусі з 3 лістапада 2020 году (прамыслова эксплюатуецца з чэрвеня 2021), другі — з 13 траўня 2023 году.


Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG