Турэччына ўвяла хатні карантын для дзяцей і падлеткаў
Турэцкія ўлады забаранілі пакідаць дом бяз крайняй патрэбы ўсім асобам, маладзейшым за 20 гадоў. Пра гэта абвясьціў турэцкі прэзыдэнт Рэджэп Эрдаган.
У канцы сакавіка турэцкія ўлады загадалі заставацца дома асобам, старэйшым за 65 гадоў і людзям з хранічнымі хваробамі.
Турэччына таксама ізалюе 31 горад, у тым ліку Стамбул для ўезду і выезду транспарту, акрамя перавозак харчаваньня, мэдычнай прадукцыі і іншых тавараў, патрэбных каб змагацца з эпідэміяй COVID-19, сказаў Эрдаган.
Місія САЗ прыляціць у Беларусь, каб «ацаніць працу мэдыкаў»
7 красавіка ў Беларусь мае прыляцець місія Сусьветнай арганізацыі здароўя.
Як паведаміла дзяржаўнае Агенцтва тэлевізійных навін, галоўная задача дэлегацыі – «ацаніць працу нашых мэдыкаў». Місія САЗ будзе ў Беларусі да канца наступнага тыдня.
У Расеі завялі першую крымінальную справу за распаўсюджваньне фэйкаў пра каранавірус
Паводле дадзеных крыніцы ў сьледчых органах, на якую спасылаецца агенцтва ТАСС, гаворка ідзе пра публікацыі ў сацсетцы "Укантакце" аб заражэньні каранавіруснай інфэкцыяй ў адной з паліклінік Курортнага раёну Пецярбургу. Паводле папярэдніх дадзеных, абвінавачанай зьяўляецца адна з членаў тэрытарыяльнай выбарчай камісіі ў Курортным раёне Ганна Шушпанава.
«Гэта так было нечакана, што ня дай Бог нікому так». Муж першай у Менску ахвяры каранавірусу
У Менску памерла 67-гадовая Вольга Дзеравянка, расказаў Свабодзе сказаў яе муж Яўген Дзеравянка, які цяпер у 1-й клінічнай бальніцы. Пра тое, што жонка заразілася каранавірусам, ён даведаўся пасьля яе сьмерці.
«Мая жонка наогул хварэла, былі праблемы з сардэчна-сасудзістай сыстэмай, дыябэт. 29 сакавіка яна адчувала сябе няважна, а ўначы паднялася тэмпэратура, было падазрэньне на пнэўманію. А днём прыйшла доктар і накіравала ў бальніцу, на хуткай яе адвезьлі. У лякарні яна была паўтара сутак. Менш як праз суткі яна трапіла ў рэанімацыю. І ў гадзіну ночы з аўторка на сераду яна памерла ў рэанімацыі. А потым мне паведамілі, што ў яе станоўчы тэст на каранавірус». Гісторыя цалкам тут>>
Кіраўнік САЗ заклікаў тэставаць і лячыць ад COVID-19 бясплатна
Кіраўнік Сусьветнай арганізацыі здароўя Тэдрас Гебрэесус заклікаў усе краіны прыбраць фінансавыя бар'еры для змаганьня з каранавіруснай інфэкцыяй.
«Калі людзі адкладаюць лячэньне ці адмаўляюцца ад яго, бо ня могуць сабе яго дазволіць, яны шкодзяць ня толькі сабе, яны ўскладняюць кантроль за пандэміяй COVID-19 і ставяць грамадзтва ад пагрозу», – заявіў ён на прэсавай канфэрэнцыі 3 красавіка.
«Ён змагаўся вельмі доўга». У Менску памёр яшчэ адзін пацыент з каранавірусам
Пра сьмерць мужчыны Свабодзе паведамілі яго сваякі. Ён памёр каля 17.30 3 пятніцу 3 красавіка. Ён знаходзіўся на апараце штучнай вэнтыляцыі лёгкіх з 23 сакавіка ў Менскім інфэкцыйным шпіталі.
Хвораму менчуку было 60 гадоў. Дачка распавядала, што ў яго быў нармальны стан здароўя, без хранічных захворваньняў, ён ня піў і не курыў. Цалкам чытайце па спасылцы>>
За суткі ў Віцебску ад пнэўманіі памерлі дзьве жанчыны, адна зь іх мэдсястра
За суткі ў Віцебску выявілі чатыры новыя выпадкі інфэкцыі ў пацыентаў, якія ўжо былі на лячэньні. Два чалавекі памерлі ад пнэўманіі, паведаміў намесьнік начальніка галоўнага ўпраўленьня аховы здароўя Мікалай Касьпіровіч, піша газэта «Віцьбічы»
Першы выпадак — жанчына, старэйшая за 70 гадоў, з хранічнымі паталёгіямі. Яе тэст на каранавірус яшчэ пераправяраюць. Другі — мэдычная работніца, у якой была двухбаковая пнэўманія вірусна-бактэрыйнага генэзу. Пацьверджаных вынікаў яе тэсту на каранавірус таксама няма.
Хранічна не хапае масак: як дапамагчы дактарам?
Дактары і мэдсёстры расказваюць, што ад безвыходнасьці паўторна выкарыстоўваюць аднаразовыя прадметы. Брак масак і спэцыяльнага адзеньня падчас пандэміі ставіць пад пагрозу жыцьцё лекараў.
Прабачце, мы зачыніліся! Закрыцьцё межаў адной карцінкай
Паводле стану на 31 сакавіка 2020, як найменей 93 працэнтаў насельніцтва сьвету жыло ў краінах, якія ўвялі частковае або поўнае закрыцьцё межаў, каб не пускаць у краіну неграмадзянаў або асобаў без дазволу на жыхарства - у якасьці сродку барацьбы супраць COVID-19.
«Белавія» прыпыняе палёты ў Вільнюс з 6 красавіка
З 6 красавіка авіякампанія «Белавія» па рашэньні літоўскага боку прыпыняе выкананьне рэйсаў у Вільню, паведаміла МЗС Беларусі ў Facebook.
У катоў ва Ўхані знойдзены каранавірус. У горадзе Шэньчжэнь іх ужо забаранілі есьці
Прыкладна ў 15% катоў у кітайскім горадзе Ўхань выяўлены новы каранавірус SARS-CoV-2. Пра гэта гаворыцца ў папярэдняй навуковай публікацыі электроннай бібліятэкі bioRxiv.
Каранавірус у Мэксыцы прыпыніў вытворчасьць піва Corona
Пра гэта паведаміла піваварная кампанія Grupo Modelo, піша Daily Mail. Вытворца растлумачыў, што ўрад залічыў яго да прадпрыемстваў, дзейнасьць якіх не зьяўляецца істотнай для эканомікі падчас карантыну.
Расея ў ноч на суботу прыпыніць міжнародныя авіярэйсы
Як паведамлялася, з аўторка Расея вырашыла скараціць колькасьць рэйсаў для вывазу расейцаў з замежных краін. Рашэньне прынятае дзеля больш якаснай мэдычнай праверкі тых, хто прыбывае з-за мяжы, патлумачыў міністар транспарту Расеі Яўген Дзітрых.
«Купалаўскі дома». Нацыянальны тэатар будзе паказваць свае спэктаклі онлайн
Нацыянальны акадэмічны тэатар імя Янкі Купалы анансаваў новы онлайн-праект «Купалаўскі дома» — гэта паказы спэктакляў з архіву тэатру, творчых вечароў, сустрэч, сьвяточных імпрэзаў і іншых
На раніцу 3 красавіка — 4 сьмерці. Мінздароўя назвала колькасьць памерлых і інфікаваных COVID-19 у Беларусі
Міністэрства аховы здароўя Беларусі 3 красавіка правяло прэс-канфэрэнцыю аб сытуацыі з пандэміяй каранавірусу і распаўсюдам COVID-19 у краіне. На 3 красавіка ў Беларусі зафіксавалі 351 выпадак каранавіруснай інфэкцыі.
На 8 гадзінаў раніцы 3 красавіка:
- агулам па краіне зарэгістраваны 351 выпадак каранавіруснай інфэкцыі: 1 у Берасьейскай вобласьці, 2 у Магілёўскай, 6 у Горадзенскай, 13 у Гомельскай, 50 у Менскай, 89 у Віцебскай, 190 у Менску;
- каля паловы выпадкаў інфэкцыі — у людзей ад 25 да 64 гадоў;
- «выразна пацьверджаныя» 4 сьмерці пацыентаў з COVID-19, а пасьля 18 гадзінаў стануць вядомыя новыя лічбы — калі будуць атрыманыя копіі пасьведчаньняў аб сьмерці.
- памерых пацыентаў у беларускай статыстыцы сапраўды залічваюць у «ачунялых і выпісаных»;
- агулам за тры месяцы 2020 году ўсіх выпадкаў пнэўманіяў стала менш: летась за той пэрыяд было 20 250 пнэўманіяў, пралекаваных у стацыянарах, ад якіх памерлі 153 чалавекі, а за гэты — 18 032 пралекавалі, 128 памерлі.
Мітрапаліт Кандрусевіч просіць вернікаў заставацца дома
3 красавіка старшыня Канфэрэнцыі каталіцкіх біскупаў у Беларусі арцыбіскуп Тадэвуш Кандрусевіч папрасіў вернікаў у сувязі з пандэміяй каранавірусу ўстрымацца ад наведваньня касьцёлаў і ўдзельнічаць у сьвяточных набажэнствах з дапамогай трансьляцый.
Валянтэры закупілі 20 тысяч рэсьпіратараў для беларускіх шпіталяў
Каардынатар аднога з найбуйнейшых збораў, праваабаронца Андрэй Стрыжак расказаў на старонцы ў Facebook, што ім удалося набыць 20 тысяч рэсьпіратараў клясы ffp3 і адправіць іх у шпіталі. Рэсьпіратары ўжо адвезьлі (ці адвязуць неўзабаве) у Менск, Віцебск, Горадня, Ліда, Расоны, Наваполацак, Салігорск, Сьветлагорск, Гомель, Хоцімск, Бараўляны, Заслаўе.
Цяпер валянтэры абмяркоўваюць магчымасьць закупу бескантактных тэрмомэтраў і аднаразовых касьцюмаў і халатаў для шпіталяў, а таксама зьбіраюцца самі запусьціць вытворчасьць касьцюмаў. Цалкам чытайце тут>>
Яшчэ адна жанчына з каранавірусам памерла ў Менску
У 2-й гарадзкой клінічнай бальніцы Менску памерла 67-гадовая Вольга Дзеравянка. У яе хуткацечна разьвіўся ацёк лёгкіх, а тэст на каранавірус паказаў станоўчы вынік, паведаміла «Наша Ніва». Сын Мікалай пацьвердзіў Свабодзе сьмерць жанчыны, ён ведае са слоў бацькі, што ў яе быў каранавірус.
Муж жанчыны цяпер таксама ляжыць у бальніцы. Кажа, што жанчына ўвесь час сядзела дома, была на пэнсіі. Схадзіла толькі ў паліклініку за тыдзень да сьмерці, па рэцэпт. Цалкам чытайце тут>>
Японія падтрымае сем’і грашамі
Палітыкі кіроўнай Лібэральна-дэмакратычнай партыі Японіі ўзгаднілі новыя меры стымуляваньня эканомікі ў краіне. Кожная хатняя гаспадарка, якая пацярпела ў пэўнай ступені ад пандэміі каранавірусу, павінна атрымаць 300 тысяч енаў ($2800).
Выплата гэткай дапамогі павінна стаць часткай пакету эканамічных стымулаў, які будзе прадстаўлены ўрадам на наступным тыдні. Плянуецца, што гэты пакет складуць уліваньні на агульную суму 276 мільярдаў даляраў.
У Віцебску памёр 70-гадовы мужчына з COVID-19
Ноччу 2 красавіка ў Віцебскім абласным клінічным спэцыялізаваным цэнтры памёр 70-гадовы вайсковы пэнсіянэр Уладзімер Сідараў, у якога быў станоўчы тэст на COVID-19, піша Tut.by. Мужчына 5 дзён быў у рэанімацыі на апараце штучнай вэнтыляцыі лёгкіх. Таксама COVID-19 выявілі ў ягонай жонкі Тацяны, якая цяпер у інфэкцыйнай лякарні з пнэўманіяй. Падрабязна чытайце тут>>