Пандэмія каранавірусу ў Беларусі і ў сьвеце. Як разьвіваюцца падзеі

Мінздароўя патлумачыла, чаму Беларусь не закрывае межы

У афіцыйным паведамленьні гаворыцца пра тое, што 7 з 8 прывазных выпадкаў каранавірусу, зафіксаваных у Беларусі, належаць да беларусаў, якія вярнуліся з-за мяжы.

У нядзелю 15 сакавіка Міністэрства аховы здароўя распаўсюдзіла публікацыю з адказамі на шэраг частых пытаньняў. Сярод іх знаходзіцца тлумачэньне адмовы ад поўнага закрыцьця межаў.

«Ні адна дзяржава сьвету, якая ўжыла дадзеную меру, не забараніла ўезд сваім грамадзянам, — гаворыцца ў паведамленьні Мінаховыздароўя. — Таму што гэта немагчыма тэхнічна і няправільна маральна-этычна. Усе, напэўна, забыліся, што ў дадзены момант з 8 завозных выпадкаў каранавіруснай інфэкцыі ў нашай краіне, 7 было выяўлена менавіта ў беларускіх грамадзян, якія вярнуліся на радзіму з-за мяжы. Ці мы гатовыя адмовіцца ад нашай моладзі, якая вучыцца за мяжой і іншых суайчыньнікаў і не пусьціць іх дадому?».

На гэты момант амаль усе суседзі Беларусі закрылі свае межы. Адкрытай застаецца толькі мяжа Беларусі з Расеяй. Таксама ў Беларусь замежнікі і грамадзяне краіны могуць трапіць праз нацыянальны аэрапорт. У ім арганізаваныя працэдуры паглыбленага кантролю.

На раніцу 15 сакавіка

• У сьвеце зафіксавалі больш за 156 тысяч выпадкаў COVID-19: каля 81 тысячы ў Кітаі, 21,1 тысячы ў Італіі, 12,7 тысячы ў Іране, 8,1 тысяч ў Паўднёвай Карэі, 6,3 тысячы ў Гішпаніі, 4,5 тысячы ў Нямеччыне, 4,4 тысячы ў Францыі, звыш 3 тысяч у ЗША.
• Ад хваробаў, якія выклікаў новы каранавірус, у сьвеце памерлі 5839​ чалавек: 3199 у Кітаі, 1,441 у Італіі, 611 у Іране, 196 у Гішпаніі, 91 у Францыі, 75 у Паўднёвай Карэі, 60 у ЗША.
• Выпісалі здаровымі 75,9 тысячы пацыентаў, у цяжкім стане знаходзяцца 5,6 тысячы пацыентаў.
• У Беларусі пацьвердзілі 27 выпадкаў COVID-19. Самага першага пацыента, у якога выявілі каранавірус, 12 сакавіка выпісалі з шпіталя.

Літва ўводзіць карантын. Што будзе забаронена і абмежавана

Сьпіс абмежаваньняў

• Забараняецца ўезд у краіну замежнікам, за выключэньнем асобаў, якія забясьпечваюць дастаўку неабходных тавараў у Літву, членаў экіпажаў, членаў семʼяў грамадзян Літвы, асобаў, у якіх ёсьць права на пражываньне і працу ў Літве, дыпляматаў, прадстаўнікоў ваенных місій NATO. Часова будзе прадастаўлены гуманітарны калідор грамадзянам Латвіі і Эстоніі для вяртаньня дадому.
• Скароціцца колькасьць памежных прапускных пунктаў, праз якія можна будзе ўехаць у Літву.
• Грамадзянам Літвы забараняецца езьдзіць у закранутыя каранавірусам краіны ўсімі відамі транспарту. Таксама разглядаецца магчымасьць забараніць выезд за мяжу не з працоўнымі мэтамі.
• Забаронены гандаль у крамах, за выключэньнем харчовых крамаў, аптэкаў, спэцыялізаваных вэтэрынарных аптэк, рынкаў, якія гандлююць харчовымі прадуктамі.
• Забароненая дзейнасьць кавярняў, бараў, за выключэньнем ежы на вынас.
• Забараняюцца ўсе мерапрыемствы, як у закрытых памяшканьнях, так і на паветры.
• Забараняецца ўваход круізных лайнэраў у Клайпедзкі порт.
• Забараняецца наведваньне пацыентаў у лячэбных установах, а таксама вязьняў у месцах зьняволеньня.
• Забараняецца прадастаўляць паслугі СПА, рэабілітацыі, калі яны не зьвязаныя зь лячэньнем, забараняецца дзейнасьць цырульняў, салёнаў прыгажосьці.
• Абмяжоўваецца колькасьць пасажыраў у міжгародніх аўтобусах і цягніках, каб захоўваць дыстанцыю паміж пасажырамі. Рэкамэндуецца гэта ўжываць і ў дачыненьні да гарадзкога транспарту.
• Гатэлі пры неабходнасьці павінны будуць пускаць людзей на карантын, дзяржава будзе гэта аплачваць.
• Адукацыйныя ўстановы застаюцца зачыненымі.
• У лячэбных установах адкладаюцца плянавыя апэрацыі за выключэньнем неабходнай мэдыцынскай дапамогі.
• Як у дзяржаўным, так і ў прыватным сэктары работнікам рэкамэндуецца працаваць дома.

14 сакавіка: асноўныя вынікі дня

• Цягам 14 сакавіка найвялікшыя страты зафіксавалі ў Італіі: ад COVID-19 памерлі 175 чалавек (97 — у Іране, 60 — у Гішпаніі).
• У Італіі зафіксавалі найбольшую колькасьць новых захварэлых — 3497 чалавек (у Іране — 1,365, у Гішпаніі — 1083).
• Гішпанія сьледам за Італіяй закрывае на карантын усю краіну.
• 240 студэнтаў і выкладчыкаў Белдзяржунівэрсытэту, якія маглі мець кантакт са студэнтам — пераносчыкам інфэкцыі, накіравалі ў шпіталі на карантын.
• З 16 сакавіка Літва уводзіць агульнанацыянальны карантын, закрывае межы для іншаземцаў.
• Украіна з панядзелка, 16 сакавіка, закрывае межы зь Беларусьсю. Абмежаваньне не закране грамадзянаў Украіны, якія вяртаюцца дадому.
• ЗША пашырылі забарону для падарожнікаў з Эўропы, уключыўшы ў «чорны» сьпіс краін Вялікую Брытанію і Ірляндыю.
• Прэзыдэнт ЗША Дональд Трамп заявіў, што здаў аналіз на каранавірус і чакае вынікаў на працягу двух дзён.
• Прэм’ер-міністар Францыі запатрабаваў закрыць усе «няважныя» публічныя месцы (рэстараны, кавярні, начныя клюбы і кінатэатры).
• Чэскі ўрад пастанавіў закрыць крамы і рэстараны на 10 дзён.

Гішпанія ўсьлед за Італіяй закрывае на карантын усю краіну

З 16 сакавіка ўрад Гішпаніі плянуе ўвесьці ў краіне ўсеагульны карантын праз распаўсюд COVID-19, паведамляе Reuters. Будзе абвешчанае надзвычайнае становішча. У праекце пастановы гаворыцца, што ўсе жыхары Гішпаніі не павінны выходзіць з дому, акрамя як для пакупкі ежы, наведваньня аптэкі, бальніцы, працы ці іншых экстраных выпадкаў.

Гішпанія таксама закрывае ўсе школы, унівэрсытэты, рэстараны, бары і гатэлі па ўсёй краіне, а таксама другарадныя крамы. У Гішапніі захварэлі на каранавірус больш за 6 тысяч чалавек, больш за 190 памерлі.

Прэзыдэнт ЗША здаў тэст на COVID-19

Падчас прэсавай канфэрэнцыі ў Белым доме ў суботу ён растлумачыў, што здаў тэст, паколькі журналісты ўвесь час пыталіся, чаму ён да гэтага часу гэтага не зрабіў.

Напярэдадні прэзыдэнт ЗША заявіў, што ў яго няма сымптомаў заражэньня каранавірусам. Трамп дадаў, што з гэтай прычыны не праходзіў тэст на заражэньне каранавірусам COVID-19. Прэзыдэнт ЗША паведаміў, што яго адміністрацыя распаўсюдзіла забарону на палёты ў ЗША з Ірляндыі і Вялікабрытаніі. Забарона ўступіць у сілу ў ноч з нядзелі на панядзелак.

Дырэктар Нацыянальнага інстытуту алергіі і інфэкцыйных захворваньняў ЗША паведаміў, што ў суботу ў ЗША было зарэгістравана 2226 выпадкаў заражэньня новым каранавірусам, удакладніўшы, што ўспышка яшчэ не дасягнула свайго піку.

14 сакавіка ў Італіі ад каранавірусу памерлі 175 чалавек

Агульная колькасьць сьмерцяў з часу пачатку эпідэміі — 1441 чалавек. Колькасьць пацьверджаных выпадкаў захворваньняў складае цяпер 21 157 чалавек, у пятніцу іх было 17660.

Беларускія турмы закрылі на карантын

Беларускія калёніі да 6 красавіка закрылі на карантын: спатканьні забароненыя, але дазволеныя дадатковыя 10-кіляграмовыя перадачы з садавіной, гароднінай і вітамінамі.

«Учора мне патэлефанаваў сын, ён адбывае пакараньне ў папраўчай калёніі № 22 у Івацэвічах. Сказаў, што да 6 красавіка ўсе спатканьні — кароткатэрміновыя і доўгатэрміновыя, забароненыя праз карантын», — паведаміла Свабодзе актывістка руху «Маці 328» Ліяна Шуба.

Аналягічная сытуацыя склалася і ў калёніі № 15 у Магілёве і іншых установах сыстэмы Дэпартамэнту выкананьня пакараньняў. Спатканьні забаронены і ў гомельскім СІЗА-3 — праз карантын. Пра гэта Свабодзе паведамілі сваякі тых, хто знаходзіцца пад сьледзтвам.

У Кіргізстане закрываюцца школы і ВНУ

Савет бясьпекі Кіргізстану закрыў з 16 сакавіка 2020 году ўсе школы і ВНУ краіны на карантын тэрмінам на тры тыдні. Прэзыдэнт краіны, выступаючы на пасяджэньні, адзначыў, што здароўе насельніцтва краіны — гэта першачарговай пытаньне.

Раней віцэ-прэм’ер Алтынай Амурбекава заяўляла, што закрыцьцё школ на карантын не плянуецца, але рашэньні будуць прымацца ў залежнасьці ад сытуацыі.

Чаму мыла працуе лепей за іншыя сродкі дэзынфэкцыі

На малекулярным узроўні мыла разьбівае рэчы на часткі. На ўзроўні грамадзтва дапамагае трымацца разам, піша The New York Times.

• Як адзначае амэрыканскае выданьне, «імаверна, гэта здарылася выпадкова тысячы гадоў таму. Паводле адной легенды, дождж вымываў тлушч і попел, якія засталіся ад частых ахвярапрынашэньняў жывёлаў, у суседнюю раку, дзе яны ўтварылі пену з выдатнай уласьцівасьцю чысьціць скуру і адзеньне. Магчыма, пеністыя растворы мелі расьліннае паходжаньне...».
• Аднак здарылася так, што старажытнае адкрыцьцё мыла зьмяніла гісторыю чалавецтва. Хоць нашыя продкі не маглі гэтага прадбачыць, мыла ў выніку стане адным з самых эфэктыўных сродкаў абароны ад нябачных узбуджальнікаў, піша The New York Times.
• Паводле навукоўцаў, у цэлым сродкі для дэзынфэкцыі рук не такія надзейныя, як мыла. Санітарныя сродкі, якія маюць менш за 60 адсоткаў этанолу, дзейнічаюць аналягічна, перамагаючы бактэрыі і вірусы, дэстабілізуючы іх ліпідныя мэмбраны. Але яны ня могуць так лёгка выдаліць мікраарганізмы з скуры як мыла, адзначае амэрыканскае выданьне і робіць выснову, што «збольшага мыцьцё рук зьяўляецца больш эфэктыўным, чым ачышчэньне дэзынфікуючымі сродкамі, бо дэзынфэкцыя на аснове сьпірту добрая ў тым выпадку, калі мыла і вада недаступныя.

Украінскія дыпляматычныя ўстановы ў Беларусі найбліжэйшы тыдзень будуць працаваць з грамадзянамі дыстанцыйна

У сувязі з каранавірусам дыпляматычныя ўстановы Украіны за мяжой з 15 па 20 сакавіка ня будуць весьці прыём грамадзянаў, паведаміла прэс-служба МЗС краіны. Гэта тычыцца пасольства Украіны ў Менску і генэральнага консульства ў Берасьці.

Дыпляматы пераходзяць на асаблівы рэжым, які прадугледжвае дыстанцыйную форму працы з грамадзянамі і кругласутачную апрацоўку іх пісьмовых зваротаў. Выключэньне складуць «форс-мажорныя выпадкі, дзе неабходныя тэрміновыя консульскія дзеяньні і функцыі, асабліва зьвязаныя з пандэміяй».

Рашэньне аб спыненьні альбо працягу асаблівага рэжыму працы ўкраінскіх дыппрадстаўніцтваў будзе прымацца «у залежнасьці ад дынамікі разьвіцьця пандэміі».

#COVID19_BY_help. Як каранавірус аб’ядноўвае беларусаў замежжа

Беларусы замежжы прапануюць дапамогу суайчыньнікам, якія знаходзяцца ў групе рызыкі, альбо трапілі ў складаную сытуацыю праз пандэмію каранавірускай інфэкцыі ў іх краінах.

Як распавяла Свабодзе актывістка беларускай грамады ў Чэхіі, адміністратаркі суполкі BLRČR у Фэйсбуку, перакладчыца Крысьціна Шыянок, «да нас учора пачалі паступаць просьбы аб дапамозе — адна зь іх узяць на ператрымку сабачку, чый гаспадар верагодна захварэў, таму мы зранку 14 сакавіка ўвялі хэштэг #COVID19_BY_help, каб беларусы Чэхіі дапамагалі адзін аднаму.

Алесь Вашкевіч у Швайцарыі таксама запрапанаваў дапамогу ў межах беларускай дыяспары.

У іншых суполках беларусаў замежжа — італьянскай, нямецкай, амэрыканскай ды іншых беларусы актыўна абмяркоўваюць сытуацыю з пандэміяй, дзеляцца парадамі і ўласным досьведам.

Польшча спыніла міжнародныя чыгуначныя зносіны, у тым ліку зь Беларусьсю

У сувязі з распаўсюдам каранавірусу COVID-19 Польшча прыняла рашэньне аб спыненьні міжнародных чыгуначных зносін, у тым ліку часова прыпыняецца курсіраваньне цягнікоў беларускага фармаваньня.

Беларуская чыгунка паведамляе, грошы за праязныя дакумэнты на адмененыя цягнікі можна вярнуць у білетных касах без зьбіраньня дадатковых збораў. Вяртаньне плацяжоў па электронных праязных дакумэнтах ажыцьцяўляецца праз інтэрнэт-рэсурс, на якім яны былі набытыя. Тэрміны вяртаньня праязных дакумэнтаў не абмежаваныя.

Літва аднаўляе памежны кантроль з ЭЗ​

Літва аднаўляе праверку ўнутраных межаў Эўрапейскага Зьвяза з Польшчай і Латвіяй сёньня з 18 гадзін.

Рашэньне аб закрыцьці межаў або аб абмежаваньні руху грамадзян яшчэ прынятае не было. Яго ўрад абвесьціць асобна.

Раней свае межы закрылі Польшча і Ўкраіна.

Украіна закрывае мяжу зь Беларусьсю

З 16 сакавіка іншаземцаў і асобаў без грамадзянства ня будуць прапускаць праз мяжу, у тым ліку і ў межах транзытнага праезду. Абмежаваньне не закране грамадзянаў Украіны, якія вяртаюцца дадому.

Кампанія «Белавія» прыпыняе палёты ў аэрапорты Украіны, Польшчы і Кіпра

У Кіеў, Львоў, Харкаў і Адэсу палёты прыпыняюцца з 17 па 31 сакавіка. У Ларнаку — з 15 па 30 сакавіка, у Варшаву — з 15 па 27 сакавіка.

Тым, хто ўжо набыў квіткі на адмененыя рэйсы, прапануюць вярнуць грошы або зьмяніць дату палёту на адзін з дзён да 31 сьнежня 2020 году.

Кампанія Apple закрывае ўсе крамы па-за Кітаем на 2 тыдні

Усе работнікі зачыненых крамаў Apple будуць атрымліваць заробак падчас вымушанага прастою. Там, дзе гэта магчыма, кампанія перавяла ўсіх сваіх супрацоўнікаў па-за Кітаем на выдаленую працу.

«Гэта ўнёсак кампаніі у барацьбу з глябальным распаўсюджваньнем новага каранавіруса, бо найлепшы спосаб супрацьстаяць пандэміі — абмежаваць кантакты і зьменшыць перасоўваньне людзей», — тлумачыць генэральны дырэктар Apple Цім Кук.

У Маскве і Падмаскоўі ўвялі свабоднае наведваньне школ

З 16 сакавіка ў Маскве ўводзяць свабоднае наведваньне школ.

«Вырашаць, ці працягвае дзіця хадзіць у школу ці застаецца дома, будуць бацькі. Ім у дадзеным выпадку відаць лепш», — заявіў Сабянін.

Заняткі ў школах будуць працягвацца, адзначыў мэр. Рэжым свабоднага наведваньня будзе дзейнічаць да асобага распараджэньня.

«Лічыце, што вы на вайне» — пандэмія ў Італіі, Нямеччыне і Чэхіі вачыма беларускіх лекарак

Не панікаваць, трымаць карантын, калі прызначылі, ня бегчы ў крамы запасацца прадуктамі. Гэта раяць беларускія лекаркі, якія жывуць і працуюць ў Італіі, Чэхіі і Нямеччыне. Пульманоляг Вольга Жарнасек з Чэхіі, стаматоляг Натальля Ўльянава з Італіі і хірург Сьвятлана Элікава зь Нямеччыны распавядаюць пра сытуацыю ў іх краінах, а таксама пра досьвед у змаганьні з распаўсюдам каранавірусу, якім варта скарыстацца Беларусі.

Сьцісла

• Ульянава: Італія падзялілася на дзьве часткі. У адной — празьмерная паніка, а другой — пафігістычныя адносіны. На жаль, ад вірусу мы не абароненыя.
• Жарнасек: Чэскія ўлады дамовіліся з апэратарамі мабільных сетак, і кожны, хто перасек мяжу Чэхіі, атрымаў смс, дзе была інфармацыя пра тое, што трэба рабіць і куды зьвяртацца.
• Элікава: Наведнікі і хворыя пачалі красьці ў шпіталі сродкі дэзынфэкцыі, пальчаткі, маскі, і мы мусілі ўсе запасы замыкаць пад ключ.

Чытаць далей тут.

Сытуацыя на раніцу 14 сакавіка

• Зафіксавалі больш за 145 тысяч выпадкаў COVID-19: каля 81 тысячы ў Кітаі, 17,6 тысячы ў Італіі, 11,3 тысячы ў Іране, 8,08 тысяч ў Паўднёвай Карэі, 5,2 тысячы ў Гішпаніі, 3,6 тысячы ў Францыі, 3,6 тысячы ў Нямеччыне, каля 2,3 тысячы ў ЗША.
• Ад хваробаў, якія выклікаў новы каранавірус, у сьвеце памерлі 5436 чалавек: 3189 у Кітаі, 1,266 у Італіі, 514 у Іране, 133 у Гішпаніі, 79 у Францыі, 72 у Паўднёвай Карэі, 50 у ЗША.
• Выпісалі здаровымі 72,5 тысячы пацыентаў, у цяжкім стане знаходзяцца звыш 6 тысячы пацыентаў.
• У Беларусі пацьвердзілі 27 выпадкаў COVID-19.