Дэпутата парлямэнту Францыі шпіталізавалі з каранавірусам
Дэпутата парлямэнту Францыі — Нацыянальнага сходу — шпіталізавалі з каранавіруснай інфэкцыяй. Пра гэта вечарам 5 сакавіка ў афіцыйным лісьце паведаміў старшыня Нацыянальнага сходу Рышар Фэран.
Дэпутат зьмешчаны ў рэанімацыю. Каранавірус выяўлены таксама ў двух працаўнікоў буфэта і рэстарана пры парлямэнце.
Імя дэпутата не называецца. Вядома, што ён прадстаўляе правацэнтрысцкую апазыцыйную партыю «Рэспубліканцы» і абраны ў рэгіёне Эльзас.
Парлямэнцкія буфэт і рэстаран зачыненыя. Ці будзе неяк абмежаваная праца самога парлямэнту, пакуль незразумела.
У Францыі напярэдадні выяўлена больш за 100 выпадкаў заражэньня новым каранавірусам. Агульная колькасьць выяўленых выпадкаў набліжаецца да 500. Памерлі 7 чалавек. Прэзыдэнт Эмануэль Макрон заявіў, што эпідэмія «непазьбежная» і да яе неабходна падрыхтавацца.
Грамадзкі транспарт у Менску пачалі дэзінфэкаваць
У Менску ўсе салёны наземнага грамадзкага транспарту пачалі апрацоўваць дэзынфікуючымі сродкамі, паведамілі агенцтву «Минск-Новости» на прадпрыемстве «Мінтранс». Апрацоўваюць аўтамабілі і менскія маршрутчыкі, ставяць у іх дазатары з антысэптычнымі сродкамі і антыбактэрыйныя сурвэткі.
Мінздароўя аднесла новы каранавірус да небясьпечных захворваньняў
Міністэрства аховы здароўя Беларусі ўнесла інфэкцыю, выкліканую новым каранавірусам, у пералік захворваньняў, якія ўяўляюць небясьпеку для здароўя насельніцтва, разам з чумой, халерай, сыбірскай язвай, актыўнымі сухотамі органаў дыханьня, інфэкцыямі, якія перадаюцца полавым шляхам (пранцы і ганарэя) і гемарагічнымі ліхаманкамі Ласса, Марбург, Эбола. Новы каранавірс унесены ў сьпіс пад нумарам сем.
COVID-19 у параўнаньні зь іншымі інфэкцыямі. Адной карцінкай
У сьвеце зафіксавана ўжо больш за 90 тысяч выпадкаў захворваньня COVID-19, выкліканага вірусам SARS-CoV-2, які быў выяўлены ў кітайскім горадзе Ўхань.
Вось актуальнае параўнаньне COVID-19 зь іншымі інфэкцыйнымі хваробамі, якія трывожылі сусьветную грамадзкасьць у недалёкім мінулым.
Усіх шпіталізаваных з каранавірусам плянуюць неўзабаве выпісаць
На здарўое яны не наракаюць, тэмпэратура ў іх нармальная. Засталося толькі, каб аналізы паказалі, што каранавірусу ў сьлізістых больш няма, піша Мінздароўя.
Упершыню COVID-19 выявілі ў жывёлы — сабакі з Ганконгу
Урад Ганконгу, спэцыяльнага адміністрацыйнага раёну Кітаю, паведаміў пра першы выпадак выяўленьня новага каранавірусу ў жывёлы. У хатняга сабакі выявілі інфэкцыю слабага ўзроўню, але станоўчы вынік паўторна далі некалькі розных тэстаў.
Верагодна, гэта таксама першы выпадак перадачы вірусу SARS-CoV-2 ад чалавека да жывёлы. Як вірус першапачаткова трапіў да чалавека, цяпер дакладна ня ведаюць, але мяркуюць, што перадаўся ад кажаноў іншым жывёлам.
Сабака, у якога выявілі вірус, цяпер ня мае нейкіх сымптомаў хваробы, але застаецца на карантыне зь яшчэ адным сабакам, у якога пакуль не пацьвердзілі наяўнасьць вірусу.
Беларускія турфірмы заявілі пра пагрозу каляпсу бізнэсу ў сувязі з каранавірусам
У Рэспубліканскім саюзе турыстычных арганізацый (РСТА) кажуць, што ў сувязі з каранавірусам «турыстычная галіна ў Беларусі, усьлед за Расеяй, падведзеная да стану сур’ёзнага каляпсу, і становішча абвастраецца з кожным днём».
Паводле РСТА, на фоне рэкамэндацый Мінспорту і турызму — устрымацца ад паездак у Кітай, Італію, Іран і Паўднёвую Карэю — беларускія турысты пачалі адмаўляцца ад раней забраняваных тураў ня толькі ў гэтыя, але і ў іншыя краіны, як на бягучыя даты, так і на больш позьні пэрыяд (канец лета і восень). Беларускія апэратары і агенты вымушаныя вяртаць турыстам грошы, у той час як перавозчыкі не вяртаюць грошы за прададзеныя квіткі, а замежныя партнэры выстаўляюць штрафныя санкцыі беларускім калегам. Ня лепшая сытуацыя і з уязным і ўнутраным турызмам.
Беларусь адклала разьмяшчэньне эўрабондаў у сувязі з каранавірусам
Міністэрства фінансаў Беларусі адклала на няпэўны тэрмін разьмяшчэньне новага выпуску эўрабондаў з прычыны нестабільнасьці фінансавых рынкаў на фоне пашырэньня эпідэміі каранавірусу, паведаміла агенцтву «Інтэрфакс-Захад» знаёмая з сытуацыяй крыніца ў фінансавых колах. «Разьмяшчэньня ня будзе. Дакладней, будзе, але пазьней. Рынкі з глузду зьехалі ад каранавірусу», — заявіў суразмоўца агенцтва.
У Міністэрстве фінансаў Беларусі кажуць, што разьмяшчэньне эўрааблігацый адбудзецца цягам 2020 году.
«Беллегпрам» паабяцаў па паўмільёна масак на дзень
Прадпрыемства дзяржаўнага «Беллегпраму» будуць шыць па 550 тысячаў мэдычных масак на дзень, перадае БелТА заяву канцэрну.
Пад гэтую мэту часова перапрафілююць шэраг прадпрыемстваў, агулам шыць маскі будуць 15 прадпрыемстваў.
На момант публікацыі, як сьцьвярджаецца, замоўнікам ужо паставілі 1,2 млн масак «Беллегпраму». Гэтыя маскі шматразовыя, вырабленыя з бавоўны ў чатыры пласты.
Пры тым звычайныя маскі (калі гэта не адмысловыя фільтры паветра) не бароняць ад COVID-19 тых, хто іх носіць, а прадухіляюць заражэньне вірусамі іншых людзей, калі маску носіць хворы чалавек. Для прафіляктыкі заражэньня новым каранавірусам па-ранейшаму рэкамэндуюць пазьбягаць кантактаў зь людзьмі, якія маюць сымптомы рэсьпіраторных інфэкцыяў, рэгулярна мыць рукі, не наведваць рэгіёны ўспышак вірусу і гэтак далей.
Беражыце E-mail. Пад выглядам інфармацыі пра каранавірус рассылаюць кампутарны вірус
Сьледчы камітэт Беларусі расказаў, што распачаў крымінальныя справы аб несанкцыянаваным доступе да скрыняў электроннай пошты ўстановаў аховы здароўя.
12 лютага са скрыняў РНПЦ пульмуналёгіі і фтызыятрыі, а таксама Менскага занальнага цэнтру гігіены і эпідэміялёгіі былі разасланыя паведамленьні пра тое, што ў Беларусі нібыта выявілі ўжо шмат выпадкаў COVID-19 (на той момант ня выявілі ніводнага, па стане на 5 сакавіка — 6 выпадкаў). Пры чым у лістах быў нібыта PDF-файл, а напраўду скрыпт спампоўкі шкоднай праграмы.
Абедзьве скрыні былі зарэгістраваныя не на дзяржаўных сэрвісах, а на пошце па адрасе @tut.by. Партал Tut.by заяўляў, што ніякай «уцечкі базы» паштовых адрасоў не было — падазраюць або просты падбор пароля («брутфорс»), або выманьваньне паролю праз фальшывыя старонкі («фішынг»). Ці выконвалі ўладальнікі скрыняў элемэнтарныя правілы бясьпекі, невядома.
У 22 краінах цалкам або часткова зачынілі школы
Па стане на 4 сакавіка ў 22 краінах на трох розных кантынэнтах цалкам або часткова зачынілі школы, каб запаволіць распаўсюд каранавірусу COVID-19, паведамляе ЮНЭСКА.
У 13 краінаў школы зачынілі па ўсёй краіне, што закранула агулам 290,5 мільёна дзяцей: у Аб’яднаных Арабскіх Эміратах, Армэніі, Азэрбайджане, Бахрэйне, Кітаі (уключаючы Ганконг і Макао), КНДР, Іране, Іраку, Італіі, Кувэйце, Лібане, Манголіі і Японіі.
Яшчэ ў дзевяці краінах зачыненыя школы ў асобных раёнах: у Віетнаме, ЗША, Злучаным Каралеўстве Вялікай Брытаніі і Паўночнай Ірляндыі, Карэі, Нямеччыне, Пакістане, Сынгапуры, Тайляндзе, Францыі. Калі гэтыя краіны таксама вырашаць зачыніць на карантын усе школы, гэта пазбавіць яшчэ 180 мільёнаў дзяцей і моладзі магчымасьці наведваць школу.
Азія: новая «спэцыяльная зона» ў Карэі, карантынны востраў у Інданэзіі
У Кітаі, зь якога пачалася ўспышка COVID-19, сытуацыя стабілізуецца: на бягучым тыдні выяўляюць толькі адну-дзьве сотні новых хворых на дзень. Бывала, што Паўднёвая Карэя абганяла Кітай па тэмпах распаўсюду вірусу.
Ды ў Кітаі ня ўсе задаволеныя тым, як змагаліся зь вірусам: дактары заклікалі, як піша Reuters, прыняць папраўкі ў законы, зьвязаныя зь віруснымі захворваньнямі, каб узмацніць правілы карантыну, гарантаваць празрыстасьць і больш дакладна прапісаць абавязкі мясцовых уладаў у барацьбе з хваробамі.
У Паўднёвай Карэі тым часам абвясьцілі «спэцыяльнай зонай кантролю» яшчэ адзін горад — К’янсан, што ў 250 км на поўдзень ад сталіцы, насельніцтвам каля 275 тысячаў чалавек. Успышку ў К’янсане зьвязваюць з домам састарэлых. Але тры чвэрці ўсіх выпадкаў COVID-19 у Паўднёвай Карэі зьвязаныя зь іншай «спэцыяльнай зонай» — вакол гораду Тэгу. Там успыўку зьвязвалі з рэлігійнай сэктай.
Што з распаўсюдам COVID-19 у Паўночнай Карэі, невядома. Уцекачы, як піша «Голас Амэрыкі», засьцерагаюць, што ачагом распаўсюду можа стаць паўночнакарэйскае войска, што жыве ў цесных бараках. Акрамя таго, 43% жыхароў КНДР недаядаюць, што спрыяе распаўсюду інфэкцыяў.
У Інданэзіі, дзе пакуль пацьвердзілі толькі два выпадкі COVID-19, вырашылі ператварыць былы лягер для віетнамскіх уцекачоў на нежылым востраве ў шпіталь і карантынны цэнтар для інфэктаваных на новы каранавірус, піша The Jakarta Post. Плошча вострава, які зьбіраюцца аддаць пад карантын, складае каля 80 км² — крыху менш за Баранавічы.
ЗША: надзвычайны стан у Каліфорніі і законапраект пра экстранае фінансаваньне
У Злучаных Штатах колькасьць памерлых ад COVID-19 дасягнула 11, піша Reuters, а новыя выпадкі фіксуюць у мэгаполісах: Нью-Ёрку і Лос-Анжэлесе. Агулам па Штатах зафіксавалі 159 выпадкаў.
Першым памерлым у Каліфорніі стаў чалавек сталага веку, які ўжо меў праблемы са здароўем і мог заразіцца падчас круізу ад Сан-Францыска да Мэксыкі на караблі Grand Princess. Гэта стала першай сьмерцю за межамі штату Вашынгтон. Губэрнатар Каліфорніі пасьля першай сьмерці ад COVID-19 у сваім штаце абвясьціў надзвычайнае становішча.
Як перадае «Голас Амэрыкі», ніжняя палата амэрыканскага парлямэнту ўхваліла законапракт аб экстраным фінансаваньні захадаў у барацьбе з новым каранавірусам. Калі праект ухваліць верхняя палата (гэта можа адбыцца да канца тыдня), на гэтую барацьбу выдаткуюць 8,3 млрд даляраў — у тым ліку гроўшы пойдуць на пошук вакцыны і стварэньне тэстаў для выяўленьня хваробы.
Эўропа: звыш 100 памерлых у Італіі, прыход вірусу ў Польшчу і Ўкраіну
Найбольшы ў Эўропе распаўсюд новага каранавірусу фіксуюць у Італіі — там колькасьць хворых перавысіла тры тысячы, тады як у Францыі набліжаецца толькі да трох соцень, у Нямеччыне перавысіла дзьве з паловай сотні, у Гішпаніі перавысіла дзьве сотні. Памерлых ад COVID-19 у Італіі 107, у Францыі 4, у Гішпаніі 2, у Сан-Марына 1, а ў іншых эўрапейскіх краінах пра памерлых не паведмляюць.
Днём раней улады Італіі пацьвердзілі, што ў краіне на 10 дзён зачыняюцца ўсе мясцовыя школы і ўнівэрсытэты — у сувязі з успышкай новага каранавірусу. У бліжэйшыя 30 дзён спартовыя матчы, у тым ліку футбольныя ў Сэрыі А, будуць праходзіць без гледачоў.
За апошні час вірус SARS-CoV-2 прыйшоў у чатыры новыя краіны: Польшчу і Ўкраіну ў Эўропе, Аргентыну і Чылі ў Паўднёвай Амэрыцы.
- На раніцу 5 сакавіка ў сьвеце зафіксавалі 95,5 тысячы выпадкаў COVID-19: каля 80,5 тысячы ў Кітаі, каля 5,8 тысячы ў Паўднёвай Карэі, каля 3,1 тысячы у Італіі, каля 2,9 тысячы ў Іране.
- Ад хваробаў, што выклікаў новы каранавірус, у сьвеце памерлі 3286 чалавек: 3015 у Кітаі, 107 у Італіі, 92 у Іране, 35 у Паўднёвай Карэі.
- Выпісалі здаровымі 53,7 тысячы пацыентаў, у цяжкім стане застаюцца 6,4 тысячы пацыентаў.
- Беларусі па-ранейшаму пацьверджаныя 6 выпадакаў COVID-19. Усе адчуваюць сябе задавальняльна.
У Італіі праз каранавірус закрываюць усе школы і ўнівэрсытэты
Улады Італіі пацьвердзілі інфармацыю ў СМІ, што ў краіне на 10 дзён зачыняюцца ўсе мясцовыя школы і унівэрсытэты — у сувязі з успышкай новага каранавірусу, ахвярамі якога там сталі ўжо 107 чалавек.
Мянчук хацеў перапрадаць 12 тысяч масак праз сацсеткі
Мянчук закупаў маскі ў Расеі і незаконна перапрадаваў праз сацсеткі ў Беларусі. Затрыманьне адбылося падчас адной са зьдзелак. У яго канфіскавалі 12800 масак на суму каля 10800 рублёў, паведаміла ў Тэлеграме прэс-сакратарка МУС Беларусі Вольга Чамаданава.
Межы закрываць ня будуць, дыстанцыйнае начучаньне — толькі ў БНТУ. Улады пракамэнтавалі пашырэньне каранавірусу ў Беларусі
4 сакавіка Міністэрства замежных справаў і Міністэрства аховы правялі сумесны брыфінг аб сытуацыі з каранавірусам у Беларусі.
На 4 сакавіка пацьверджаныя 6 выпадкаў каранавірусу ў Беларусі, ва ўсіх шасьцярых захворваньне праходзіць бессымптомна, паведаміла намесьніца міністра аховы здароў, галоўны санітарны лекар Натальля Жукава.
Пад кантроль ўзялі каля 14 тысяч чалавек, якія былі ў неспрыяльных краінах. Каля 400 чалавек адтуль ужо выбылі, частку назіраюць у хатніх умовах.
Паводле ўладаў, няма неабходнасьці закрываць межы, ня будзе і абмежаваньняў у кантактах. Магчыма, некаторыя масавыя мерапрыемствы будуць перанесеныя на больш позьні тэрмін. Толькі адно ВНУ перавялі на дыстанцыйнае начучаньне — БНТУ. 85% студэнтаў БНТУ агледзелі, яны ўсе здаровыя.
Усіх, хто вяртаецца з Італіі (нават у расейскіх грамадзян), абсьледуюць лябараторна і выдаюць адпаведны дакумэнт-даведку, што яны прайшлі абсьледаваньне, дадала Жукава.
У Італіі і Францыі вырасьлі продажы раману «Чума» Альбэрта Камю
За месяц у Італіі раман падняўся з 71 на 3 месца продажаў, у Францыі да раману таксама падвысілася цікаўнасьць. Тамтэйшыя СМІ зьвязваюць гэта з успышкай COVID-19.
Раман быў апублікаваны ў 1947 годзе, расказвае пра жыцьцё альжырскага гораду ў час эпідэміі чумы 1940 году. Як адзначае RFI, чума там выкарыстаная хутчэй як алегорыя, а напраўду раман расказвае пра «эпідэмію» нацызму ў Эўропе.
Першы выпадак каранавірусу зафіксавалі ў Польшчы
Выпадак зафіксаваны ў горадзе Зялёна Гура, дзе жыве каля 150 тысяч чалавек. Інфікаваны прыбыў зь Нямеччыны, пачувацца добра. Усіх людзей, якія зь ім кантактавалі, адправілі на карантын.
Польшча заставалася апошняй геаграфічнай суседкай Беларусі, дзе не фіксавалі COVID-19.