Беларусь мае неабходныя нафтавымі рэсурсы, каб забясьпечваць працу нафтаперапрацоўчых заводаў у лютым, паведамілі БелаПАН у канцэрне «Белнафтахім».
Сярод крыніц сыравіны назвалі пастаўкі з Расіі і Нарвэгіі, а таксама запасы на заводах і ўласную здабычу. Спыняць вытворчасьць не плянуецца сказаў прэс-сакратар «Белнафтахіма» Аляксандр Цішчанка:
«Пакуль ёсьць рэсурсы, якія дазваляюць усё падтрымліваць. Будзем цягнуць. Спыняць ніхто нічога не плянаваў».
Паводле яго слоў, заводы працягваюць працу на мінімальнай загрузцы, каб забясьпечваць у першую чаргу патрэбнасьці ўнутранага рынку ў паліве. Сярэдняя мінімальная сутачная загрузка складае ад 16 да 20 тысяч тон нафты. Летась на заводах у Мазыры і Наваполацку перапрацоўвалі каля 50 тысяч тон нафты ў суткі.
З 1 студзеня 2020 гады два беларускіх НПЗ працуюць на мінімальнай загрузцы з-за адсутнасьці доўгатэрміновых кантрактаў з расейскімі пастаўшчыкамі. Нафта пастаўляецца па дамоўленасьці з расейскай групай кампаній «Сафмар», якая належыць расейскаму бізнэсоўцу Міхаілу Гуцэрыеву. У студзені на абодва заводы плянавалася паставіць 500 тысяч тон, у лютым — 250 тысяч тон.
У студзені Беларусь закупіла 80 тысяч тон нафты з Нарвэгіі. Яе пачалі перапрацоўваць на заводзе «Нафтан» у канцы студзеня. Беларусь таксама здабывае ўласную нафту. У мінулым годзе гадавыя аб’ёмы здабычы склалі 1,69 млн тонаў.
Беларуска-расейскі «нафтавы канфлікт». Асноўнае
- 11 красавіка 2019 году Аляксандар Лукашэнка прыгразіў закрыць на рамонт нафтаправод, па якім расейская нафта ідзе ў Эўропу. Гэтак ён адрэагаваў на абмежаваньні, якія Расея ўвяла на імпарт прадуктаў харчаваньня зь Беларусі.
- Гаворка ідзе пра паўднёвую галіну нафтаправоду «Дружба», апэратар якой — ААТ «Гомельтранснафта Дружба». Па ёй ідзе транзыт расейскай нафты ў Польшчу, Украіну, Вугоршчыну, Нямеччыну.
- 21 красавіка Беларусь прыняла рашэньне часова абмежаваць экспарт нафтапрадуктаў, бо беларускія НПЗ атрымалі партыю няякаснай расейскай нафты: узровень хлярыдаў вырас у 20 і больш разоў, сьцьвярджае афіцыйны Менск. На Мазырскім НПЗ заявлі, што няякасная нафта пашкодзіла дарагое абсталяваньне.
- Расейскі бок прызнаў факт пастаўкі няякаснай нафты.
- Беларускі бок заяўляе, што страты ад спыненьня паставак могуць скласьці некалькі сотняў мільёнаў даляраў.
- 23 красавіка намесьнік гендырэктара Беларускай нафтавай кампаніі (БНК) Сяргей Грыб паведаміў, што празь няякасную расейскую нафту Беларусь вымушана прыпыніла экспарт сьветлых нафтапрадуктаў (бэнзін і дызпаліва) ва Ўкраіну, Польшчу і краіны Балтыі.
- Таксама Грыб заявіў, што Беларусь гатовая да канца году пачаць альтэрнатыўныя расейскай пастаўкі нафты: адзін з варыянтаў — праз марскія парты краінаў Балтыі, другі — праз Адэсу і нафтправод Адэса—Броды на Мазырскі НПЗ.
- Пытаньні да якасьці расейскай нафты паўсталі на фоне спрэчак Беларусі і Расеі, калі Масква адхіліла прапанову Менску павялічыць тарыф на транзыт нафты адразу на 23,1% у сувязі з захадамі экалягічнай бясьпекі.
-
26 красавіка расейцы завялі крымінальную справу аб забруджваньні нафты. Меркавана, хлёрарганіку ўкінулі праз прыватны трубаправод у Самарскай вобласьці.
27 красавіка прэмʼер-міністар Расеі Дзьмітры Мядзьведзеў загадаў цягам 7 дзён пакараць адказных за забруджаньне нафты ў трубапровадзе «Дружба».
- 20 стузеня 2020 году Беларусь дамовілася з расейскім бокам пра падыходы і мэтодыку кампэнсацыі за забруджаную нафту
