Лінкі ўнівэрсальнага доступу

Украінская кампанія праз суд патрабуе грошы за пастаўкі на БелАЭС


Будоўля БелАЭС, архіўнае фота

Прыватная кампанія «Київське центральне конструкторське бюро арматуробудування» патрабуе праз суд ад беларускага ТАА «ЭнэргаСпэцАрматура» разьлічыцца з запазычанасьцю за пастаўку ў 2018 годзе арматуры для будаўніцтва другога блёку Беларускай АЭС.

Паводле матэрыялаў справы, якая знаходзіцца ў Гаспадарчым судзе Кіева, агульная вартасьць кантракту, падпісанага на пачатку сьнежня 2018 году, складала 11,3 мільёна расейскіх рублёў (386,8 тысячы беларускіх рублёў у эквіваленце).

У сваім пазове ўкраінская кампанія сьцьвярджае, што цягам сьнежня 2018 году выканала ўсе ўмовы кантракту, але менскае ТАА «ЭнэргаСпэцАрматура» пералічыла толькі 8,453 мільёна расейскіх рублёў (289,1 тысячы беларускіх рублёў). Амаль год беларуская кампанія не разьлічваецца з запазычанасьцю, нягледзячы на тое, што кантракт прадугледжваў аплату паслуг цягам 175 дзён ад даты адгрузкі арматуры.

Гаспадарчы суд Кіева прыняў пазоў кіеўскай кампаніі і прапанаваў абодвум бакам даць неабходную інфармацыю для разгляду справы ў судовым працэсе. Папярэдняе судовае пасяджэньне прызначана на 13 красавіка.

Украінская кампанія патрабуе ад беларускага боку аплаціць запазычанасьць у памеры 2,857 мільёна расейскіх рублёў (97,7 тысячы беларускіх рублёў).

Што варта ведаць пра БелАЭС

  • Беларуская АЭС ад 2011 году ўзводзіцца пад Астраўцом, што ў Горадзенскай вобласьці, у 22 км ад мяжы зь Літвой, у каля 50 км ад Вільні і 125 км ад Менску.

  • Запуск першага энэргаблёку запляналі на пачатак 2020 году, другога — на ліпень 2020-га. Першапачаткова запуск плянаваўся на 2018 год, Аляксандар Лукашэнка заяўляў, што тэрміны сарвала Расея.
  • Для яе будаўніцтва выбраны праект АЭС-2006 — тыпавы расейскі праект атамнай станцыі новага пакаленьня з выкарыстаньнем вода-вадзянога энэргетычнага рэактара ВВЭР-1200. Паводле такога ж праекту ў Расеі працуюць блёкі Новаваронескай АЭС і Ленінградзкай АЭС-2.
  • Астравецкая АЭС узводзіцца расейцамі — дзяржаўнай кампаніяй «Росатом» — за кошт крэдыту Расеі. Беларусь пазычыла да 10 млрд даляраў для фінансаваньня 90% кошту будаўніцтва двух энэргаблёкаў АЭС. Пагашэньне крэдыту пачынаецца праз 6 месяцаў з даты ўводу ў эксплёатацыю АЭС, але не пазьней за 1 красавіка 2021 году. Беларусь просіць Расею падоўжыць крэдыт на 10 гадоў.
  • На станцыі будуць два энэргаблёкі з рэактарамі ВВЭР-1200 (В-491) магутнасьцю да 1200 МВт кожны. То бок праектная магутнасьць АЭС — 2,4 тысячы МВт. Калі АЭС запрацуе на поўную магутнасьць, станцыя дасьць 18 мільярдаў кіляват-гадзін на год — палову таго, колькі цяпер спажывае Беларусь.
  • Літва ня раз ставіла пад сумнеў абраньне для будаўніцтва АЭС астравецкай пляцоўкі. Краіна называла 10 прычынаў не будаваць БелАЭС. Літва пратэстуе супраць БелАЭС на найвышэйшым дзяржаўным узроўні, выказвае пратэсты ў міжнародных структурах. Літву падтрымлівае прэзыдэнтка Эстоніі.
  • Пляцоўка Астравецкай АЭС была прызнаная небясьпечнай яшчэ ў 1993 годзе. Тады было знойдзена 7 прыдатных пляцовак, 15 умерана прыдатных і 6 непрыдатных. Астравецкая пляцоўка трапіла ў лік апошніх.
  • Улады і чыноўнікі Беларусі нясьпешна рэагуюць на паведамленьні пра інцыдэнты на будаўніцтве ўласнай атамнай станцыі. Звычайна пра здарэньні на БелАЭС афіцыйна расказваюць пасьля таго, як зьвесткі пра іх зьяўляюцца ў СМІ — так, пра падзеньне корпуса рэактара расказалі толькі пасьля міжнароднага ціску. Урэшце корпус, які ўпаў, замянілі (расейцы зьбіраюцца выкарыстаць яго на іншай АЭС). Новы выпадкова стукнулі аб слуп, але пашкоджаньняў ня выявілі, вырашылі не мяняць корпус другі раз.
  • Адпрацаванае ядзернае паліва зь БелАЭС застанецца ў Беларусі. Эколягі сьцьвярджаюць, што Беларусь выбірае самы дарагі і небясьпечны спосаб захоўваць адпрацаванае паліва з АЭС.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG