Лінкі ўнівэрсальнага доступу

Беларусь мае пракансультавацца з Расеяй адносна транзыту казахстанскай нафты 


Ілюстрацыйнае фота

Аляксандар Лукашэнка падчас перамоваў з казахстанскім калегам Касым-Жамартам Такаевым заявіў, што Беларусь надае асаблівую ўвагу дыфэрсыфікацыі паставак нафты. А таму надзвычай зацікаўленая ў імпарце гэтай сыравіны з Казахстану, паведамляе БелТА.

Ускладняе гэтую задачу лягістыка. Таму, удакладніў Лукашэнка, бліжэйшым часам Беларусь пракансультуецца з Расеяй адносна магчымасьці транзыту нафты празь яе тэрыторыю.

«Мы дамовіліся, што бліжэйшым часам правядзём кансультацыі з Масквой, паколькі транзыт казахстанскай нафты — калі гэта стане магчыма — будзе ажыцьцяўляцца трубаправодным транспартам праз тэрыторыю Расеі», — патлумачыў Лукашэнка.

Раней стала вядома, што Казахстан і Беларусь узгаднілі тэкст пагадненьня аб пастаўцы нафты і нафтапрадуктаў. Аднак чыноўнікі ўдакладнілі, што 25 кастрычніка, падчас візыту Лукашэнкі ў Казахстан, пагадненьне ня будзе падпісанае, таму што спачатку неабходна правесьці ўнутрыдзяржаўныя працэдуры.

Пакуль у тэксьце дамовы няма і дакладных аб’ёмаў меркаваных паставак, хоць раней фігуравала лічба 3,5 млн тон. Беларусь набывае ў Расеі для ўнутраных мэтаў і на перапрацоўку прыкладна 20 млн тон нафты штогод.

Беларуска-расейскі «нафтавы канфлікт». Асноўнае

  • 11 красавіка Аляксандар Лукашэнка прыгразіў закрыць на рамонт нафтаправод, па якім расейская нафта ідзе ў Эўропу. Гэтак ён адрэагаваў на абмежаваньні, якія Расея ўвяла на імпарт прадуктаў харчаваньня зь Беларусі.
  • Гаворка ідзе пра паўднёвую галіну нафтаправоду «Дружба», апэратар якой — ААТ «Гомельтранснафта Дружба». Па ёй ідзе транзыт расейскай нафты ў Польшчу, Украіну, Вугоршчыну, Нямеччыну.
  • 21 красавіка Беларусь прыняла рашэньне часова абмежаваць экспарт нафтапрадуктаў, бо беларускія НПЗ атрымалі партыю няякаснай расейскай нафты: узровень хлярыдаў вырас у 20 і больш разоў, сьцьвярджае афіцыйны Менск.​

  • Расейскі бок прызнаў факт пастаўкі няякаснай нафты.
  • На Мазырскім НПЗ заявлі, што няякасная нафта пашкодзіла дарагое абсталяваньне.
  • Беларускі бок заяўляе, што страты ад спыненьня паставак могуць скласьці некалькі сотняў мільёнаў даляраў.
  • 23 красавіка намесьнік гендырэктара Беларускай нафтавай кампаніі (БНК) Сяргей Грыб паведаміў, што празь няякасную расейскую нафту Беларусь вымушана прыпыніла экспарт сьветлых нафтапрадуктаў (бэнзін і дызпаліва) ва Ўкраіну, Польшчу і краіны Балтыі.
  • Таксама Грыб заявіў, што Беларусь гатовая да канца году пачаць альтэрнатыўныя расейскай пастаўкі нафты: адзін з варыянтаў — праз марскія парты краінаў Балтыі, другі — праз Адэсу і нафтправод Адэса—Броды на Мазырскі НПЗ.
  • Пытаньні да якасьці расейскай нафты паўсталі на фоне спрэчак Беларусі і Расеі, калі Масква адхіліла прапанову Менску павялічыць тарыф на транзыт нафты адразу на 23,1% у сувязі з захадамі экалягічнай бясьпекі.
  • 26 красавіка расейцы завялі крымінальную справу аб забруджваньні нафты. Меркавана, хлёрарганіку ўкінулі праз прыватны трубаправод у Самарскай вобласьці.

    27 красавіка прэмʼер-міністар Расеі Дзьмітры Мядзьведзеў загадаў цягам 7 дзён пакараць адказных за забруджаньне нафты ў трубапровадзе «Дружба».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG