Лінкі ўнівэрсальнага доступу

Міністар замежных спраў Літвы нагадаў новаму амбасадар Беларусі пра засьцярогі наконт БелАЭС


БелАЭС у Астраўцы

Міністар замежных спраў Літвы Лінас Лінкявічус сустрэўся з новым амбасадарам Беларусі ў Літве, Валерыем Бараноўскім. Яны абмеркавалі пытаньня бясьпекі Беларускай АЭС і сытуацыю з правамі чалавека ў Беларусі, паведамляе delfi.lt

Лінкявічус заявіў, што Беларусі трэба супрацоўнічаць зь міжнароднымі экспэртамі і пачаць выконваць парады Эўразьвязу па стрэс-тэстах — зрабіць усё магчымае, каб дасягнуць дастатковага ўзроўню бясьпекі на АЭС яшчэ да яе запуску.

«Ядзерная бясьпека і праблема Астравецкай АЭС зьяўляюцца для Літвы аднымі з галоўных пытаньняў у двухбаковых адносінах і на міжнародным парадку дня» — сказаў міністар замежных спраў Літвы.

Паводле яго, ня толькі выконваньне міжнародных абавязкаў у галіне ядзернай бясьпекі, але і патэнцыйнае палепшаньне сытуацыі з правамі чалавека ў краіне маглі б стварыць моцны станоўчы ўплыў на адносіны паміж Беларусьсю і Эўразьвязам.

«Літва і Беларусь — суседзі, і для нас важны ўсе пытаньня. Як і раней, мы будзем прагматычнымі і падтрымаем тыя праекты і ініцыятывы, якія пайдуць на карысьць як ЭЗ, так і нашым двухбаковым адносінам» — сказаў Л. Лінкявічус.

Падчас сустрэчы з амбасадарам Беларусі Лінас Лінкявічус таксама падняў тэму далейшага разьвіцьця супрацоўніцтва паміж краінамі ў сфэрах эканомікі, транспарту, культуры, адукацыі і ня толькі.

«Літва зацікаўлена ў павелічэньні колькасьці турыстаў зь Беларусі і ў спрашчэньні візавага рэжыму паміж Эўразьвязам і Беларусьсю», — сказаў міністар.

Што варта ведаць пра БелАЭС

  • Беларуская АЭС ад 2011 году ўзводзіцца пад Астраўцом, што ў Горадзенскай вобласьці, у 22 км ад мяжы зь Літвой, у каля 50 км ад Вільні і 125 км ад Менску.

  • Запуск першага энэргаблёку запляналі на пачатак 2020 году, другога — на ліпень 2020-га. Першапачаткова запуск плянаваўся на 2018 год, Аляксандар Лукашэнка заяўляў, што тэрміны сарвала Расея.
  • Для яе будаўніцтва выбраны праект АЭС-2006 — тыпавы расейскі праект атамнай станцыі новага пакаленьня з выкарыстаньнем вода-вадзянога энэргетычнага рэактара ВВЭР-1200. Паводле такога ж праекту расейцы ў 2018 годзе запусьцілі Ленінградзкую АЭС-2.
  • Астравецкая АЭС узводзіцца расейцамі — дзяржаўнай кампаніяй «Росатом» — за кошт крэдыту Расеі. Беларусь пазычыла да 10 млрд даляраў для фінансаваньня 90% кошту будаўніцтва двух энэргаблёкаў АЭС. Пагашэньне крэдыту пачынаецца праз 6 месяцаў з даты ўводу ў эксплёатацыю АЭС, але не пазьней за 1 красавіка 2021 году. Беларусь просіць Расею падоўжыць крэдыт на 10 гадоў.
  • На станцыі будуць два энэргаблёкі з рэактарамі ВВЭР-1200 (В-491) магутнасьцю да 1200 МВт кожны. То бок праектная магутнасьць АЭС — 2,4 тысячы МВт. Калі АЭС запрацуе на поўную магутнасьць, станцыя дасьць 18 мільярдаў кіляват-гадзін на год — палову таго, колькі цяпер спажывае Беларусь.
  • Літва ня раз ставіла пад сумнеў абраньне для будаўніцтва АЭС астравецкай пляцоўкі. Краіна называла 10 прычынаў не будаваць БелАЭС. Літва пратэстуе супраць БелАЭС на найвышэйшым дзяржаўным узроўні, выказвае пратэсты ў міжнародных структурах. Літву падтрымлівае прэзыдэнтка Эстоніі.
  • Пляцоўка Астравецкай АЭС была прызнаная небясьпечнай яшчэ ў 1993 годзе. Тады было знойдзена 7 прыдатных пляцовак, 15 умерана прыдатных і 6 непрыдатных. Астравецкая пляцоўка трапіла ў лік апошніх.
  • Улады і чыноўнікі Беларусі нясьпешна рэагуюць на паведамленьні пра інцыдэнты на будаўніцтве ўласнай атамнай станцыі. Звычайна пра здарэньні на БелАЭС афіцыйна расказваюць пасьля таго, як зьвесткі пра іх зьяўляюцца ў СМІ — так, пра падзеньне корпуса рэактара расказалі толькі пасьля міжнароднага ціску. Урэшце корпус, які ўпаў, замянілі (расейцы зьбіраюцца выкарыстаць яго на іншай АЭС). Новы выпадкова стукнулі аб слуп, але пашкоджаньняў ня выявілі, вырашылі не мяняць корпус другі раз.
  • Адпрацаванае ядзернае паліва зь БелАЭС застанецца ў Беларусі. Эколягі сьцьвярджаюць, што Беларусь выбірае самы дарагі і небясьпечны спосаб захоўваць адпрацаванае паліва з АЭС.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG