16 сакавіка актывіста Леаніда Кулакова падчас пікетаваньня рэстарацыі «Поедем поедим», што каля Курапатаў, зьбіў аўтамабіль. Аўтамабіль зь месца здарэньня зьехаў.
Паводле Кулакова, у суботу надвячоркам да рэстарацыі падʼехаў легкавік з маладой жанчынай за стырном. Актывісты прапанавалі пасажырам улёткі, тыя браць адмовіліся.
«Кіроўца раптам націснула на газ ды ўзяла правей. А тут я стаю. Зачапіла за бок гэтак, што амаль на 360 градусаў перавярнуўся і паваліўся на дарогу», — расказаў Леанід Кулакоў. Дзякуючы тоўстай вопратцы ад падзеньня траўмаў ён не атрымаў.
Інспэктары ДАІ знайшлі аўтамабіль, які зьехаў. Але пратакол склалі на Кулакова — за тое, што «замінаў праезду».
18 сакавіка Леанід Кулакоў падаў скаргу ў Менскую абласную ДАІ. Ён ня лічыць сябе вінаватым і сьцьвярджае, што правілаў не парушаў.
Атрымаць апэратыўны камэнтар ад ДАІ не ўдалося.
Грошы на экспэртызу пасьля мінулага ДТЗ Кулакову сабралі праз ахвяраваньні
Летась у чэрвені Леаніда Кулакова таксама зьбіў аўтамабіль на пікеце каля рэстарацыі. Тады ён трапіў у шпіталь, дзе яму лячылі пералом рукі. Але калі справа дайшла да суду, прадстаўнік раённага аддзелу судовых экспэртызаў дыягназ не пацьвердзіў.
Актывіст вымушаны быў зьвярнуцца ў Дзяржаўны камітэт судовых экспэртызаў. Там за правядзеньне паглыбленай экспэртызы яму выставілі рахунак на 1871 рубель.
«Мінула меней за месяц, і праз добраахвотныя складкі гэтыя грошы сабралі», — паведаміў Кулакоў.
Пратэсты супраць рэстарацыі ля Курапатаў. Што важна ведаць
Што адбываецца. Грамадзкія і палітычныя актывісты з чэрвеня 2018 году пікетуюць рэстаран «Поедем поедим», што месьціцца ля Курапатаў. За 50 мэтраў ад гэтага месца ў 1930-я адбываліся масавыя расстрэлы. Карнікі НКВД расстралялі тут, па розных ацэнках, ад 30 тысяч да 250 тысяч чалавек.
З чаго ўсё пачалося. Будоўля забаўляльнага комплексу пад назвай «Бульбаш-хол» пачалася ў 2012 годзе ў ахоўнай зоне Курапатаў. У 2014-м ахоўную зону зьменшылі. Гісторыя будаўніцтва і змаганьня тут.
Рэстаран каля Курапат не парушаў зоны аховы? МАПЫ
1 чэрвеня 2018 рэстаран «Поедем поедим» пачаў рэклямавацца ў інтэрнэце я, а ўвечары 5 чэрвеня меркавана пачаў працаваць.
З таго часу грамадзкія актывісты штодня пікетуюць рэстаран, патрабуючы яго закрыцьця і сьцьвярджаючы, што ён парушае ахоўную зону вакол народнага мэмарыялу і не адпавядае нормам грамадзкай маралі.
Як праходзяць пратэсты. Са сьцягамі і плакатамі абаронцы Курапатаў блякавалі транспарт, які накіроўваўся на тэрыторыю рэстарана. За гэта рэгулярна атрымліваюць штрафы ад ДАІ за парушэньне ПДД, а таксама іх штрафуюць і садзяць на суткі за несанкцыянаванае пікетаваньне. Некаторыя актывісты маюць ужо па некалькі дзясяткаў штрафаў.
За час пікетаваньня «Поедем поедим» неаднаразова адбываліся сутычкі паміж актывістамі і наведнікамі ды ахоўнікамі рэстарана, заблякаваныя аўтамабілі, наяжджалі на пікетоўцаў, актывісту нават зламалі руку.
Рэакцыя ўласьнікаў. Не дачакаўшыся рэакцыі ўладальнікаў рэстарана на патрабаваньне закрыць або перанесьці ўстанову, 18 ліпеня абаронцы Курапатаў заклікалі да байкоту ўсіх рэстаранаў аднаго з сузаснавальнікаў рэстарацыі бізнэсоўца Леаніда Зайдэса.
20 ліпеня на сустрэчы з журналістамі Зайдэс адмовіўся закрываць «Поедем поедим», але прапанаваў даць грошы на мэмарыялізацыю Курапатаў. Гэта не задаволіла пікетоўцаў, і яны працягнулі пікетаваньне.
Хто адказны за рэстаран у Курапатах. Сьпіс асобаў
Прадстаўнікі партый і рухаў, якія ўдзельнічаюць у Курапацкай вахце, зацьвердзілі сьпіс чыноўнікаў, уладальнікаў, агрэсіўных наведнікаў рэстарацыі «Поедем поедим», якім яны абвясьцілі пэрсанальны байкот. Усяго ў сьпісе 35 прозьвішчаў.
Бізнэсовец Аркадзь Ізраілевіч падаў у суд на незалежнае выданьне «Новы час» і аўтара расьсьледаваньня пра забудову ў Курапатах Дзяніса Івашына, які дапусьціў юрыдычную сувязь паміж ім і рэстаранам.
7 адказаў на наіўныя пытаньні пра рэстаран ля Курапатаў і пратэсты супраць яго
Ня першы чын у Курапатах. Першая грамадзкая абарона Курапатаў адбывалася ў 2001–2002 гг., калі моладзь пратэставала супраць пашырэньня кальцавой дарогі праз урочышча. На пачатку 2017-га актывісты адстаялі Курапаты ад будоўлі бізнэс-цэнтру.
Сталінскія рэпрэсіі і Курапаты
У Беларусі масавыя рэпрэсіі пачаліся яшчэ з прыходам да ўлады бальшавікоў — у 1917 годзе. А скончыліся, калі памёр Сталін — у 1953-м. Дасьледчыкі мяркуюць, што іх зазналі як мінімум 600 тысяч чалавек. Паводле іншых ацэнак, гэтая лічба дасягае 1,4 мільёна. Але дакладная колькасьць невядомая — КДБ дагэтуль не раскрыў архівы.
Паводле розных падлікаў, ад 30 да 250 тысяч чалавек карнікі НКВД расстралялі з 1937 па 1941 год у Курапатах — лясным масіве пад Менскам.
