Лінкі ўнівэрсальнага доступу

«Разварушыла асінае гняздо». Якой памятаюць у Бабруйску Насьцю Рыбку


Насьця Рыбка

Лёсам 28-гадовай грамадзянкі Беларусі Анастасіі Вашукевіч (Насьці Рыбкі), замяшанай у расейскі палітычны скандал, заапекваўся Аляксандар Лукашэнка.

Карэспандэнт Свабоды пабываў у Бабруйску і распытаў сябровак, суседзяў і настаўнікаў, якой яны памятаюць славутую сваімі сэксуальнымі прыгодамі Анастасію Косьціну (дзявочае прозьвішча Вашукевіч).

Удзельніца «сэкс-трэнінгаў» Насьця Рыбка стала славутай пасьля расьсьледаваньня расейскага апазыцыянэра Аляксея Навальнага магчымых карупцыйных сувязяў мільярдэра Алега Дзерыпаскі і намесьніка кіраўніка ўраду Расеі Сяргея Прыходзькі. У ім палітык выкарыстоўваў відэазапісы і цытаты з кнігі беларускі.

«Канфліктавала з маці»

Дом, у якім жыла Анастасія Косьціна разам з прыёмнай маці Людмілай Іванаўнай, месьціцца на вуліцы Ўрыцкага. Цагляны дзевяціпавярховік непадалёк ад гарадзкога цэнтру. З вокнаў відаць бабруйская крэпасьць і лядовы палац. Цяпер у іхнай кватэры гаспадараць іншыя людзі, якія, са слоў суседзяў, зьяўляюцца дужа рэдка.

Дом, у якім жыла Насьця Рыбка
Дом, у якім жыла Насьця Рыбка

Насупраць жыве маладая сям’я. Гаспадыня кажа, што разам з Насьцяй гадаваліся. Хадзілі на плаваньне і танцы, гулялі ў двары. Апошнія гадоў пяць ня бачыліся. Назваць былую суседку сяброўкай суразмоўца не адважылася.

«Насьця, бывала, канфліктавала з маці, але для падлетка гэта звычайная рэч. Яе асабістым жыцьцём не цікаўлюся. Нашы жыцьцёвыя дарогі разышліся. Ведаю, што яна рана выйшла замуж. Нарадзіла сына. Часта была ў разьездах. Прывозіла грошы. Яе сына гадавала Людміла Іванаўна. Хлопчык ня раз да нас забягаў», — расказала былая суседка Насьці Косьцінай.

Пра падзеі, зьвязаныя з арыштам Анастасіі, суразмоўца чытала ў інтэрнэце.

«Кожны робіць сваё жыцьцё такім, якім бачыць яго», — адказала яна на пытаньне пра стаўленьне да занятку былой суседкі.

«Дзяўчынка была з характарам. Сваволіла»

Прыёмная маці Насьці працавала ў адной з бабруйскіх лякарняў афтальмолягам. Лічылася добрым спэцыялістам. Паводле суседзяў, як выйшла на пэнсію, падпрацоўвала ў дзіцячай паліклініцы. Узяла Насьцю за дачку немаўлём. Як кажуць суседзі, дапамагала гадаваць малую і маці Людмілы Іванаўны, якой ужо няма ў жывых.

«Людміле Іванаўне было няпроста з Насьцяй. Дзяўчынка была з характарам і часта ўпадала ў гістэрыку, калі нешта было не па ёй. Сваволіла. Зь сёмага паверху кідала на мінакоў пакеты з вадою», — прыгадала суседка Настасьсі па пад’езьдзе.

Насьця Рыбка пасьля суду ў Тайляндзе, жнівень 2018 году
Насьця Рыбка пасьля суду ў Тайляндзе, жнівень 2018 году

На пахаваньні маці Анастасію суседзі не заўважылі

Людмілы Іванаўны ня стала тры гады таму. Суседзі не заўважылі Насьцю на пахаваньні маці. Пакуль жывая, яна займалася выхаваньнем унука — сына Анастасіі.

Муж Насьці Рыбкі Мікалай Вашукевіч летась расказваў Свабодзе, што не жыве разам з жонкай «гады два — два з паловай». Пазнаёміліся недзе ў 2010 годзе, зарэгістравалі шлюб у 2014-м.

«Сын жыве са мной. Насьця мае магчымасьць бачыцца зь ім», — сказаў Мікалай Вашукевіч.

«Вядома, было няпроста пажылой жанчыне гадаваць дзіця, але такая была яе доля, — кажа яшчэ адна суседка Людмілы Іванаўны. — Я памятаю ейнага ўнука. Неяк нам давялося яго забраць да сябе. Малы блукаў па двары без прыгляду, і калі мы высьветлілі, чый ён, то пакінулі чакаць бабулю ў нас. Паслухмянае было дзіця».

У школе характарызуюць Анастасію, як «далёка не дурную»

Бабруйская школа № 1, у якой вучылася Насьця, стаіць непадалёк ад дома, у якім яна жыла. Дырэктар Генадзь Чарапко адмовіўся гаварыць пра былую вучаніцу, адзначыўшы толькі, што «яна далёка не дурная». Ён выкладаў у яе фізыку.

У школе лічаць, што Анастасія Косьціна сваім жыцьцём «псуе імідж школы і не заслугоўвае таго, каб ёй удзялялі столькі ўвагі».

Школа, у якой вучылася Насьця Рыбка
Школа, у якой вучылася Насьця Рыбка

Адшукаць блізкіх сябровак Настасьсі не ўдалося. Суседзі кажуць, што ў яе іх і не было. Маўляў, дзяўчына цяжка сыходзілася зь людзі і працяглыя ўзаеміны ёй не ўдаваліся. У гэтым яны бачыць прычыну яе нібыта двух няўдалых шлюбаў.

«Беларусь для Анастасіі — дно»

Адна з тых, каго парэкамэндавалі як былую сяброўку, сказала Свабодзе, што Насьця дужа хацела трапіць на тэлевізію і стаць вядомай, а «нашу краіну разглядала як дно ў пляне сваіх амбіцыяў».

«Яна сама вінаватая. Нельга тыкаць „валадарам гэтага сьвету“. Разварушыла асінае гняздо і ня здолела ў час спыніцца», — выказалася яна.

Паводле суразмоўцы, з другім мужам, Мікалаем Вашукевічам, Насьця афіцыйна застаецца ў шлюбе.

Хто такая Насьця Рыбка і чаму мы пра гэта пішам?

28-гадовая грамадзянка Беларусі Насьця Рыбка (Вашукевіч) стала вядомая пасьля расьсьледаваньня расейскага апазыцыянэра Аляксея Навальнага пра магчымыя карупцыйныя сувязі мільярдэра Алега Дзерыпаскі і намесьніка кіраўніка ўраду Расеі Сяргея Прыходзькі.

Улетку 2016 году алігарх і чыноўнік, плаваючы разам на яхце, нібыта абмяркоўвалі ўмяшаньне ў амэрыканскія выбары. На гэтай яхце ў ліку іншых дзяўчат з эскорт-агенцтваў была і Вашукевіч. Пазьней пра тое, што адбывалася на яхце Дзерыпаскі, яна расказала ў сваёй кнізе і ў сацыяльных сетках.

«У Беларусь я больш ні нагой». 10 фрагмэнтаў з кнігі Насьці Рыбкі

У канцы лютага 2018 году Вашукевіч і яшчэ 7 чалавек затрымалі ў Патаі. Паводле ўладаў, яны арганізоўвалі «сэкс-трэнінгі», ня маючы дазволу працаваць у Тайляндзе. У студзені 2019-га затрыманым прысудзілі ўмоўны тэрмін і дэпартацыю.

17 студзеня чатырох дэпартаваных затрымалі ў маскоўскім аэрапорце Шарамецьева. Гэта грамадзяне Беларусі Анастасія Вашукевіч, Андрэй Жэшка, ураджэнец Беларусі Аляксандр Кірылаў (галоўны арганізатар сэкс-трэнінгаў) і грамадзянка Расеі Марыя Жарко. Паводле жонкі Кірылава Крысьціны, затрыманым інкрымінуюць уцягваньне ў заняткі прастытуцыяй (ч. 2 арт. 240 КК РФ).

Турму для Рыбкі замовіў расейскі мільярдэр: доказы Навальнага

22 студзеня Аляксандар Лукашэнка загадаў «тэрмінова заняцца» вызваленьнем Вашукевіч, пасьля яе і Кірылава вызвалілі пад падпіску аб яўцы.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG