Нефармальная сустрэча міністраў замежных спраў дзяржаў — удзельніц «Усходняга партнэрства» пройдзе ў канцы чэрвеня ў Менску.
На ёй міністры падвядуць вынікі Рыскага саміту ініцыятывы «Ўсходняе партнэрства», які адбыўся 21-22 траўня.
Пра гэта паведаміў кіраўнік МЗС Беларусі Уладзімер Макей.
Ён адзначыў, што гэта плянавае мерапрыемства і падобныя саміты праводзяцца ў розных краінах «Усходняга партнэрства».
Перамовы ў такім фармаце адбудуцца ўпершыню ў Менску.
Макей таксама адзначыў, што міністры абмяняюцца «поглядамі на тое, як у будучыні гэтая ініцыятыва будзе разьвівацца», перадае БЕЛТА.