Лінкі ўнівэрсальнага доступу

МІСІЯ МВФ СКОНЧЫЛА ПРАЦУ Ў МЕНСКУ З СУПЯРЭЧЛІВЫМІ ЎРАЖАНЬНЯМІ


Міхал Стэльмак, Менск

Місія Міжнароднага валютнага фонду ўхваліла намер беларускіх уладаў выконваць дамоўленасьці паводле Маніторынгавай праграмы, што распачалася 1 красавіка. Кіраўніца місіі Марта дэ Кастэла-Бранка на сёньняшняй выніковай прэс-канфэрэнцыі зазначыла:

(Кастэла-Бранка: ) "Што тычыцца праграмы Маніторынгу, то парамэтры, якія закладзеныя у гэтай праграме, з нашага пункту гледжаньня дастаткова сьціплыя. Магчыма, яны будуць выкананыя, аднак мы чакаем большых намаганьняў дзеля паляпшэньня стану ў рэальным сэктары эканомікі. Улады паабяцалі выправіць сытуацыю — з тым, каб да канца верасьня мэтавыя паказчыкі выканаць цалкам".

Паводле словаў спадарыні дэ Кастэла-Бранкі, у Беларусі апошнім часам назіраецца прагрэс у сфэры грашова-крэдытнай і валютнай палітыкі. Аднак гэты прагрэс мусіць быць замацаваны рэформамі ў рэальнай эканоміцы. Між тым, зараз тут складаюцца нэгатыўныя тэндэнцыі. Гаворыць сталы прадстаўнік Міжнароднага валютнага фонду ў Беларусі Марк Хортан:

(Хортан: ) "Што тычыцца структурных рэформаў, то сытуацыя ў сэктары прадпрыемстваў дастаткова складаная. І мы заклікалі ўлады пасьля прэзыдэнцкіх выбараў ажыцьцявіць рашучыя крокі, каб палепшыць тут становішча. Гэтае пагаршэньне мы зьвязваем з палітыкай заработнай платы, што мела месца ў першым паўгодзьдзі.

Паводле словаў спадара Хортана, беларускім уладам было б значна лягчэй выконваць Маніторынгавую праграму, калі б не падвышэньне заробкаў падчас цяперашняй прэзыдэнцкай кампаніі.

Экспэрты Міжнароднага валютнага фонду выявілі пераразьмеркаваньне фінансавых рэсурсаў як у бюджэтнай сфэры, так і ў гаспадарчым сэктары. І гэта, на думку місіі МВФ, можа паўплываць на канчатковыя вынікі Маніторынгавай праграмы. А выкананьне гэтай праграмы, паводле папярэдніх дамоўленасьцяў, ёсьць умовай аднаўленьня крэдытнага супрацоўніцтва МВФ зь Беларусьсю.

У адрозьненьне ад Усясьветнага банку, які некалькі тыдняў таму прыняў станоўчае рашэньне наконт крэдыту, Міжнародны валютны фонд пакуль у гэтай справе вагаецца. Як заявіў сёньня нашаму радыё Марк Хортан, пытаньня рэальнай фінансавай дапамогі афіцыйнаму Менску кіраўніцтва МФВ пакуль што не абмяркоўвала.


Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG