У пажары, што здарыўся 4 красавіка ў маскоўскім гандлёвым цэнтры «Персей для детей», загінуў адзін работнік цэнтру і пацярпелі шасьцёра ратаўнікоў, піша РИА Новости. Паводле МНС, уратаваныя два дзясяткі чалавек, былі эвакуяваныя шэсьць соцень работнікаў і наведнікаў цэнтру.
Агонь патушылі прыблізна праз паўтары гадзіны пасьля пачатку, дым з памяшканьняў выдалялі яшчэ ня менш як тры гадзіны.
Сьледчыя распачалі крымінальную справу аб прычыненьні сьмерці празь неасьцярожнасьць, вінаватым можа пагражаць да трох гадоў турмы.
Пажар пачаўся на шостым паверсе будынка ў памяшканьні, дзе знаходзіліся склады прадукцыі. Паводле прадстаўнікоў МНС, загінулы работнік гандлёвага цэнтру «пераблытаў кірунак да эвакуацыйнага выхаду», пабег у задымленую зону, пачаў задыхацца і ня змог выбрацца.
Пры гэтым сьцьвярджаецца, што пажарныя сыстэмы і сыстэмы выдаленьня дыму спрацавалі належным чынам. Праверка гандлёвага цэнтру на пажарную бясьпеку праводзілася год таму, таксама былі інструктажы пэрсаналу. Тады, паводле МНС, не было выяўлена парушэньняў, якія маглі б паўплываць на цяперашні пажар.
Жыцьцям шасьці пацярпелых ратаўнікоў цяпер нічога не пагражае, іхны стан стабільны, сьцьвярджае МНС. Яны шпіталізаваныя, двое ў цяжкім стане, чацьвёра ў стане сярэдняй цяжкасьці. Прычыны таго, што яны пацярпелі, удакладняюцца — дапускаецца «камбінаванае ўзьдзеяньне дыму і цяпла». Паводле МНС, яны былі ў поўным рыштунку, мелі дыхальныя апараты.
Мэр Масквы Сяргей Сабянін заяжджаў у лякарню да пацярпелых, размаўляў з адным зь іх. Сабянін піша ў Twitter, што пажарныя «паводзілі сябе па-геройску».
У той жа дзень у Расеі людзей эвакуявалі праз задымленьне ў гандлёвым цэнтры ў расейскім Саратаве, днём раней — у гандлёвым цэнтры ў Разані. У абодвух здарэньнях пра пацярпелых не паведамлялася.
Цяпер у Расеі трываюць масавыя праверкі пажарнай бясьпекі ў месцах масавага знаходжаньня людзей пасьля пажару ў Кемераве, дзе загінулі ня менш за 64 чалавекі, сярод якіх было шмат дзяцей. Уладзімір Пуцін назваў прычынай пажару «злачынную нядбайнасьць і разгільдзяйства».
Масавыя праверкі таксама праходзілі ў Беларусі (больш як на 75% правераных абʼектаў выявілі парушэньні), дзе быў абвешчаны фактычна дзень нацыянальнай жалобы з нагоды расейскай трагедыі.
