Аляксандар Лукашэнка адным зь першых павіншаваў Уладзіміра Пуціна зь перамогай на прэзыдэнцкіх выбарах у Расеі — яшчэ зранку 19 сакавіка, калі былі абвешчаныя толькі папярэднія вынікі выбараў.
Выбары Пуціна, віншаваньне Лукашэнкі, укіды, піражкі і шавялюра Дудзя. Цікавае каротка
Яшчэ раней за Лукашэнку — першым сярод кіраўнікоў дзяржаваў — Пуціна павіншаваў прэзыдэнт Сэрбіі Аляксандар Вучыч.
Канцлерка Нямеччыны Ангела Мэркель павіншавала Пуціна зь перавыбраньнем, але адзначыла, што «сёньня больш важна, чым калі-небудзь, працягваць дыялёг і разьвіваць стасункі між нашымі краінамі і народамі», пажадала дзейнічаць у рашэньні двухбаковых і міжнародных праблемаў «канструктыўна, у пошуку ўстойлівых рашэньняў».
Пуцін таксама атрымаў віншаваньні ад прэзыдэнта Нямеччыны Франка-Вальтэра Штайнмаера. Але партыйны альянс ХДС і ХСС, які ўзначальвае Мэркель, выдаў заяву, у якой пішуць, што Расея мусіць спыніць «парушэньні міжнароднага права».
Прэзыдэнт Францыі Эманюэль Макрон патэлефанаваў Пуціну, выказаў пажаданьні посьпехаў у палітычнай, дэмакратычнай, эканамічнай і сацыяльнай мадэрнізацыі краіны, таксама праявіў занепакоенасьць у сувязі з сытуацыяй у сырыйскіх Афрыне і Ўсходняй Гуце — і заклікаў Пуціна прыкласьці ўсе намаганьні, каб спыніць там забойствы мірных грамадзянаў.
Таксама Макрон заклікаў Пуціна даць выразны адказ на пытаньні пра замах у Вялікай Брытаніі на былога расейскага выведніка Скрыпаля і разабрацца зь меркаванымі праграмамі вытворчасьці хімічнай зброі. Макрон сярод іншага адзначыў, што Францыя прытрымліваецца ідэі тэрытарыяльнай цэласнасьці Ўкраіны і выкананьня міжнародных дамоўленасьцяў.
Пры гэтым Макрон выказаў упэўненасьць, што канструктыўны дыялёг Эўропы і Расеі мусіць працягвацца, стасункі Масквы з Эўропай могуць быць плённымі. У пісьмовай заяве канцылярыі Макрона па выніках размовы адзначаецца, што ўсё гэта не было віншаваньнем Пуціну.
Прэм’ер Японіі Сіндза Абэ павіншаваў Пуціна зь перамогай па тэлефоне. Размова закранала каапэрацыю ў ядзерным пытаньні Паўночнай Карэі і эканамічную актыўнасьць на спрэчных астравах. Абэ таксама нагадаў Пуціну, што ўжываньне хімічнай зброі непрымальнае — трэба перадусім растлумачыць факты, казаў ён Пуціну, які адмаўляе ўдзел Крамля ў атручваньні Скрыпаля.
Таксама віншаваньні накіравалі кіраўнікі Азэрбайджану, Армэніі, Балівіі, Вэнэсуэлы, Ізраілю, Індыі, Ірану, Кітаю, Казахстану, Кіргізстану, Кубы, Малдовы, Сырыі, Таджыкістану, Турэччыны, Узбэкістану, самаабвешчаных Абхазіі і Паўднёвай Асэтыі (непрызнаных дзяржаваў на тэрыторыі Грузіі), самаабвешчаных ДНР і ЛНР (непрызнаных дзяржаваў на тэрыторыі Ўкраіны) і іншыя.
Не зьбіраюцца віншаваць
Прэзыдэнт ЗША Дональд Трамп, паводле прэс-службы Белага дому, ведае пра перамогу Пуціна, але не плянуе тэлефанаваць яму (у Twitter пра перамогу Пуціна ён таксама не пісаў). Адзначаецца таксама, што ў ЗША «ня зьдзіўленыя» вынікамі расейскіх выбараў.
Таксама Пуціна не зьбіраюцца віншаваць кіраўнікі Вялікай Брытаніі (Лёндан і Масква перажываюць дыпляматычны канфлікт праз атручваньне Скрыпаля) і Ўкраіны (Кіеў абураецца правядзеньнем галасаваньня ў акупаваным Расеяй Крыме і называе выбары «нічым іншым як фальсыфікацыяй»). Кіраўніцтва Італіі пакуль не віншавала Пуціна — яго павіншавалі толькі крайнія правыя італьянскія палітыкі.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў