Прэзыдэнт Украіны Ўладзімір Зяленскі зьвярнуўся па відэасувязі да міністраў фінансаў краін G7, якія сабраліся сёньня ў Вашынгтоне для ўдзелу ў штогадовых сустрэчах Міжнароднага валютнага фонду і Сусьветнага банка.
«Мы бачым, што расейскія тэракты могуць узмацніцца. Таму нам неабходна актывізаваць наша супрацоўніцтва для аказаньня адпаведнай дапамогі, каб аднавіць тое, што было разбурана, і гарантаваць фінансавую стабільнасьць нашай дзяржавы», — сказаў Уладзімір Зяленскі, дадаўшы, што налета Кіеў сутыкнецца з бюджэтным дэфіцытам у памеры 38 мільярдаў даляраў.
Украіне трэба дадаткова да 4 мільярда даляраў на месяц
Кіраўніца МВФ Крысталіна Геаргіева заявіла, што патрэбы Ўкраіны ў фінансаваньні ў 2023 годзе будуць складаць ад 3 да 4 мільярдаў даляраў у месяц.
Яна сказала, што па просьбе Зяленскага МВФ створыць Украінскі эканамічны форум для абмену інфармацыяй і ўдакладненьня патрэб краіны ў фінансаваньні.
«Мы рухаемся з вамі ў кірунку моцнай Украіны», — сказала яна.
Міністар фінансаў ЗША Джанэт Елен заявіла, што для задавальненьня запатрабаваньняў Украіны «патрабуюцца адзіныя і скаардынаваныя намаганьні».
«Аднак G7, міжнародныя фінансавыя інстытуты і ўсе партнэры Ўкраіны сумесна могуць дапамагчы Ўкраіне выйграць гэтую вайну і аднавіць яе, каб яна стала квітнеючай і надзейнай дэмакратыяй, за якую так упарта змагаўся ўкраінскі народ», — сказала яна.
Зь лютага Злучаныя Штаты перадалі Кіеву дапамогу на суму 65 мільярдаў даляраў, у тым ліку вайсковую тэхніку і ўзбраеньне.
Раней Елен і іншыя міністры фінансаў і кіраўнікі цэнтральных банкаў з краін «Вялікай сямёркі» правялі ўласныя перамовы аб вайне Расеі супраць Украіны.
«Мы заклікаем Расею неадкладна спыніць несправядлівую і жорсткую вайну, — гаворыцца ў заяве. — „Вялікая сямёрка“ будзе працягваць падтрымліваць Украіну столькі, колькі спатрэбіцца, і па-ранейшаму цьвёрда адданыя падтрымцы неадкладных кароткатэрміновых фінансавых патрэб Украіны», — гаворыцца ў заяве.
Новыя абмежаваньні для Расеі
«Вялікая сямёрка» таксама абмеркавала намаганьні ў абмежаваньні цэнаў на расейскую нафту, каб пазбавіць краіну асноўнай крыніцы фінансаваньня вайны і стрымаць рост цэнаў на энэрганосьбіты.
Група, у якую ўваходзяць Вялікая Брытанія, Канада, Францыя, Няммеччына, Італія, Японія і ЗША, заявіла, што дабілася «значнага прагрэсу па ўсіх ключавых аспэктах» прапановы, але не паведаміла ніякіх падрабязнасьцяў.
«Вялікая сямёрка» вітала далучэньне Аўстраліі да кааліцыі. Адной з задач, якія стаяць перад G7, зьяўляецца згуртаваньне краін сьвету вакол ідэі абмежаваньня цэнаў.
Некалькі гадзін раней прэзыдэнт Расеі Ўладзімір Пуцін раскрытыкаваў гэтую прапанову, якую вылучылі Злучаныя Штаты. Масква папярэдзіла, што спыніць пастаўкі нафты ў краіны, якія ўвядуць такое абмежаваньне.
Джанэт Елен сёньня заявіла, што абмежаваньне цэнаў на расейскую нафту ў дыяпазоне 60 даляраў за барэль, пэўна, будзе дастатковым для скарачэньня даходаў Масквы ад энэрганосьбітаў і забесьпячэньня прыбытковай вытворчасьці.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
