«Па дадзеных офісу генэральнага пракурора, украінскія праваахоўнікі не затрымлівалі расейскіх настаўнікаў на дэакупаваных тэрыторыях Харкаўскай вобласьці», — паведаміў тэлеканалу «Настоящее время» Ігар Белавусаў, начальнік дэпартамэнту супрацьдзеяньня злачынствам, учыненым ва ўмовах канфлікту.
Крыніцы тэлеканала ў Харкаўскай, Данецкай і Луганскай абласных пракуратурах таксама сьцьвярджаюць, што ў іх не затрымлівалі расейскіх настаўнікаў.
12 верасьня навіну аб затрыманьні настаўнікаў з Расеі, якія прыехалі выкладаць па расейскай праграме ва ўкраінскіх школах на акупаваных войскам РФ тэрыторыях, распаўсюдзіла выданьне «Страна.ua» са спасылкай на камэнтар віцэ-прэм’еркі Ўкраіны Ірыны Верашчук.
Паводле яе, яны зьдзейсьнілі злачынства супраць Украіны, іх будуць судзіць паводле артыкулу 438 Крымінальнага кодэксу (Парушэньне законаў і звычаяў вайны). Пакараньне гэтага артыкулу прадугледжвае да 12 гадоў зьняволеньня.
Пры гэтым Верашчук не ўдакладніла колькасьць затрыманых настаўнікаў, а таксама назвы вызваленых населеных пунктаў, дзе іх нібыта затрымалі.
Мінадукацыі Расеі заявіла, што расейскія настаўнікі ў Харкаўскай вобласьці не працавалі: ведамства заявіла, што «з 1 верасьня там працавалі мясцовыя настаўнікі». Акупацыйная адміністрацыя заявіла, што расейскіх настаўнікаў у Харкаўскай вобласьці не было.
Пазьней у Мінадукацыі РФ пацьвердзілі, што расейскія настаўнікі ва Ўкраіне нібыта «абароненыя»: яны, па заявах чыноўнікаў, знаходзяцца на тэрыторыях, падкантрольных расейскім вайскоўцам і групоўкам «ЛНР» і «ДНР».
Нягледзячы на заявы Мінадукацыі, кіраўнік Сьледчага камітэту Расеі Аляксандар Бастрыкін раніцай 13 верасьня даручыў завесьці крымінальную справу па факце затрыманьня настаўнікаў. У тэлеграм-канале ведамства гэтыя настаўнікі названы «выкладчыкамі паводле расейскіх праграм».
10 верасьня пра затрыманьне настаўнікаў са спасылкай на крыніцы паведамляў «24 канал». Сьцьвярджалася, што расейскія вайскоўцы «проста пакінулі настаўнікаў, якіх напярэдадні павезьлі з Расеі».
Дэпутат Вярхоўнай Рады Аляксей Ганчарэнка пісаў, што расейскія настаўнікі затрыманыя ў горадзе Купянску Харкаўскай вобласьці. Раней на расейскіх форумах неаднаразова публікаваліся абʼявы, якія запрашалі настаўнікаў з Расеі працаваць у Марыюпалі і іншых акупаваных Расеяй украінскіх гарадах.
Акрамя таго, 13 верасьня праект Радыё Свабода Каўказ.Рэаліі са спасылкай на зьвесткі прафсаюзу «Альянс настаўнікаў» паведаміў, што сярод расейскіх настаўнікаў, затрыманых на тэрыторыі Ўкраіны, могуць быць выкладчыкі з паўднёвых рэгіёнаў Расеі.
Як паведаміў журналістам кіраўнік прафсаюза Данііл Кен, у абʼяднаньня няма канкрэтных прозьвішчаў затрыманых, аднак ёсьць агульны пералік пэдагогаў, якіх завэрбавалі на працу ў акупаваных раёнах Украіны.
Сьпіс ёсьць у распараджэньні сайта Кавказ.Реалии. Ён зьмяшчае прозьвішчы каля 80 выкладчыкаў з Дагестану, якіх адпраўлялі на працу на акупаваную частку Данбасу, дзе дзейнічаюць узброеныя групоўкі ДНР і ЛНР, а таксама на акупаваныя часткі Херсонскай і Запароскай абласьцей.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпра, Кіева, Харкава, Адэсы і іншых месцаў. Дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя процілегламу боку тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ карпарацыі «Роснефть» і завод «Лукойла» ў Кстове ў Ніжагародзкай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі думку, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16–18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША Дональда Трампа рэзка актывізавалася тэма магчымых мірных перамоваў. Прэзыдэнт ЗША абнавіў свае патрабаваньні да эўрапейскіх краінаў-сяброў NATO павялічваць выдаткі на абарону. Таксама палітык заявіў, што хоча, каб Украіна дала Злучаным Штатам кантроль за сваімі радовішчамі рэдказямельных выкапняў у абмен на фінансавую падтрымку яе ваенных дзеяньняў супраць Расеі.
- У ноч на 14 лютага Расея бесьпілётнікам атакавала Чарнобыльскую АЭС, на саркафагу над разбураным у 1986-м пры чарнобыльскай катастрофе энэргаблёку пачаўся пажар, які ня могуць патушыць некалькі дзён.
- 12 лютага 2025 Трамп пагутарыў па тэлефоне з Пуціным, і 18 лютага 2025 году ў Эр-Рыядзе (Саудаўская Арабія) пачалася двухбаковая сустрэча з удзелам дзяржаўнага сакратара ЗША Марка Рубіё і кіраўніка МЗС Расеі Сяргея Лаўрова. Украіна на перамовы не запрошаная. Перад гэтым у Мюнхэне (Нямеччына) і Парыжы (Францыя) адбыліся, адпаведна, канфэрэнцыя па бясьпецы і саміт вядучых краінаў ЭЗ, але на іх так і ня выпрацавалі пляну доўгатэрміновай падтрымкі Ўкраіны. Акрамя таго, Вугоршчына — сябра Эўразьвязу, NATO і пры гэтым ляяльная да Расеі — дыстанцыявалася ад абмеркаваньня далейшай вайсковай дапамогі Кіеву, абвінаваціўшы іншыя краіны ў падбухторваньні далейшай вайны.
- У красавіку высьветлілася, што мірныя перамовы пакуль ня маюць посьпеху, а тым часам Украіна заявіла, што ведае імёны 155 кітайскіх наймітаў, якія падпісалі кантракты з Расеяй і пайшлі на вайну. Афіцыйны Пэкін заявіў, што сваіх грамадзянаў на вайну не адпраўляў, а наадварот, раіў жыхарам краіны трымацца падалей ад абодвух бакоў.
- Дзяржаўны ўкраінскі праект «Хачу жыць», які выконвае Каардынацыйны штаб у пытаньнях абыходжаньня з ваеннапалоннымі, у красавіку 2025 году апублікаваў прозьвішчы 742 грамадзян Беларусі, якія з 2023 году ваююць супраць Украіны на баку Расеі, зь іх 96 ужо загінулі.
- 1 чэрвеня на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
