Суд Савецкага раёну Гомля 10 жніўня разглядаў адміністрацыйныя пратаколы на Тацяну Канеўскую, давераную асобу Сьвятланы Ціханоўскай. Таксама судзілі каардынатара кампаніі «Права выбару» Васіля Палякова.
Іх затрымалі 8 жніўня. І Палякова, і Канеўскую абвінавацілі ў дробным хуліганстве і непадпарадкаваньні супрацоўнікам міліцыі. Паводле міліцыянтаў, Канеўская 8 жніўня «гучна крычала, размахвала рукамі, чым парушыла грамадзкі парадак». Яна нібыта не рэагавала на заўвагі міліцыі.
Канеўская не прызнала сваёй віны. Суд адправіў справу на дапрацоўку па артыкуле 23.4 — непадпарадкаваньне. Таксама суд зьвярнуў увагу, што жанчына мае непаўналетняга сына. Паводле заканадаўства, такія жанчыны не падлягаюць адміністрацыйнаму арышту.
Канеўскую адпусьцілі, яна пайшла забраць рэчы зь міліцэйскага аўтамабіля і зьнікла.
«Паехалі ў Савецкі РАУС пісаць заяву на яе зьнікненьне, і там нам паведамілі, што яе зноў затрымалі, яна ў ізалятары часовага ўтрыманьня», — паведаміў сын Тацяны Канеўскай.
Васіля Палякова паводле двух артыкулаў КаАП пакаралі арыштам на 10 содняў. Міліцыя напісала ў пратаколе, што ён «мачыўся ў грамадзкім месцы і на заўвагі міліцыі не рэагаваў». Палякоў віны не прызнаў.
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.
