Увечары ў цэнтры Менску на праспэкце Незалежнасьці кіроўцы аўтамабіляў, раварысты і пешаходы зладзілі акцыю салідарнасьці.
Каля 19-й гадзіны машыны на праспэкце пачалі сыгналіць. Гудзеньне аўтамабільных сыгналаў чуваць па ўсім праспэкце Незалежнасьці ў цэнтры.
Зь некаторых машын грае песьня «Перемен» Віктара Цоя, за якую сёньня на 10 сутак арышту асудзілі двух супрацоўнікаў Палаца дзяцей і моладзі Ўладзіслава Сакалоўскага і Кірыла Галанава. Яны ўвечары 6 жніўня ўключылі песьню «Перемен», перабіўшы выступ баяніста Віталя Варанко, у Кіеўскім сквэры, куды павінна была прыйсьці кандыдатка ў прэзыдэнты Сьвятлана Ціханоўская.
Кіроўцы аўтамабіляў паказваюць з машын бел-чырвона-белыя сьцягі і белыя бранзалеты на руках. Выйшлі ў цэнтар і пешаходы зь белымі бранзалетамі, якія каманда Ціханоўскай заклікала насіць у знак прыхільнасьці да перамен і свабодных выбараў.
Супрацоўнікі ДАІ пачалі спыняць некаторыя машыны.
Празь некаторы час ДАІ перакрыла праспэкт у раёне плошчы Перамогі, а таксама ў раёне Акадэміі навук.
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.