Лінкі ўнівэрсальнага доступу

Мабільныя апэратары А1 і МТС: Падчас мітынгу Ціханоўскай у Менску «была павышаная нагрузка на сетку»


На першым менскім агітацыйным мітынгу кандыдаткі ў прэзыдэнты Сьвятланы Ціханоўскай, які прайшоў у парку Дружбы народаў 19 ліпеня, прысутныя адзначалі адсутнасьць мабільнага інтэрнэту. «Белсат» атрымаў камэнтары двух апэратараў.

У прэс-службе МТС заявілі, што запытаў ад праваахоўнікаў на абмежаваньне сувязі не паступала, сетка працавала ў штатным рэжыме, збояў не было. Але нагрузка на сетку была большай за звычайную, «паступалі адзінкавыя звароты абанэнтаў».

Прэс-служба А1 пацьвердзіла, што ў людзей на мітынгу «маглі назірацца цяжкасьці ў рабоце мабільнага інтэрнэту», але «гэта было выклікана павышанай нагрузкай на сетку ў сувязі з правядзеньнем масавага мерапрыемства ў месцы, дзе ў адпаведнасьці зь яго плянаваньнем не прадугледжана вялікая колькасьць людзей, а значыць, і асаблівая тэхнічная забясьпечанасьць сеткі». Паводле А1, паказьнікі сеткавай нагрузкі перавысілі стандартныя ў шэсьць разоў. Кампанія паабяцала заплянаваць работы для пашырэньня прапускной здольнасьці сеткі ў парку.

Прэзыдэнцкія выбары — 2020 у Беларусі. Што важна ведаць

  • Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
  • 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
  • Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
  • ЦВК зарэгістраваў 15 ініцыятыўных груп з 55 заявак.
  • Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
  • 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
  • 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
  • 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
  • 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
  • Ад пачатку выбарчай кампаніі (на 13 лепеня) праваабаронцы налічылі больш за 700 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. 129 чалавек пакаралі адміністрацыйнымі арыштамі, 252 чалавекі аштрафавалі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG