Лінкі ўнівэрсальнага доступу

Першы пікет Ціханоўскай у Магілёве прайшоў безь Ціханоўскай. ФОТА


Пікет Ціханоўскай у Магілёве

Першы перадвыбарчы пікет Сьвятланы Ціханоўскай сабраў у Магілёве блізу паўтысячы чалавек. Прайшоў ён пад бел-чырвона-белымі сьцягамі на выдзеленай уладамі пляцоўцы перад мясцовым Лядовым Палацам (ад цэнтру гораду да яго 10 хвілін грамадзкім транспартам).

Міліцыі ў форме на месцы правядзеньня пікету заўважана не было, але ягоныя ўдзельнікі непакоіліся правакацыі з боку праваахоўнікаў і азіраліся па бакох. На пікет не прыехала Ціханоўская, чым «пакрыўдзіла магілёўцаў».

«26 гадоў зь 72-х загубленыя і мне сорамна, калі выступае Лукашэнка»

Пачатак пікету магілёўскія паплечнікі Ціханоўскай заплянавалі на 15 гадзінаў. Першымі прыйшлі найстарэйшыя ўдзельнікі. 82-гадовы Генадзь на пікеце спадзяецца больш даведацца пра кандыдатку і яе праграму, каб вызначыцца, ці галасаваць за яе. Яму хочацца пераменаў, людзкага жыцьця для ўнукаў і праўнукаў і, каб «ім не было сорамна за краіну».

82-гадовы Генадзь
82-гадовы Генадзь

«Выбараў ня будзе, — лічыць ён. — Адбудзецца прызначэньне таго, хто 26 гадоў знаходзіцца на алімпе ўлады. Наша цяпер жыцьцё, як у капусты пад гнётам. Я ведаю, пра што гавару, бо мяне 5-гадовага ставілі пад плотам страляць уласаўцы і разумею, што такое тэрор».

72-гадовы Ўладзімер кажа, што «26 гадоў зь 72-х загубленыя». Паводле яго, за гэтых час мы «навучыліся мыць кароў, а сьвет зьмяніўся». Паводле яго, Лукашэнка «захрас у СССР і кіруе тымі ж мэтадамі». Суразмоўца прызнаецца, што яму сорамна, калі кіраўнік дзяржавы выступае.

72-гадовы Уладзімер
72-гадовы Уладзімер

«Я хачу пераменаў, — адзначае ён. — Бабарыка І Цапкала ведаюць, як іх зрабіць, але гэтых прэтэндэнтаў „засеклі“. А сёньня першы пікет Ціханоўскай, і я вырашыў, што мушу тут прысутнічаць. Я падазраю, што будзе плошча 9 ці 10 жніўня, бо моладзь ужо не баіцца. Арышты яе ня спыняць»

На пікет Ціханоўскай прыехалі яе паплечнікі зь Менску і Мазыра. 31-гадовая Анастасія кажа, што яны наведаліся ў Магілёў, каб паказаць: «мы за перамены» і актыўнасьць ня толькі ў сталіцы

Менскія прыхільнікі Ціханоўскай у Магілёве
Менскія прыхільнікі Ціханоўскай у Магілёве

«Сьвятлана хоча вызваліць краіну і зрабіць свабодныя выбары. Мы ўсе чакаем пераменаў, і 26 гадоў чаканьня дастаткова, каб яны надышлі».

«Мы хочам паказаць нашу салідарнасьць з усёй Беларусьсю і плянуем пабываць ва ўсіх гарадах Беларусі», — дадае 35-гадовы Аляксей зь Менску.

«Тры прыгажуні супраць мужчынскай дыктатуры»

Паўтысячы чалавек сабралася на пікет за 40 хвілінаў, як ён пачаўся. Многія прыйшлі паслухаць і пабачыць саму Сьвятлану Ціханоўскую, а таксама Вераніку Цапкалу, жонку экс-прэтэндэнта на прэзыдэнцтва Валерыя Цапкалы ды прадстаўніцу штабу Віктара Бабарыкі Марыю Калесьнікаву. Людзі не хавалі, што расчараваныя іхнай адсутнасьцю. Адзін з удзельнікаў у гутарцы з карэспандэнтам Свабоды заўважыў: «Пакрыўдзіла магілёўцаў».

Нямала магілёўцаў прыйшлі з нацыянальнай сымболікай
Нямала магілёўцаў прыйшлі з нацыянальнай сымболікай

«Сьвятлана дужа хацела прыехаць, але на яе навалілася шмат тэрміновых справаў», — тлумачыць грамадзе давераная асоба вылучэнкі на прэзыдэнцтва Мікалай Маслоўскі.

«Вы ведаеце, — кажа ён. — штаб Сьвятланы быў разгромлены і цяпер фармуецца з новай сілай. Ёсьць падтрымка моцных палітыкаў, партыяў, грамадзкіх арганізацыяў, а таксама штабоў Віктара Бабарыкі і Валерыя Цапкалы».

Людзі працяглымі воплескамі адрэагавалі на словы Маслоўскага пра аб’яднаньне трох жанчын, якіх паводле ягоных словаў, у інтэрнэце называюць «беларускімі прыгажунямі», якія выступілі «супраць мужчынскай дыктатуры».

Вядоўцы мітынгу Тацяна Сівачэнка і Ўладзімер Шанцаў
Вядоўцы мітынгу Тацяна Сівачэнка і Ўладзімер Шанцаў

Вядоўцамі пікету былі актывісты АГП і давараныя асобы Ціханоўскай Тацяна Сівачэнка і Ўладзімер Шанцаў. Яны нагадалі: улада выдзеліла ў горадзе для перадвыбарчай агітацыі толькі дзьве пляцоўкі і, на думку Шанцава, гэта сьведчыць, што яна пабаялася тысяч людзей, якія стаялі ў чэргах за трыста мэтраў ад гарвыканкаму, каб подпісамі падтрымаць альтэрнатыўных кандыдатаў на прэзыдэнцтва.

«Надакучыла 26 гадоў жыць у страху»

Пікет прыходзіў у форме «свабоднага мікрафону». Тацяна Сівачэнка заклікала грамаду «не саромецца выказвацца», бо «цяпер можна гаварыць».

Пра што гаварылі людзі, сьцісла

  • Я за свабодныя выбары, чэсныя суды і супраць сваволі ўлады і сілавікоў;
  • Надакучыла жыць у страху 26 гадоў. Хочацца жыць па-людзку з годнымі заробкамі і пэнсіямі. Свабодна хадзіць па гэтай зямлі і нічога не баяцца. За перамены;
Былі ўдзельнікі пікету, якія нагадвалі пра палітзьняволеных
Былі ўдзельнікі пікету, якія нагадвалі пра палітзьняволеных
  • Хачу жыць гэтак, як людзі цывілізаваных краінаў і мець тое, чым валодаюць яны;
  • Нас павінна быць болей і мы ня мусім баяцца выходзіць на мірныя пікеты. Нас большасьць і мы не маргіналы;
  • Сярод нас ёсьць міліцыянты і яны маюць зразумець, што ўжываць фізычную сілу супраць мірных, няўзброеных людзей неабачліва з іхнага боку. Вас не вучылі зьбіваць дзяўчат. Вас вучылі абараняць людзей і краіну. Дазвольце нам выказваць сваё меркаваньне;
  • Лукашэнка скраў нашу незалежнасьць, свабоду, магчымасьць выбіраць і гаварыць тое, што думаем. У нас зьявілася надзея;
  • Мы маем сілу, волю і пакажам, што мы людзі. «Жыве Беларусь!»
Сяржант унутраных войск у адстаўцы Юры
Сяржант унутраных войск у адстаўцы Юры

Выступіў на пікеце і сяржант унутраных войск у адстаўцы Юры. Ён выйшаў да мікрафону з букетам ружаў, якія зьбіраўся аддаць Ціханоўскай. Паводле яго, ва ўнутраных войсках цяпер хістаюцца і баяцца выконваць загады па разгону мірных акцыяў пратэсту. Ён нагадаў вайскоўцам, што яны маюць права не выконваць злачынныя загады.

Прыходзілі на пікет сем’ямі
Прыходзілі на пікет сем’ямі

Тут жа на мітынгу людзі запісваліся ў назіральнікі, каб «выбары сталі чэснымі і адкрытымі», — патлумачыла Тацяна Сівачэнка. Каманда назіральнікаў у гэты дзень папоўнілася прыкладна на 80 чалавек.

Запіс у назіральнікі
Запіс у назіральнікі

Інцыдэнтаў і затрыманьняў падчас пікету не было. Праваабаронцы ня маюць зьвестак пра затрыманых, аднак адзначаюць, што супрацоўнікі ДАІ аштрафавалі больш за дзясятак кіроўцаў, якія віталі пікет сыгналамі. Скончыўся пікет канцэртам.

Бел-чырвона-белымі сьцягамі сустракалі кіроўцаў удзельнікі пікету
Бел-чырвона-белымі сьцягамі сустракалі кіроўцаў удзельнікі пікету

Прэзыдэнцкія выбары — 2020 у Беларусі. Што важна ведаць

  • Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
  • 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
  • Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
  • ЦВК зарэгістраваў 15 ініцыятыўных груп з 55 заявак.
  • Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
  • 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
  • 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
  • 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
  • 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
  • Ад пачатку выбарчай кампаніі (на 13 лепеня) праваабаронцы налічылі больш за 700 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. 129 чалавек пакаралі адміністрацыйнымі арыштамі, 252 чалавекі аштрафавалі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG