Лінкі ўнівэрсальнага доступу

Беларуская асацыяцыя журналістаў абурылася затрыманьнем калег


Ілюстрацыйнае фота. АМАП на плошчы Незалежнасьці ў Менску, 15 ліпеня
Ілюстрацыйнае фота. АМАП на плошчы Незалежнасьці ў Менску, 15 ліпеня

Беларуская асацыяцыя журналістаў 16 ліпеня апублікавала зварот з нагоды масавага затрыманьня калег на вулічных акцыях 14 і 15 ліпеня.​

У сваёй заяве Беларуская асацыяцыя журналістаў

  • выказала абурэньне і пратэст у сувязі з затрыманьнямі журналістаў падчас выкананьня імі службовых абавязкаў;
  • заклікала дзяржаўныя органы спыніць парушэньне законаў сілавымі структурамі і прыцягнуць вінаватых да адказнасьці;
  • нагадала пра гарантаванае права журналістаў прысутнічаць на масавых мерапрыемствах і перадаваць адтуль інфармацыю;
  • заклікала ўлады прытрымлівацца міжнародных стандартаў і абавязаньняў у галіне свабоды выказваньня.

Раней Міністэрства ўнутраных спраў пакінула без разгляду папярэднюю заяву БАЖ і рэдакцый звыш 50 СМІ з патрабаваньнем спыніць перасьлед за прафэсійную дзейнасьць.

За 14 і 15 ліпеня БАЖ зарэгістравала 15 затрыманьняў журналістаў. Журналісту Радыё Свабода Антону Трафімовічу падчас затрыманьня зламалі нос. Журналіста Tut.by Аляксея Суднікава затрымлівалі двойчы за адзін дзень.

Прэзыдэнцкія выбары — 2020 у Беларусі. Што важна ведаць

  • Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
  • 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
  • Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
  • ЦВК зарэгістраваў 15 ініцыятыўных груп з 55 заявак.
  • Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
  • 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
  • 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
  • 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
  • 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
  • Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG