Лінкі ўнівэрсальнага доступу

У МЗС заявілі, што накіравалі запрашэньне назіральнікам АБСЭ 15 ліпеня, як і плянавалі першапачаткова


Прэс-сакратар МЗС Анатоль Глаз

Увечары 15 ліпеня Міністэрства замежных спраў Беларусі заявіла, што накіравала запрашэньні на выбары міжнародным назіральнікам. Раней БДІПЧ АБСЭ заявіла, што ня будзе назіраць за выбарамі ў Беларусі, бо яе своечасова не запрасілі.

«Рашэньне БДІПЧ стала для нас нечаканасьцю, якая расчаравала. Шчыра спадзяёмся, што яно будзе перагледжана. Бо сёньня, дакладна ў дзень пасьля рэгістрацыі кандыдатаў, у поўнай адпаведнасьці з раней зробленымі публічнымі заявамі МЗС накіравала запрашэньні на выбары на адрас Бюро па дэмакратычных інстытутах і правах чалавека АБСЭ, СНД і Шанхайскай арганізацыі супрацоўніцтва», — паведаміў прэс-сакратар МЗС Анатоль Глаз.

Ён дадаў, што Беларусь «ні на крок не адступае ад сваіх запэўненьняў і абавязаньняў» і «ніколі не праводзіла выбары без назіраньня», а назіральнікаў БДІПЧ АБСЭ першапачаткова «мелі цьвёрды намер запрасіць» пасьля рэгістрацыі кандыдатаў, пра што «неаднаразова гаварылася публічна».

Паводле яго, найбліжэйшымі днямі Нацыянальны сход таксама накіруе запрашэньні на адрас парлямэнцкіх структур, такіх як Парлямэнцкі сход саюзу Беларусі і Расеі, Міжпарлямэнцкая асамблея СНД, Парлямэнцкая асамблея АБСЭ і Парлямэнцкая Асамблея Рады Эўропы.

15 ліпеня дырэктарка Бюро дэмакратычных інстытутаў і правоў чалавека (БДІПЧ) АБСЭ Інгіб’ёрг Соўлрун Гістлятоўхтыр паінфармавала МЗС Беларусі, што адсутнасьць запрашэньня не дазваляе БДІПЧ арганізаваць назіраньне за прэзыдэнцкімі выбарамі.

7 ліпеня Парлямэнцкая асамблея АБСЭ паведаміла, што ня будзе накіроўваць назіральнікаў на прэзыдэнцкія выбары ў Беларусі, бо ў яе «няма плянаў назіраць за выбарамі да восені як мінімум з прычыны пандэміі COVID-19».

Прэзыдэнцкія выбары — 2020 у Беларусі. Што важна ведаць

  • Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
  • 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
  • Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
  • ЦВК зарэгістраваў 15 ініцыятыўных груп з 55 заявак.
  • Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
  • 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
  • 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
  • 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
  • 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
  • Ад пачатку выбарчай кампаніі (на 13 лепеня) праваабаронцы налічылі больш за 700 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. 129 чалавек пакаралі адміністрацыйнымі арыштамі, 252 чалавекі аштрафавалі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG