Лінкі ўнівэрсальнага доступу

Назіральнікі ПА АБСЭ не прыедуць на прэзыдэнцкія выбары ў Беларусі


Міжнародныя назіральнікі ад БДІПЧ АБСЭ на парлямэнцкіх выбарах, 2019 год

Парлямэнцкая асамблея АБСЭ ня будзе накіроўваць назіральнікаў на прэзыдэнцкія выбары ў Беларусі, паведаміў БелаПАН 7 ліпеня кіраўнік аддзелу прэсы і камунікацыі ПА АБСЭ Нэт Пэры.

«Парлямэнцкая асамблея АБСЭ ня будзе накіроўваць назіральную місію ў Беларусь на прэзыдэнцкія выбары 9 жніўня, — сказаў Нэт Пэры. — У нас няма плянаў назіраць за выбарамі да восені, як мінімум, з прычыны пандэміі COVID-19».

Беларусь дагэтуль не накіравала міжнародным арганізацыям запрашэньні назіраць за сёлетнімі прэзыдэнцкімі выбарамі. 2 ліпеня кіраўніца Бюро дэмакратычных інстытутаў і правоў чалавека Інгіб’ёрг Соўлрун Гістладоўтыр ужо​ выказвала заклапочанасьць з гэтай нагоды.

На пачатку чэрвеня старшыня Беларускага Хэльсынскага камітэту Алег Гулак накіраваў у Міністэрства замежных спраў Беларусі зварот, у якім прасіў праінфармаваць аб захадах дзяржавы дзеля запрашэньня міжнародных назіральнікаў, у тым ліку місіі БДІПЧ АБСЭ, на час правядзеньня выбараў прэзыдэнта. У адказе за подпісам намесьніка міністра Алега Краўчанкі гаварылася, што «пытаньне знаходзіцца на разглядзе».

Старшыня Цэнтравыбаркаму Лідзія Ярмошына 10 чэрвеня заявіла, што «па меры паляпшэньня эпідэміялягічнага становішча» будуць накіраваныя адпаведныя запрашэньні ў міжнародныя арганізацыі, якія традыцыйна назіраюць за выбарамі. Пры гэтым дадала, што адбудзецца гэта па завяршэньні працэсу рэгістрацыі кандыдатаў у прэзыдэнты.

Міністар замежных спраў Уладзімер Макей 26 чэрвеня заявіў, што Беларусь плянуе запрасіць на прэзыдэнцкія выбары міжнародных назіральнікаў.

Прэзыдэнцкія выбары — 2020 у Беларусі. Што важна ведаць

  • Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
  • 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
  • Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
  • ЦВК зарэгістраваў 15 ініцыятыўных груп з 55 заявак.
  • Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
  • 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
  • 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
  • 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
  • 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
  • Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG