Лінкі ўнівэрсальнага доступу

«Я ня ставіў подпісу». Мянчук заявіў у міліцыю, што ягоны подпіс падрабілі пры вылучэньні сябра ўчастковай камісіі


Ілюстрацыйнае фота

Пад заявай падпісаліся яшчэ 4 чалавекі, якія «не пазналі» сваіх подпісаў за вылучэньне ў сябры камісіі начальніцы аддзелу кадраў ААТ «Белмэтал» Тацяны Плашчынскай.

УЖЫВУЮ Выбары-2020. Як праходзіць прэзыдэнцкая кампанія падчас пандэміі

Мянчук Алег Зыль знайшоў «свой» подпіс пад заявай выбарнікаў аб вылучэньні прадстаўніка ў склад выбарчай камісіі. Ён сьцьвярджае, што нічога не падпісваў, і просіць міліцыю праверыць факт падробкі яго подпісу.

«Я ня ставіў свайго подпісу»

На сваёй старонцы ў «Фэйсбуку» Алег Зыль напісаў: «Народ Беларусі!!! Вось вам доказ, як за вас ставяць і будуць ставіць подпісы! Гэта адбылося са мной».

У заяве ў Заводзкае РУУС Алег Зыль напісаў, што ад яго імя пастаўлены подпіс, а таксама пазначаныя яго асабістыя дадзеныя на заяве выбарнікаў аб вылучэньні Тацяны Плашчынскай у склад выбарчай камісіі.

Алег Зыль сьцьвярджае, што ня ставіў подпісу і Тацяна Плашчынская з такой просьбай да яго не зьвярталася. З гэтай жанчынай ён наагул не знаёмы.

На пасяджэньні адміністрацыі Заводзкага раёну Менску 24 чэрвеня Тацяну Плашчынскую выбралі ў склад участковай камісіі.

Паводле Зыля, Плашчынская «скарысталася падробленым афіцыйным дакумэнтам» і зрабіла гэта «з карысьлівага альбо любога іншага інтарэсу».

Пра тое, што ягоны подпіс стаіць пад заявай, Алег Зыль даведаўся ад адваката Сяргея Зікрацкага, расказаў ён карэспандэнту Свабоды.

«Ён спытаўся, ці я падпісваў гэтую заяву выбарнікаў аб вылучэньні Плашчынскай. Я паглядзеў і сказаў, што гэта ня мой подпіс. Я ня ставіў подпісу».

Тое, што адбылося, ён пракамэнтаваў коратка: «Усе ж ведаюць, што за краіна».

«Пад заявай у РУУС падпісаліся 5 чалавек»

Кацярына падпісвалася за ўключэньне ў склад выбарчай камісіі кандыдата Міхалапа. Яго ў склад камісіі не ўключылі. Гэтае рашэньне адміністрацыі Заводзкага раёну вырашылі абскарджваць у судзе. Сьпіс людзей, якія нібыта падпісваліся ў падтрымку таго ці іншага кандыдата ў чальцы камісіі, ёй паказалі ў межах справы.

«Усё гэта ўсплыло ў матэрыялах справы аб скарзе на рашэньне адміністрацыі Заводзкага раёну, сярод іншага, на неўключэньне нашага кандыдата Рыгора Міхалапа ў склад камісіі на ўчастку № 90. Я была сярод грамадзян, якія яго вылучалі. Я пайшла ў суд, каб абскардзіць рашэньне адміністрацыі. Перад пасяджэньнем я азнаёмілася з матэрыяламі справы, дзе і ўбачыла заяву Плашчынскай. Гэты дакумэнт мяне зацікавіў, бо я там убачыла сярод падпісантаў сваю знаёмую і вырашыла высьветліць, ці падпісвалася тая насамрэч».

Кацярына кажа, што пабачыла сьпісы за дзень да разгляду сваёй справы ў судзе, таму выклікаць у суд гэтых людзей не ўдалося. У самім працэсе хадайніцтва аб іх выкліку адхілілі.

«Яшчэ мы зацікавіліся гэтай заявай, бо ў палове выпадкаў подпісы былі пастаўлены лютым, а палова чэрвенем. Адвакат папрасіў выклікаць сьведак, усіх гэтых 11 чалавек, і саму Плашчынскую, каб яна патлумачыла, як такое выйшла. Але хадайніцтва суд адхіліў», — кажа Кацярына.

Яна паведаміла, што суд не задаволіў яе скаргі, але яна вырашыла апытаць людзей, чые подпісы стаялі ў заяве аб вылучэньні Плашчынскай.

«Зыль сказаў, што ён нічога не падпісваў і будзе пісаць заяву ў РУУС. Астатнія 9 чалавек наўпрост альбо ўскосна пацьвердзілі, што гэта ня іхныя подпісы, што яны нічога не падпісвалі. Аднаго чалавека не было дома, яшчэ адна жанчына сказала, што яна падпісвала, а мо і не, яна ня памятае, а Плашчынскай ня ведае. Плашчынскую наагул ніхто з гэтых людзей ня ведае. Прычым адзін жыве ў іншым горадзе і ня мог знаходзіцца ў Менску ні ў лютым, ні ў чэрвені, каб падпісаць гэтую заяву. У выніку 5 чалавек падпісаліся пад заявай у РУУС. Выбар Плашчынскай парушае і мае правы, бо ня выбралі «майго» кандыдата».

«На пытаньні адказваць ня буду»

Тацяна Плашчынская працуе на прадпрыемстве «Белмэтал» начальніцай аддзелу кадраў. Яна адмовілася патлумачыць, як зьбірала подпісы за сваё вылучэньне ў склад участковай камісіі.

«Я не магу нічога вам сказаць наконт гэтага. Я вас ня ведаю і на такія пытаньні адказваць ня буду», — сказала карэспандэнту Свабоды Тацяна Плашчынская і паклала слухаўку.

Прэзыдэнцкія выбары — 2020 у Беларусі. Што важна ведаць

  • Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
  • 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
  • Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
  • ЦВК зарэгістраваў 15 ініцыятыўных груп з 55 заявак.
  • Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
  • 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
  • 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
  • 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
  • 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
  • Ад пачатку выбарчай кампаніі (на 13 лепеня) праваабаронцы налічылі больш за 700 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. 129 чалавек пакаралі адміністрацыйнымі арыштамі, 252 чалавекі аштрафавалі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG