Лінкі ўнівэрсальнага доступу

«Рэпартэры бязь межаў» асудзілі затрыманьні журналістаў у Беларусі


Затрыманьне карэспандэнткі Свабоды Аляксандры Дынько на пікеце ў Менску 19 чэрвеня
Затрыманьне карэспандэнткі Свабоды Аляксандры Дынько на пікеце ў Менску 19 чэрвеня

Міжнародная праваабарончая арганізацыя «Рэпартэры бязь межаў» (Reporters sans frontières, RSF) 24 чэрвеня апублікавала заяву з асуджэньнем хвалі затрыманьняў у Беларусі падчас выбарчай кампаніі.

УЖЫВУЮ Выбары-2020. Як праходзіць прэзыдэнцкая кампанія падчас пандэміі

«Рэпартэры бязь межаў» просяць прадстаўнікоў Эўрапейскай камісіі паўплываць на ўрад Беларусі, каб журналісты змаглі вольна працаваць у краіне. У тым ліку прапануюць зьвязаць перамовы аб праграме «Ўсходняга партнэрства» з выкананьнем прынцыпу свабоды слова.

Цяпер жа ў Беларусі, піша RSF, «урад робіць усё магчымае, каб перашкодзіць паведамленьням пра выбарчую кампанію». Сярод журналістаў, якіх затрымлівалі апошнім часам у Беларусі, ёсьць як няштатныя, так і штатныя карэспандэнты Reuters, Радыё Свабода, «Эўрарадыё», Tut.by, Onliner.by і іншых, адзначаюць у RSF. Вядомыя прынамсі 14 выпадкаў затрыманьня журналістаў. Згадваюцца таксама перабоі з мабільным інтэрнэтам падчас апазыцыйных акцыяў.

Асобна адзначаюць затрыманьне і зьбіцьцё журналіста Аляксандра Пазьняка і апэратара Сяргея Багрова ў Ганцавічах, якія асьвятлялі стыхійны пратэст у жывым эфіры для «Ганцавіцкага часу» і «Першага рэгіёну». Пазьняка аштрафавалі на 810 рублёў, Багрова арыштавалі на 15 дзён.

Прэзыдэнцкія выбары — 2020 у Беларусі. Што важна ведаць

  • Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
  • 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
  • Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
  • ЦВК зарэгістраваў 15 ініцыятыўных груп з 55 заявак.
  • Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
  • 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
  • 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
  • 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
  • 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
  • Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG