Лінкі ўнівэрсальнага доступу

«Проста ляжу на асфальце, вакол ходзяць хлопцы з АМАП». Як у Менску затрымалі гітарыста гурту Intelligency


АМАП на плошчы Якуба Коласа 19 чэрвеня

19 чэрвеня гітарыст менскага электроннага гурту Intelligency Яўген Мурашка вяртаўся дадому пасьля адзначэньня абароны магістарскай дысэртацыі. У раёне плошчы Якуба Коласа яго затрымаў АМАП, паведамляе Tut.by.

УЖЫВУЮ Выбары-2020. Як праходзіць прэзыдэнцкая кампанія падчас пандэміі

19 чэрвеня, калі ў Менску праходзіў пікет у апошні дзень збору подпісаў, а на плошчы Якуба Коласа пашыхтаваўся «ланцуг салідарнасьці», гітарыст электроннага гурта «Intelligency» Яўген Мурашка адзначаў у кавярні паблізу плошчы абарону магістэрскай дысэртацыі.

Каля 21-й гадзіны Яўген Мурашка быў ужо на плошчы і хацеў узяць шэрынгавы ровар, каб дабрацца дадому.

«У мяне не адчыняўся замок ровара, я вырашыў адвесьці яго ў бок, каб не перашкаджаць, і там ужо разблякаваць. Міліцыянты далей пайшлі за мной, яшчэ раз удакладнілі, чаму я тут стаю. А ў выніку раптоўна ўзялі мяне за рукі і пасадзілі ў аўтазак», — расказаў Яўген.

Ён пасьпеў запісаць невялікі фрагмэнт свайго затрыманьня. На відэа чуваць, як хлопцу двойчы кажуць: «Сеў, зьехаў», а затым: «Забірай яго».

АМАП не патлумачыў хлопцу, за што яго затрымліваюць, ніхто зь іх не назваўся і не паказаў дакумэнтаў. Пасьля Яўгену стала кепска і ён страціў прытомнасьць.

«Мы доўга езьдзілі па горадзе, было вельмі душна, на нас увесь час ціснулі. Адзінае —​ памятаю, што там, куды нас завезьлі, быў плот з калючым дротам. Калі мяне пачалі выводзіць з аўтазаку, я адключыўся», — прыгадвае Яўген.

У прытомнасьць хлопец прыйшоў толькі ў «хуткай», якую выклікаў нехта з АМАПу. Яўгену памералі ціск і зрабілі кардыяграму, пасьля чаго ён дабіраўся дадому на машынах, якія пагадзіліся яго падвезьці, бо было ўжо позна.

У міліцыі засталіся ягоны пашпарт і студэнцкі білет, які ён спадзяецца забраць неўзабаве. Пасьля затрыманьня ў яго засталіся сінякі і апёк на носе, бо яго спрабавалі прывесьці ў прытомнасьць нашатыром.

У прэс-службе сталічнай міліцыі паведамілі, што Яўгена Мурашку ні ў якое менскае РУУС не дастаўлялі.

Прэзыдэнцкія выбары — 2020 у Беларусі. Што важна ведаць

  • Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
  • 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
  • Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
  • ЦВК зарэгістраваў 15 ініцыятыўных груп з 55 заявак.
  • Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
  • 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
  • 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
  • 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
  • 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
  • Ад пачатку выбарчай кампаніі (на 13 лепеня) праваабаронцы налічылі больш за 700 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. 129 чалавек пакаралі адміністрацыйнымі арыштамі, 252 чалавекі аштрафавалі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG