Аляксандар Лукашэнка 25 траўня падпісаў абноўлены дэкрэт «Аб замежнай бязвыплатнай дапамозе», 26-га тэкст быў афіцыйна апублікаваны. Частка нормаў набудзе моц адразу, частка праз тры месяцы, частка ад 2021 году. Дэкрэт лічыцца «часовым» і выстаўляецца на разгляд Нацыянальнага сходу.
Паводле камэнтару прэс-службы Лукашэнкі, указ «максымальна канкрэтна» вызначае мэты, на якія можна выкарыстоўваць замежную бязвыплатную дапамогу. Таксама апісана, калі такая дапамога вызваляецца ад сплаты падаткаў, а калі Ўпраўленьне справамі прэзыдэнта забірае 0,5% сумы дапамогі. Бюракратычныя працэдуры, як сьцьвярджаецца, зьведзеныя да мініумуму.
У канцы красавіка Лукашэнка запатрабаваў выкарыстоўваць замежную дапамогу толькі на «сацыяльныя мэты», а не на «дэструктыўную дзейнасьць», бо на гуманітарнай дапамозе нібыта «ў свой час вырасла наша апазыцыя так званая».
Паводле дэкрэту, выкарыстоўваць замежную дапамогу можна на:
- мэдычную дапамогу;
- сацыяльную дапамогу інвалідам, пэнсіянэрам, дзецям, асобам бяз пэўнага месца жыхарства і гэтак далей;
- прадухіленьне і ліквідацыю надзвычайных сытуацыяў;
- умацаваньне матэрыяльна-тэхнічнай базы дзяржаўных органаў і ўстановаў;
- навучаньне работнікаў дзяржаўных органаў і ўстановаў;
- будаўніцтва і рамонт сацыяльных аб’ектаў;
- стварэньне і разьвіцьцё бібліятэк, музэяў;
- забесьпячэньне спартовых установаў інвэнтаром, лекамі і вітамінамі, прызамі, кветкамі і сувэнірамі, падрыхтоўку нацыянальных зборных і камандаў;
- устаноўку ачышчальных збудаваньняў і аб’ектаў выкарыстаньня і захаваньня адходаў;
- спаборніцтвы, канфэрэнцыі, сэмінары і кангрэсы дзяржаўных установаў;
- аплату выдаткаў арганізацыяў са сьпісу Кіраўніцтва справамі прэзыдэнта і іншыя мэты, вызначаныя Міжведамаснай камісіяй.
Забаронена выкарыстоўваць дапамогу на:
- тэрарыстычную, экстрэмісцкую і іншую незаконную дзейнасьць;
- фармаваньне палітычных партыяў, саюзаў і асацыяцыяў;
- падрыхтоўку выбараў, рэфэрэндумаў, адкліканьня дэпутатаў, правядзеньне мітынгаў, сходаў, шэсьцяў і забастовак, стварэньне і распаўсюд агітацыйных матэрыялаў;
- арганізацы агітацыйна-масавай і палітычнай працы сярод насельніцтва.
Таксама не дазволена даваць у якасьці дапамогі:
- забароненыя да ўвозу тавары;
- прадукты харчаваньня з тэрмінам прыдатнасьці, меншым за 4 месяцы з даты ўвозу;
- транспартныя сродкі, выпушчаныя даўней за 15 гадоў.
