Крызіс, выкліканы пандэміяй COVID-19, зьмяніў падыход Беларусі да дачыненьняў з Эўразьвязам. Пра гэта заявіў эўракамісар у пытаньнях суседзтва і пашырэньня Олівэр Вархей 19 траўня на слуханьні ў камітэце замежных спраў Эўрапарлямэнту.
«Цяпер у Беларусі зьявілася ўнікальная магчымасьць, — перадае БелаПАН словы Вархея. — Праз выкліканы COVID-19 крызіс мы бачым узьнікненьне зусім іншага падыходу ў краіне ў дачыненьні да Эўразьвязу. Урад працуе з намі, у нас ужо было некалькі кантактаў».
Ён адзначыў, што Беларусь зьвярнулася да Эўразьвязу з просьбай аб макрафінансавай дапамозе для барацьбы з эканамічнымі наступствамі пандэміі каранавірусу.
«Мы стараемся дапамагчы, — сказаў Вархей. — На жаль, яны пакуль не змаглі дамовіцца з МВФ аб дапамозе. Гэта для нас адна з абавязковых перадумоў для даваньня дапамогі.
Але, як толькі дамовяцца і як толькі мы дамовімся аб канкрэтных умовах, тады мы, вядома ж, неадкладна дамо макрафінансавую дапамогу. І я лічу, што гэта гістарычная магчымасьць паспрабаваць стварыць станоўчы імпульс у нашых адносінах».
Вархей нагадаў, што для для краін «Усходняга партнэрства» Эўразьвязу выдзеліў 80 млн эўра на неадкладныя патрэбы сыстэмы аховы здароўя і больш за 883 мільёны эўра на падтрымку сацыяльна-эканамічнага аднаўленьня, галоўным чынам дзяржаўнага сэктару і малых і сярэдніх прадпрыемстваў.
Акрамя таго, да канца месяца паступяць сродкі індывідуальнай абароны, закупленыя Сусьветнай арганізацыяй здароўя на сродкі Эўразьвязу ў рамках адмысловай праграмы падтрымкі сыстэм аховы здароўя для краін «Усходняга партнэрства» на 30 млн эўра.
«Улічваючы крытычную сытуацыю і чаканыя цяжкія наступствы для сацыяльна-эканамічнай сытуацыі, гэта момант праявіць салідарнасьць і супрацоўніцтва. Мы хутка адрэагавалі і далі дапамогу нашым партнэрам», — сказаў Вархей.
