АБСЭ і Эўрапарлямэнт заклікалі вызваліць Ціханоўскага і яго паплечнікаў, прыгразілі санкцыямі
«Затрыманьне вядомых палітычных актывістаў ня толькі перашкаджае працы патэнцыйных кампаніяў, але і запалохвае грамадзтва», — мяркуюць у АБСЭ.
Старшыня пастаяннага камітэту дэмакратыі, правоў чалавека і гуманітарных пытаньняў Парлямэнцкай асамблеі Арганізацыі бясьпекі і супрацы ў Эўропе (ПА АБСЭ) Кірыякас Хаджыяні, яго намесьнік Міхаэль Лінк і дакладчыца Кары Генрыксэн выступілі 2 чэрвеня з супольнай заявай аб выбарчай кампаніі ў Беларусі.
«Калі да важных выбараў застаецца два месяцы, крытычна неабходна, каб беларускія ўлады рабілі ўсё магчымае для забесьпячэньня паўнавартаснага і адкрытага асяродзьдзя выбарчай кампаніі, — гаворыцца ў заяве. — Мы вельмі занепакоеныя тым, што затрыманьне вядомых палітычных актывістаў ня толькі стрымлівае працу патэнцыяльных кампаніяў, але і запалохвае грамадзтва.Таму мы заклікаем улады праяўляць максымальную стрыманасьць напярэдадні важных прэзыдэнцкіх выбараў 9 жніўня і спадзяёмся на вальнейшую абстаноўку за тую, што мы бачылі раней». Цалкам чытайце па спасылцы.
«Якая ў нас бяспраўная краіна!» Што расказваюць блізкія затрыманых разам зь Ціханоўскім
У крымінальнай справе за «гвалт у дачыненьні да міліцыянта» падчас пікету за Сьвятлану Ціханоўскую ў Горадні 29 траўня, апроч яе мужа і кіраўніка штабу Сяргея Ціханоўскага, дагэтуль затрыманыя яшчэ 8 чалавек. У многіх зь іх дома прайшлі вобшукі. Свабода знайшла блізкіх затрыманых, каб даведацца, што пра іх вядома.
Пайшоў па торт для сына. Што расказала жонка затрыманага разам зь Ціханоўскім Уладзімера Навуміка
Інжынэра-канструктара Ўладзімера Навуміка затрымалі ў Горадні 29 траўня на пікеце для збору подпісаў разам з блогерам Сяргеем Ціханоўскім.
Уладзімеру Навуміку маюць прад'явіць абвінавачваньне або адпусьціць да пятніцы, 5 чэрвеня. Пра гэта Свабодзе паведаміла жонка затрыманага Віта, спаслаўшыся на адваката, які ўжо наведваў яе мужа. Але за што пэўна зьбіраюцца судзіць яе мужа і ў якім судзе, Віта ня ведае. Гутарку з жонкай Уладзімер Навуміка чытайце па спасылцы.
Масква будзе «актыўна назіраць» за выбарамі ў Беларусі, — расейскі паліттэхноляг
Ці маюць шанцы на посьпех на выбарах у Беларусі Віктар Бабарыка і Валер Цапкала, якую пазыцыю на беларускіх выбарах зойме Расея? З такімі пытаньнямі мы зьвярнуліся да расейскага паліттэхноляга, кіраўніка агенцтва стратэгічных камунікацыяў «Николло-М» Ігара Мінтусава, які быў кансультантам і ўдзельнікам многіх выбарчых кампаніяў у Расеі, а таксама ў Літве, Латвіі, Польшчы, Украіне, Манголіі. Чытайце інтэрвію па спасылцы.
За акцыю салідарнасьці зь Ціханоўскім далі максымальныя штрафы старшыню АГП і блогеру Шэраму Катý
У судзе Цэнтральнага раёну Менску 3 чэрвеня агучылі выракі двум удзельнікам акцыі салідарнасьці з затрыманым блогерам Сяргеем Ціханоўскім, піша «Вясна». Акцыя была зьвязаная не зь цяперашнім затрыманьнем Ціханоўскага, а з папярэднім.
Судзьдзі Іван Касьцян і Юлія Густыр 3 чэрвеня пакаралі максымальным магчымым штрафам у 1350 рублёў блогера Дзьмітрыя Казлова (вядомага як Шэры Кот) і старшыню Аб’яднанай грамадзянскай партыі Мікалая Казлова. Падрабязнасьці чытайце па спасылцы.
У Сьветлагорску назіральніца паскардзілася ў пракуратуру на прымус падпісвацца за Лукашэнку
Назіральніца кампаніі «Праваабаронцы за свабодныя выбары» са Сьветлагорску Алена Масьлюкова паскардзілася ў пракуратуру на выкарыстаньне адміністрацыйнага рэсурсу для збору подпісаў у падтрымку дзейнага кіраўніка краіны.
Цягам мінулага тыдня Алена Масьлюкова атрымала некалькі паведамленняў наконт таго, што на прадпрыемствах гораду, а менавіта на аб’яднаньні «Хімвалакно», цэлюлозна-кардонным камбінаце ды іншых дзяржаўных установах адбываецца ціск на патэнцыйных выбарнікаў. Іх прымушаюць ставіць подпіс за прэтэндэнта ў кандыдаты Аляксандра Лукашэнку. Цалкам чытайце па спасылцы.
Што рабіць, калі на пікеце пачынаюцца затрыманьні? Парады праваабаронцаў
Другі тыдзень па ўсёй краіне ідуць зборы подпісаў за прэтэндэнтаў у кандыдаты на пасаду кіраўніка дзяржавы, і не заўсёды пікет заканчваецца мірна. Напрыклад, у Горадні затрымалі блогера Сяргея Ціханоўскага.
Што рабіць, калі вы прыйшлі на пікет і пачаліся затрыманьні, якія правы ёсьць у вас у гэты момант, ці можна супраціўляцца, калі затрымліваюць людзі ў цывільным?
Бабарыка: ня бачу ніякіх перадумоваў да адзінай валюты з Расеяй, прабачце за недастаткова дакладны адказ
Патэнцыйны кандыдат у прэзыдэнты, былы кіраўнік «Белгазпрамбанку» Віктар Бабарыка ў інтэрвію расейскай газэце «Московский комсомолец» выказаўся пра адзіную валюту Беларусі і Расеі, пасьля патлумачыў, што яго ня так зразумелі.
«Калі гэта эканамічна мэтазгодна, то чаму б і не, — адказаў Бабарыка расейскаму выданьню. — У гэтым сэнсе добры прыклад — манэтарная палітыка Эўразьвязу з эўра. Я ўвогуле лічу, што мультывалютнасьць — гэта эканамічна неэфэктыўная гісторыя. У бачнай пэрспэктыве колькасьць валютаў будзе зьмяншацца».
Бабарыка позна вечарам 2 чэрвеня напісаў на Facebook, што ў матэрыялах беларускай газэты «Наша ніва» цытата была «вырваная з кантэксту» і «цалкам скажае маю пазыцыю ў пытаньні пабудовы незалежнай Беларусі». Ён папрасіў прабачэньня за «недастаткова выразны і адназначны адказ на вельмі важнае для нас пытаньне».
«Са свайго боку я яшчэ раз хачу сказаць: сувэрэнітэт і незалежнасьць Беларусі — непарушная каштоўнасьць. У цяперашні момант я ня бачу ніякіх перадумоваў нават для абмеркаваньня пытаньня аб адзінай валюце», — патлумачыў ён.
Усьлед за Бабарыкам АГП запатрабавала ад ЦВК адмовіць Лукашэнку ў рэгістрацыі кандыдатам
Аб’яднаная грамадзянская партыя (АГП) запатрабавала ад Цэнтравыбаркаму вынесьці папярэджаньне Аляксандру Лукашэнку, які балятуецца на шосты тэрмін, «за арганізацыю правакацый» і адмовіць яму ў рэгістрацыі кандыдатам у прэзыдэнты.
Як сьцьвярджаецца ў заяве, 29 траўня падчас выступу на МТЗ у Менску Аляксандар Лукашэнка апісаў сцэнар, паводле якога празь некалькі гадзін арганізавалі правакацыю «з удзелам людзей у форме супрацоўнікаў міліцыі» супраць блогера Сяргея Ціханоўскага і яго каманды ў Горадні.
«Гэта сьведчыць аб тым, што правакацыя была падрыхтаваная загадзя, а Аляксандру Лукашэнку былі вядомыя яе дэталі. Аляксандар Лукашэнка сам балятуецца ў прэзыдэнты, зьяўляецца зацікаўленай асобай, пры гэтым ня грэбуе наладжваць правакацыі супраць сваіх апанэнтаў», — піша АГП.
Бацька затрыманага каардынатара штабу Ціханоўскай па Горадні: «Мы для іх ніхто»
Аляксандар Фурманаў — бацька Дзьмітрыя, пэнсіянэр, жыве ў Горадні. Дзьмітры Фурманаў — каардынатар каманды Сьвятланы Ціханоўскай па Горадзенскай вобласьці.
Абодва прысутнічалі на Савецкай плошчы, калі былі затрыманьні. Па словах Аляксандра, сына схапілі адначасна зь Ціханоўскім. Аднекуль прыбеглі хлопцы ў цывільным адзеньні і «выкралі» яго з-за стала, дзе ён зьбіраў подпісы, разам з крэслам, на якім сядзеў.
«Подленька», — кажа пра такое затрыманьне Аляксандар.
Апэратара, які здымаў Сяргея Ціханоўскага, з Акрэсьціна перавялі на «Валадарку», ён трымае галадоўку
Чалавека, які здымаў момант затрыманьня блогера Сяргея Ціханоўскага на камэру каналу «Страна для жизни», завуць Вяргілій Ушак. У хуткім часе пасьля затрыманьня Ціханоўскага Ушака таксама затрымалі, і цяпер яго прозьвішча фігуруе ў сьпісе асобаў, адносна якіх, паводле паведамленьня прэсавай службы МУС, заведзеная крымінальная справа аб учыненьні гвалтоўных дзеяньняў адносна супрацоўніка міліцыі. Хоць дзяўчына Вяргілія Надзея, якая жыве разам зь ім у Менску, абсалютна перакананая, што ніякага гвалту не было, тым больш з боку яе хлопца.
ЦВК афіцыйна пацьвердзіў дыскрымінацыю беларускай мовы
Старшыня Цэнтральнай выбарчай камісіі Лідзія Ярмошына адказала гарадзенскім праваабаронцам на іх зварот наконт дыскрымінацыі беларускай мовы.
Эўразьвяз патрабуе вызваліць Ціханоўскага і Статкевіча
«Апошнія падзеі ў Беларусі ўзьнялі сур’ёзныя пытаньні адносна павагі ўладамі правоў чалавека і асноўных свабодаў сваіх грамадзянаў», — заявіў у інтэрвію Радыё Свабода Пэтэр Стана, прэс-сакратар кіраўніка зьнешняй палітыкі Эўразьвязу Жазэпа Барэля.
Эўрапейскія палітыкі мяркуюць, што блогер Сяргей Ціханоўскі, прадстаўнік апазыцыі Мікалай Статкевіч, а таксама іншыя грамадзкія актывісты, затрыманыя падчас мірных акцыяў, «павінны быць неадкладна вызваленыя, а крымінальны і адміністрацыйны перасьлед супраць іх спынены». Цалкам чытайце па спасылцы.
«Хочам прапанаваць усім прэтэндэнтам аб’яднацца». Прадстаўнік штабу Ціханоўскай расказаў пра далейшы плян дзеяньняў
Каардынатар па Берасьцейскай вобласьці Аляксандар Кабанаў у размове са Свабодай расказаў пра пляны каманды Сьвятланы Ціханоўскай.
«Збор подпісаў працягваецца, пікеты ставяцца, сябры ініцыятыўнай групы працуюць, — кажа Аляксандар Кабанаў. — Мы цяпер рыхтуем заяву. Гэта будзе зварот да сілавікоў, да Лукашэнкі, да людзей. На тэму ўсіх правакацый, на тэму ўмяшаньня ў выбарчы працэс. Таксама мы рыхтуем зварот да міжнародных структур. Мы выйшлі на сувязь з Эўрапарлямэнтам, са спэцдакладчыкам па Беларусі. Мы будзем перадаваць ім усе факты парушэньняў». Гутарку з Аляксандрам Кабанавым цалкам чытайце па спасылцы.
«Яны выскачылі з аўтобуса і бралі ўсіх спрэс», — дзяўчына маладзёна, затрыманага па «справе Ціханоўскага»
«Яны выскачылі з аўтобуса і бралі ўсіх спрэс. Яны не разьбіралі. Узялі 17-гадовага. Узялі тых, хто бліжэй, бо ведалі, што народ пачне адбіваць гэтых людзей. Яны бралі тых, каго можна было за 2 сэкунды дацягнуць да аўтобуса і закінуць туды», — дзяўчына затрыманага па «справе Ціханоўскага» Сяргея Калмыкова расказала Свабодзе пра затрыманьне і ператрус у іхнай кватэры. Чытайце па спасылцы.
«Хачу на свае вочы ўсё ўбачыць». Менскі прадпрымальнік патрабуе ўключыць яго ў выбарчую камісію
36-гадовы Аляксандар Паравы хоча ўвайсьці ў склад участковай выбарчай камісіі на прэзыдэнцкіх выбарах. Каб пераканацца, што просты грамадзянін Беларусі можа лічыць галасы выбарцаў.
«Я лічу, што ў нас абсалютна непразрыстыя выбары, я ня ўпэўнены, як на іх лічаць галасы і мой голас. Я хачу на свае вочы ўсё бачыць, хаця б на тым участку, у камісію якога буду падавацца. Я хачу забясьпечыць празрыстасьць, каб асабіста сказаць, што я прызнаю вынік галасаваньня. Бо цяпер атрымліваецца, што мы прызнаём тое, чаго ніхто з нас асабіста ня бачыў, а нейкія людзі падлічылі, закрыўшы сьпінамі ўсе бюлетэні пры падліку, каб назіральнікам нічога не было бачна. Вось чаму іду ў склад камісіі, а не назіральнікам».
Гісторыю Аляксандра цалкам чытайце па спасылцы.
«Масква зацікаўленая кампрамэтаваць Лукашэнку ў вачах Захаду». Польскі аналітык пра беларускія выбары
Ян Максімюк размаўляе пра беларускую выбарчую кампанію з Камілем Клысіньскім, галоўным спэцыялістам у пытаньнях Беларусі, Украіны і Малдовы з Цэнтру ўсходніх дасьледаваньняў у Варшаве.
Сьцісла:
- Збор подпісаў сьведчыць пра вялікую незадаволенасьць у грамадзтве.
- Дзяржаўная прапаганда стала анахранічнай.
- Пакуль што Лукашэнка дзейнічае эфэктыўна.
- Найбольшая пагроза Лукашэнку — з боку Ціханоўскага.
- Масква зацікаўленая ў сілавым варыянце вырашэньня беларускіх выбараў.
Ціханоўскі — «беларускі Навальны». Расейскі блогер Варламаў расказаў пра выбары ў Беларусі, даў ацэнкі кандыдатам
Папулярны расейскі блогер Ільля Варламаў выпусьціў на Youtube паўгадзіннае відэа пра выбары ў Беларусі пад загалоўкам «Канец эпохі Лукашэнкі: пратэсты, затрыманьні Ціханоўскага і беларускі Майдан».
Чаму мы пра гэта пішам: Ільля Варламаў мае паўтара мільёна падпісчыкаў на Youtube, многія ягоныя відэа набіраюць звыш мільёна праглядаў, ён ня раз прыяжджаў у Беларусь, у сваіх відэа расказваў пра плюсы і мінусы Менску як «гораду з савецкай паштоўкі», крытыкаваў раён «Маяк Менску» і хваліў «Новую Баравую». Што сказаў Варламаў у відэа пра беларускія выбары, чытайце па спасылцы.
У кватэрах затрыманых у «справе Ціханоўскага» прайшлі ператрусы
Увечары 1 чэрвеня ператрус правялі ў кватэры аднаго з затрыманых Уладзімера Навуміка, канфіскавалі ноўтбук і флэш-карты. Праваабаронцам вядома таксама пра ператрусы ў Яўгена Разьнічэнкі, Сяргея Калмыкова, Васіля Баброўскага.
Невядомыя людзі забралі адну з машын, на якіх у Горадню прыехала каманда Ціханоўскага. Уладальнік машыны Ўладзімер Кузьняцоў напісаў заяву пра згон аўто. Цалкам чытайце па спасылцы.
«Яна ня мела іншага выйсьця». Знаёмая ўдзельніцы затрыманьня Ціханоўскага расказвае пра ціск міліцыі на асуджаных за прастытуцыю
Блогера Сяргея Ціханоўскага затрымалі ў Горадні ўвечары 29 траўня. За некалькі хвілін да затрыманьня ў кадры стрыму трапіла жанчына ў масцы, якая настойліва патрабавала ад Ціханоўскага адказаць на яе пытаньні. Пасьля таго, як блогер адмовіўся размаўляць зь ёй, зьявіліся міліцыянты. Неўзабаве ўсчалася штурханіна, у выніку якой адзін зь міліцыянтаў упаў на асфальт, а Сяргея Ціханоўскага і шэраг яго паплечнікаў затрымаў АМАП.
Жанчыну, якая патрабавала ад Ціханоўскага адказаў, карыстальнікі інтэрнэту знайшлі ў той жа вечар. Пад акаўнтамі Алены К. у сацсетках адразу ж зьявілася мноства крытычных камэнтароў. Карыстальнікі інтэрнэту таксама знайшлі фатаздымкі Алены на так званых «сайтах для дарослых». Са Свабодай зьвязалася Натальля, якая сьцьвярджае, што ведае Алену. А таксама разумее, чаму тая стала ўдзельніцай гісторыі з затрыманьнем Сяргея Ціханоўскага. Артыкул цалкам чытайце па спасылцы.