Лінкі ўнівэрсальнага доступу

ЦВК афіцыйна пацьвердзіў дыскрымінацыю беларускай мовы


Старшыня ЦВК Лідзія Ярмошына

Старшыня Цэнтральнай выбарчай камісіі Лідзія Ярмошына адказала гарадзенскім праваабаронцам на іх зварот наконт дыскрымінацыі беларускай мовы, паведамляе праваабарончы цэнтар «Вясна».

Праваабаронцы ў сваім лісьце зьвярталі ўвагу, што сайт ЦВК інфармуе грамадзян Беларусі пра бягучыя выбары толькі на расейскай мове, а на беларускамоўнай вэрсіі сайта няма рубрыкі «Выбары-2020» з навінамі па-беларуску, і ўказвалі на недапушчальнасьць дыскрымінацыі беларускай мовы і беларускамоўных выбарнікаў па моўнай прыкмеце.

Лідзія Ярмошына ў афіцыйным адказе праваабаронцам сьцьвярджае, што рубрыка «Выборы-2020» вядзецца на расейскай мове, «паколькі на гэтай мове вядзецца справаводзтва Цэнтральнай камісіі». Яна лічыць, што законна ня мае абавязку весьці рубрыку і на беларускай мове, якая зьяўляецца адной зь дзьвюх дзяржаўных моваў.

Гарадзенскія праваабаронцы назвалі такі адказ пацьверджаньнем дыскрымінацыі дзяржаўнай беларускай мовы ЦВК, а пазыцыю яе старшыні — цынічнай і абразьлівай у дачыненьні да карэннай тытульнай нацыі дзяржавы.

У чым справа?

У беларускамоўнай вэрсіі сайта ЦВК няма разьдзелу «Выбары і рэфэрэндумы» — менавіта ў гэтым разьдзеле на расейскамоўнай вэрсіі сайта знаходзіцца ўся інфармацыя пра выбарчыя кампаніі ў Беларусі: заканадаўчыя акты, пастановы, каляндарныя пляны, асноўныя навіны кампаніі і шмат што іншае.

Скрыншот тытульнай старонкі беларускамоўнай вэрсіі сайта ЦВК па стане на 13.00 20 траўня 2020 году. Заканчваецца другі тыдзень прэзыдэнцкай выбарчай кампаніі ў Беларусі
Скрыншот тытульнай старонкі беларускамоўнай вэрсіі сайта ЦВК па стане на 13.00 20 траўня 2020 году. Заканчваецца другі тыдзень прэзыдэнцкай выбарчай кампаніі ў Беларусі

Фактычна карыстальнікі беларускамоўнай вэрсіі сайта ня могуць даведацца пра ход цяперашняй выбарчай кампаніі. Сярод «галоўных падзей» на беларускамоўнай старонцы сайта — выбары дэпутатаў ніжняй палаты Рэспублікі Таджыкістан, выбары ў Мілі Мэджліс Азэрбайджанскай Рэспублікі і г. д.

Горадзенскія назіральнікі кампаніі «Праваабаронцы за свабодныя выбары» Віктар Сазонаў, Раман Юргель, Андрэй Коця, Сьвятлана Рудкоўская і журналіст Уладзімер Хільмановіч даслалі ў Цэнтральную выбарчую камісію ліст, у якім адзначылі недапушчальнасьць дыскрымінацыі беларускай мовы і прапанавалі стварыць у беларускамоўнай вэрсіі сайта банэр «Выбары-2020» і напаўняць яго інфармацыяй на беларускай мове.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG